Müharibə dayandı, həmsədrlər gəlir

ATƏT-in Minsk Qrupunun həmsədrləri yaxın günlərdə Bakıya, İrəvana və Dağlıq Qarabağa səfər edəcək.

“RİA Novosti” xəbər verir ki, bu haqda Fransa XİN-in rəsmi nümayəndəsi Roman Nadal keçirdiyi brifinqdə bildirib.

Onun sözlərinə görə, Fransa tərəflərin hərbi əməliyyatları dayandırması üçün səylər göstərib. Ötən şənbə günü xarici işlər naziri Jan-Mark Eyro Azərbaycan və Ermənistan XİN rəhbərləri ilə telefon danışıqları aparıb.

“O, Fransanın ATƏT-in Minsk Qrupu çərçivəsində münaqişənin dinc və dayanıqlı həllinə yönəlmiş səylərini təsdiq edib. Tərəflərin razılığına əsasən amerikalı, rusiyalı və fransalı həmsədrlər yaxın günlərdə Bakı və İrəvana, habelə Dağlıq Qarabağa gedəcək”, – Fransa XİN-in rəsmisi deyib.

*   *   *15:45

Ermənistan Müdafiə Nazirliyinin mətbuat katibi Artsrun Ovannisyan bildirib ki, hazırda atəşkəslə bağlı sənəd hazırlanır.

“Sənəd barədə ətraflı məlumat verməyə səlahiyyətli deyiləm”, – mətbuat katibi belə deyib.

Virtualaz.org xəbər verir ki, bu barədə “RİA Novosti” məlumat yayıb.

*   *   *15:40

Virtualaz.org Müdafiə Nazirliyinin mətbuat xidmətinə istinadən bildirir ki, aprelin 5-də saat 12.00-dan etibarən Azərbaycan-Ermənistan qoşunlarının təmas xəttində tərəflərin razılığı ilə əməliyyatlar dayandırılıb.

Silahlı Qüvvələrimizin bölmələri azad edilmiş torpaqlarda möhkəmləndirmə işlərini həyata keçirir.

Qeyd edək ki, Ermənistan Müdafiə Nazirliyi bununla bağlı hələlik açıqlama verməyib.