Şənbə , Oktyabr 31 2020
Ana səhifə / Media / “Seta” MTK-nın arxasında kim dayanır? – İlginc iddialar

“Seta” MTK-nın arxasında kim dayanır? – İlginc iddialar

İyul ayının 14-ü və 21-i tarixlərində “Bizim Dövr” qəzetinin səhifələrində müvafiq olaraq, “Ağ Şəhər”in üzüqara işbazları” və “SETA” MTK dövlət əhəmiyyətli layihəni nüfuzdan salır sərlövhəli iki tənqidi material dərc olunmuşdu. Həmin yazılarda biz bir daha, artıq uzun müddətdən bəri ölkə mətbuatında öz aktuallığını saxlayan bir mövzuya, müxtəlif sahələrdə müvvəqəti işlərə cəlb olunan və sonradan qazandıqları pulları ala bilməyən insanların problemləri mövzusuna toxunmuşduq. Bu xüsusda redaksiyamıza daxil olmuş şikayət ərizəsində Elçin Məmmədov, Mehdi Hüseynov, Elvin Məmmədov, Daməd Məmmədov, Xalid Cəbrayılov və daha bir neçə nəfər vətəndaşlar bildirmişdilər ki, son on beş ay ərzində onlar paytaxtın Xətai rayonu ərazisində, Bakı Ağ Şəhər layihəsi çərçivəsində inşa olunan “Ağ şəhər” yaşayış kompleksinin 5-6-7 mərtəbəli, 7 girişli yaşayış binasının təmir-tikinti işlərində çalışıblar. Bir daha qeyd edək ki, həmin tikintinin qarşısında yerləşdirilmiş məlumat lövhəsində obyektin “SETA” MTK tərəfindən sifariş olunduğu, podratçı kimi isə, “Union Construktion” MMC-nin (lisenziya № 022543) çıxış etdiyi bildirilir. Şikayətçilər öz ərizələrində göstərimişdilər ki, tikintidə işlədikləri müddət ərzində onlar tərəfindən 350 kv.m sahədə makina suvağı və astar-üzlük alçı vurulması işləri görülüb. İş prosesi zamanı usta və fəhlələrə müəyyən məbləğlər ödənilsə də, işlər tamamlandıqdan sonra şirkətin işçilərə külli-miqdarda borcu qalıb. Həmçinin bizimdovr.az-a təqdim olunmuş ərizədə işi qəbul edən şəxs kimi Fuad adlı bir nəfərin və onun köməkçiləri olaraq, Mikayıl və Ərəstunun adları qeyd olunub. Şikayətçilər bildirirlər ki, işi təhvil verdikləri gündən artıq altı aya yaxın bir müddət keçməsinə baxmayaraq, onlar hələ də öz halal pullarını Fuad müəllimdən ala bilmirlər. Bir qədər təkid etdikdə isə, usta və fəhlələr hətta qarşı tərəfdən hədə və təhdidlərə belə məruz qoyulurlar.

Əslində biz ümid edirdik ki, sözü gedən materialların dərcindən sonra, şikayətçilərin bizə “SETA” MTK-nın rəhbərləri kimi təqdim etdikləri Sudaxan müəllim və Tofiq müəllim bu problemin tez bir zamanda həllini tapması üçün müvafiq addımlar atacaqlar. Amma hadisələrin sonrakı inkişafı bu şəxslərin də, onların göstərişlərini yerinə yetirənlərin və arxalarında duranların da tamamilə başqa fikirdə olduqlarını göstərmiş oldu. Belə ki, həm şikayətçilərə, həm də bizə qarşı “əks-həmlə” taktikasını seçməyə qərar vermiş “SETA” MTK-nın rəhbərliyi məsələni məhkəmə zalına keçirməyə üstünlük verdi. Həm də çox maraqlıdır ki, məhkəməyə şərəf və ləyaqətinin, işgüzar nüfuzunun ləkələnməsi iddiası ilə müraciət etmək üçün, bu “işbazlar şəbəkəsi”nin ən aşağı pilləsində duran icraçılardan biri, Ərəstun Şabanov seçildi. Diqqət edin, görün şikayətçilər Ərəstunun bu şəbəkədə mövqeyini necə təsvir edirlər: “İşlərin başında duran şəxs Fuad Verdiyevdir. O, baş ofisdə əyləşməklə, bilavasitə “Ağ Şəhər” kompleksinə aid binaların satışına baxır. Eləcə də, tikinti sifarişlərini digər şirkətlərə, o cümlədən “SETA” MTK-ya Fuad müəllim verir. Mikayıl Fuad Verdiyevin qohumudur. Buna görə də Fuad müəllimin tövsiyyəsilə “SETA” MTK müəyyən təmir işlərini podratçı qismində Mikayıla tapşırır. Ərəstun Şabanov isə, Mikayılın tanışıdır. Onun da əsas funksiyası Mikayılın götürdüyü işləri artıq bilavasitə icra edəcək usta və fəhlələrin tapılmasında “makler”lik etməkdir…”

Amma istənilən halda, hər bir vətəndaş məhkəməyə müraciət edə bilər və əslində məhkəmə araşdırması yenə də şikayətçilərin xeyrinə işləyəcək bir proses ola bilər. Digər tərəfdən isə, “SETA” MTK-nın arxasında duran şəxsin kimliyi daha böyük maraq doğurur. Həm də ona görə ki, bu şəxsin özü də sırf təsadüf nəticəsində, qəzetimizin məhz 14.07.2016-cı il tarixli sayında dərc olunmuş tənqidi materiallardan birinin anti-qəhrəmanı olmuşdu. “Dövlət Əmək Müfəttişliyi Xidməti funksionallığını itirib” sərlövhəli həmin yazıda biz, redaksiyamıza daxil olan məlumatlara istinadən, bu qurumun rəis müavini Anar Quliyevin bəzi müəssisə rəhbərləri ilə qanunsuz sövdələşmələrə girərək pul yığımları həyata keçirdiyindən bəhs etmişdik. Yazıda qeyd olunmuşdu ki, artıq uzun müddətdən bəri redaksiyamıza daxil olan şikayət məktublarında Dövlət Əmək Müfəttişliyi Xidmətinin (DƏMX)d bir çox şəhər və bölgələrdə fəaliyyət göstərən regional müfəttişliklərində müşahidə olunan qanun pozuntuları barədə açıqlamalar təqdim olunur. Həmçinin biz qeyd etmişdik ki, Əmək və Əhalinin Sosial Müdafiəsi naziri, cənab Səlim Müslümov da öz çıxışlarında dəfələrlə bu orqanın fəaliyyətinin bu gün heç də qənaətbəxş səviyyədə olmadığını konkret faktlar əsasında diqqətə çatdırıb. Nazir bu sahədə fəaliyyət mexanizminin müasir tələblərə uyğun şəkildə yenidən qurulması və müfəttişliklərin öz vəzifə funksiyalarına yanaşmalarında icra məsuliyyətinin artırılması üçün ciddi tədbirlərin görülməsinin vacibliyini bildirib. Lakin bu gün də davam edən müəyyən prosesləri müşahidə etməklə belə qənaətə gəlmək olur ki, Dövlət Əmək Müfəttişliyi Xidmətinin rəisi Fuad Əlizadəni və xüsusilə də Xidmətin rəis müavini Anar Quliyevi mövcud durum tamamilə qane edir. Belə ki, aldığımız məlumatlarda Xidmətin struktur bölmələrinin işində müşahidə olunan bütün qanun pozuntularının başında məhz Anar Quliyevin durduğu iddia olunur. Artıq qeyd olunduğu kimi, Xidmətin regionlarda fəaliyyət göstərən müfəttişlikləri yerli müəssisələrdə əmək məcəlləsinin maddələrinə riayət olunmasına, eləcə də həmin müəssisələrdə çalışan insanların hüquqlarının təmin olunmasına nəzarəti həyata keçirməlidirlər. Lakin müxtəlif mənbələrin iddiasına görə bu qurumlardan əksəriyyətinin rəhbərləri daha çox nəzarət etdikləri müəssisələrin rəhbərləri ilə yolverilməz sövdələşmələrə girərək, işçi və fəhlələrin qanuni hüquqlarının pozulması hesabına şəxsi mənfəət əldə etmək taktikasına üstünlük verirlər. Belə ki, müfəttişliklər tərəfindən müəssisələrdə yoxlamalar subyektiv yanaşmalar əsasında tərtib olunmuş siyahılar üzrə, bir sıra hallarda isə, aidiyyəti olan dövlət qurumunun müvafiq çıxarışları olmadan aparılır. Halbuki, Dövlət Əmək Müfəttişliyi tərəfindən hər hansı bir idarə, müəssisə və təşkilatda yoxlama bu barədə Dövlət Əmək Müfəttişliyi Xidməti rəisinin

yazılı əmri və ya sərəncamı əsasında həyata keçirilə bilər. Həmin əmrin və ya sərəncamın əsli idarə, müəssisə və təşkilata təqdim olunmalıdır. Bəzi hallarda isə, ayrı-ayrı müəssisələr fəaliyyət göstərdiyi halda onlarda yoxlamaların guya ki, “müəssisənin fəaliyyətinin dayanması” səbəbindən təxirə salındığı barədə yuxarı instansiyaya məruzə edilir. Eyni zamanda da bəzi müfəttişliklərin qeyri-leqal məşğulluq hallarının aşkar edilərək aradan qaldırılması ilə bağlı göstəricilərinin xeyli aşağı olduğu da diqqəti cəlb edir. Məlumatlarda bildirilir ki, Anar Quliyev sürəkli olaraq müfəttişlikləri müəssisələrdən rüşvət toplamağa təhrik edir.

İndi isə, “SETA” MTK ilə bağlı problemin müzakirəsində Anar Quliyevi xatırlamağımızın səbəbini açıqlayaq. Məsələ bundadır ki, dünən yenidən redaksiyamıza gəlmiş Elçin Məmmədov və Mehdi Hüseynov qarşılaşdıqları problemin həllini tapmaq üçün bir neçə dəfə DƏMX-in Xətai rayonunda yerləşən 23 saylı Əmək Müfəttişliyinə müraciət etdiklərini, lakin orada məsələyə baxılmadığını bildiriblər. Bu səbəbdən şikayətçilər elə dünən Dövlət Əmək Müfəttişliyi Xidmətinə yollanıblar. Lakin burada da onları dinləyən olmayıb. Məlum olub ki, Xidmətin rəis müavini Anar Quliyev, sən demə “SETA” MTK-nın rəhbəri olan Sudaxan müəllimlə həmyerlidir. Yəni bu şəxslərin hər ikisi əslən Şəmkir rayonundandır. Məhz elə bu səbəbdən də, “SETA” MTK-nın rəhbərliyi bir neçə fəhlənin pulunun kəsilməsi kimi “xırda” bir işin həlli üçün özünə əziyyət verməmək və Ərəstun Şabanovu “irəli vermək” qərarına belə rahatlıqla gəlib. Amma Sudaxan müəllim unutmasın ki, Anar Quliyevin keçmiş MTN generalı Akif Çovdarovla yaxın qohumluq əlaqələri səbəbindən, qılıncının hər iki üzünün kəsdiyi vaxtlar artıq çoxdan keçib…

Materialda adı keçən bütün tərəflərin mövqeyini öyrənməyə hazırıq.

Həmçinin oxuyun

Erməni jurnalist: “Nəinki döyüşdə, informasiya müharibəsində Azərbaycana uduzduq”

Ermənistanın “5-ci” televiziya kanalının icraçı direktoru Arutyun Arutyunyan nəinki döyüşdə, informasiya müharibəsində Azərbaycana uduzduqlarını bildirib. …

Bir cavab yazın