Cümə , Noyabr 22 2019
Ana səhifə / Media / Naxçıvanda mətbuat orqanları ilə dövlət qurumları arasında əlaqələrin gücləndirilməsi mövzusunda tədbir keçirilib

Naxçıvanda mətbuat orqanları ilə dövlət qurumları arasında əlaqələrin gücləndirilməsi mövzusunda tədbir keçirilib

Oktyabrın 29-da Naxçıvan Muxtar Respublikası Ali Məclisinin Sədri yanında Kütləvi İnformasiya Vasitələrinin İnkişafına Dövlət Dəstəyi Fondu tərəfindən muxtar respublikanın kütləvi informasiya vasitələri ilə dövlət qurumları arasında əlaqələrin gücləndirilməsi mövzusunda tədbir keçirilib.

AZƏRTAC-ın Naxçıvan bürosu xəbər verir ki, Naxçıvan Muxtar Respublikası Ali Məclisi Aparatının mətbuat və ictimaiyyətlə əlaqələr şöbəsinin baş məsləhətçisi Təhminə Babayeva muxtar respublikanın mərkəzi icra hakimiyyəti orqanlarının 2019-cu ilin ötən dövründəki fəaliyyəti barədə məlumatı diqqətə çatdırıb. Qeyd olunub ki, ötən müddətdə mərkəzi icra hakimiyyəti orqanlarının mətbuat xidmətlərinin “Şərq qapısı”, şəhər və rayon qəzetlərində, ümumilikdə, 2583 materialı dərc olunub, teleradiolarda 3423 veriliş və xəbər süjeti hazırlanıb, müxtəlif sosial şəbəkələrdə 8782 material yerləşdirilib.

Naxçıvan Muxtar Respublikası Televiziya və Radio Şurasının üzvü Sara Əzimova və Naxçıvan Mətbuat Şurasının sədri Rövşən Hüseynov tədbirdə çıxış edərək mətbuat xidmətlərinin teleradio və qəzetlərlə əməkdaşlıq imkanlarını diqqətə çatdırıblar.

Naxçıvan Muxtar Respublikası Dövlət Televiziya və Radio Verilişləri Komitəsinin sədri Sahil Tahirli, “Şərq qapısı” qəzetinin baş redaktoru Mehriban Sultanova və Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının üzvü Səməd Canbaxşıyev mətbuat xidmətləri ilə teleradio və qəzetlər arasında əməkdaşlığın qurulmasında yol verilən nöqsanlardan bəhs edib, qarşılıqlı əməkdaşlığın səmərəli təşkili ilə bağlı fikirlərini bildiriblər.

Diskussiya şəraitində keçən tədbirdə Vergilər Nazirliyinin aparat rəhbəri Əli Şabanov, Ailə, Qadın və Uşaq Problemləri üzrə Dövlət Komitəsinin mətbuat və ictimaiyyətlə əlaqələr üzrə baş məsləhətçisi Zərnigar Orucəliyeva, Kənd Təsərrüfatı Nazirliyinin aparat rəhbəri Zəkəriyyə Gözəlov, Maliyyə Nazirliyinin aparat rəhbəri Tural Şirəlizadə, Naxçıvan Muxtar Respublikası Prokurorluğunun mətbuat və informasiya şöbəsinin müdiri Faiq Səfərov və Dövlət Miqrasiya Xidmətinin mətbuat və ictimaiyyətlə əlaqələr üzrə baş məsləhətçisi Arif Bayramov fəaliyyətin yeni tələblər səviyyəsində qurulması ilə əlaqədar təkliflər veriblər.

Müzakirələr zamanı Əlahiddə Ümumqoşun Ordunun, Naxçıvan Muxtar Respublikası Prokurorluğunun, Daxili İşlər Nazirliyinin, Dövlət Miqrasiya Xidmətinin, Səhiyyə Nazirliyinin, Daşınmaz Əmlak və Torpaq Məsələləri üzrə Dövlət Komitəsinin, Əmək və Əhalinin Sosial Müdafiəsi Nazirliyinin, Dövlət Statistika Komitəsinin mətbuat xidmətlərinin materiallarının keyfiyyətlə hazırlandığı diqqətə çatdırılıb, həmin əməkdaşlar tərəfindən informasiyalarla yanaşı, veriliş və məqalələrin də işləndiyi qeyd olunub. Digər mətbuat xidmətlərinin fəaliyyətinin də bu istiqamətdə qurulması, kəmiyyətdən çox keyfiyyətə diqqətin artırılmasının əhəmiyyəti vurğulanıb. Həmçinin mətbuat xidmətlərinin televiziya və qəzetlərdə yeni veriliş və rubrikaların açılması ilə bağlı təklifləri nəzərə alınıb.

Naxçıvan Muxtar Respublikası Ali Məclisi Aparatının Mətbuat və ictimaiyyətlə əlaqələr şöbəsinin müdiri, Kütləvi İnformasiya Vasitələrinin İnkişafına Dövlət Dəstəyi Fondunun Müşahidə Şurasının sədri Ülvi Hüseynli çıxış edərək deyib ki, Naxçıvan Muxtar Respublikası Ali Məclisi Sədrinin 2019-cu il 19 sentyabr tarixli Fərmanı ilə Naxçıvan Muxtar Respublikası Ali Məclisinin Sədri yanında Kütləvi İnformasiya Vasitələrinin İnkişafına Dövlət Dəstəyi Fondu yaradılıb. Sentyabrın 27-də Naxçıvan Muxtar Respublikası Ali Məclisinin Sədri yanında Kütləvi İnformasiya Vasitələrinin İnkişafına Dövlət Dəstəyi Fondunun müşahidə şurasının ilk iclası və media nümayəndələri ilə görüş keçirilib. Naxçıvan Muxtar Respublikası Ali Məclisinin Sədri Vasif Talıbov görüşdə kütləvi informasiya vasitələrində fəaliyyətin təşkili ilə bağlı mühüm vəzifələr müəyyənləşdirib, media ilə dövlət orqanlarının mətbuat xidmətləri arasında əlaqələrin gücləndirilməsi ilə bağlı tapşırıqlar verib. Ali Məclis Sədrinin tapşırığına uyğun olaraq Kütləvi İnformasiya Vasitələrinin İnkişafına Dövlət Dəstəyi Fondu tərəfindən muxtar respublikanın kütləvi informasiya vasitələri ilə dövlət qurumları arasında əlaqələrin gücləndirilməsi mövzusunda tədbir keçirilir.

Qeyd olunub ki, təşkilatların fəaliyyəti barədə mətbuatda informasiyaların verilməsi ilə iş bitmir. Həyata keçirilən dövlət siyasətinin mahiyyəti açılmalı, təhlillər aparılmalı, görülən işlərin nəticəsi, əldə olunan uğurlar ictimaiyyətə çatdırılmalıdır. Mətbuat xidmətləri ictimaiyyəti maraqlandıran məsələlərlə bağlı məlumatları yubatmamalı, qəzet və teleradio əməkdaşları da dövlət qurumları tərəfindən təqdim edilən informasiyalara biganə münasibət göstərməməli, həmin materialların aktuallığı və ictimai əhəmiyyəti nəzərə alınaraq ictimailəşdirilməli, qarşılıqlı əməkdaşlıq gücləndirilməlidir.

Həmçinin oxuyun

Jurnalistin şantajla bağlı şikayəti əsassız olduğu üçün rədd edilib

Bir neçə ay bundan əvvəl “Sputnik” informasıya agentliyində muxbir işləyən, Jurnalist İradə Cəlil Baş prokurorluq …