Jurnalistlərin binası önündə işıqfor problemi

Bakıda bəzi magistral yollarda ehtiyac olduğu təqdirdə piyada keçidinə, işıqforlara rast gəlinmir. Belə məkanlardan biri də Səbayel rayonu, Salyan şosesi 22 ünvandır. Hansı ki, orada jurnalistlərin binası yerləşir. Prezidentin bağışladığı mənzillərdə yaşayan media əhli bildirir ki, binanın yaxınlığında işıqfor olmadığı üçün yolu qarşı tərəfə keçməkdə, yaxınlıqdakı dayanacağa yol almaqda çətinlik çəkirlər. Jurnalistlər hesab edirlər ki, binanın yaxınlığında işıqfor qoyularsa, hərəkət tənzimlənərsə problem həll olar.

Onu da qeyd edək ki, ötən il iyulun 20-də jurnalistlər üçün tikilmiş növbəti binada Milli Mətbuat Günü münasibətilə mənzillərin paylanması mərasimində iştirak edən ölkə başçısı İlham Əliyev də yol məsələsi barədə tapşırıq vermişdi: “Mənə deyiblər ki, burada yeni yola ehtiyac var. Çünki indi yol bir tərəfdən çəkilibdir, ona görə müvafiq göstəriş verilibdir ki, hər iki tərəfə çıxış olsun, insanlar burada daha da rahat yaşasınlar”.
Bəs tələb olunan işıqforu hansı qurum quraşdırır və bu prosedur necədir?

“Yeni Müsavat”a danışan nəqliyyat üzrə ekspert İlqar Hüseynov məsələnin hüquqi tərəfləri barəsində danışıb: “İşıqforun qoyulması, piyada keçidinin yerləşdirilməsi və xüsusi zolaqların salınması ilə bağlı məsələ Dövlət Yol Polisi orqanları tərəfindən müzakirə olunub, qaldırılır. Yoxlamalar həyata keçirilir, həmin ərazilər müşahidə altında saxlanılır. O yerlər müşahidə edilir ki, həmi ərazidə tez-tez qəzalar baş verir, yolun bir istiqamətindən digərinə keçidlə bağlı problemlər yaşanır. Müşahidələr aparıldıqdan sonra Bakı Şəhər Baş Yol Polis İdarəsi bununla bağlı müvafiq qərar hazırlayır. Həmin qərar isə əraziyə baxan rayon icra hakimiyyətinə göndərilir. Yer Bakı şəhərindədirsə, bununla bağlı Bakı Şəhər İcra Hakimiyyətinə təqdimat verilir ki, filan ərazilərdə işıqforların qoyulmasına ehtiyac var. Eyni zamanda əsaslandırılır ki, ehtiyac hansı səbəbdən yaranıb.

Bu məsələ müzakirə olunduqdan sonra Bakı Şəhər İcra Hakimiyyəti öz qərarını verir, lazımı tikinti işlərinə start verilir. Söhbət işıqforların qoyulması, yerüstü keçidlərin tikilməsindən gedir. Hesab edirəm ki, jurnalistlərin yaşadığı ərazidə işıqforların qoyulması çox vacibdir. Fikirləşirəm ki, orada yerüstü piyada keçidlərinin qoyulmasına da ehtiyac var. Çünki orada məsafə böyükdür. Belə olduğu halda isə yaxın məsafələrdə işıqforların qoyulması bəlkə də düzgün olmazdı. Ancaq yerüstü piyada keçidi olarsa, məsələdə problem yaranmaz. Hesab edirəm ki, həmin ərazidə zəruri infrastrukturların qurulması vacibdir. Bununla bağlı əgər ərazidə yaşayan vətəndaşlar müraciət edərlərsə, o zaman məsələyə baxılar. Düşünürəm ki, hətta ictimai qurumların da bununla bağlı müraciətləri ola bilər. Eyni problem bir zamanlar Bakı-Sumqayıt yolu istiqamətində də yaşanırdı. Belə ki, Xırdalan qəbiristanlığı istiqamətində bir neçə dəfə qəzalar baş verdi və xeyli insan dünyasını dəyişdi. Məsələ ilə bağlı mütəmadi şəkildə təkliflərlə çıxış etdik və çox keçmədi ki, ərazidə yerüstü keçid inşa edildi. Artıq orada keçid istifadəyə verilib və insan ölümünün də qarşısı birmənalı şəkildə aradan qaldırılıb. İndi Salyan şosesi ilə bağlı da həm vətəndaşların, həm də ictimai qurumların təşəbbüslərinə ehtiyac var. Bir halda ki, orada jurnalistlər yaşayırlar və ərazidə yeni binalar tikilir, o zaman yol infrastrukturu da yerində olmalıdır. Onu da deyim ki, ölkə rəhbərliyinin də bu məsələ ilə bağlı iradəsi var ki, proses davam etdirilsin”.

Ekspert bildirib ki, əgər binada yaşayan jurnalistlər müvafiq dövlət orqanlarına müraciət ünvanlasalar problemə baxılacaq:

“Xüsusən də istərdim ki, əgər jurnalistlər işıqforla bağlı müraciət edəcəklərsə, orada yerüstü piyada keçidinin tikilməsi məsələsini də qabartsınlar. Düşünürəm ki, müvafiq strukturlara əsaslandırılmış məktubla müraciət edilsə, qısa bir zamanda bu problem öz həllini tapacaq. Ümumilikdə Bakıda bu kimi problemlər bir deyil. Bəzi prospektlərdə də vəziyyət oxşardır. Ona görə də monitorinqlər aparılmalı, ərazilər yoxlanmalıdır. Bu işdə yol polisi, yerli icra hakimiyyətləri, bələdiyyə qurumları monitorinqlər aparmalıdırlar. Xüsusilə də yerli bələdiyyə qurumları daha fəal olmalıdır. Hansı ki, bu qurumlar vətəndaşların sosial xidmətlərə əlçatanlığını təmin etməkdə üzərilərinə öhdəlik götürüblər. “Bələdiyyələrin statusu haqqında qanun”da da bu məsələ öz əksini tapıb. Piyada keçidlərinin tikilməsi, işıqforların qoyulması da əslində vətəndaşlara olan sosial xidmətdir. Bu anlamda biz əgər monitorinqlər aparsaq sözsüz ki, infrastrukturların qurulması üçün zəruri ehtiyacları olan ərazinin kifayət qədər olduğunu görərik. Əsasən də nəqliyyatın yüksək sürətlə hərəkətinə icazə verilən prospektlərdə məsələ daha ciddidir. Onlardan biri də Heydər Əliyev prospektidir. Orada da bu məsələlərə diqqət olunması vacibdir. Bu prospektdə sağda-solda daha çox müasir ticarət mərkəzləri tikilib. Yaşayış yerlərinin olması isə məhdud haldadır. Bu da o demək deyil ki, yaşayış azdırsa, söylədiyimiz strukturu yaratmaq lazım deyil. Düşünürəm ki, ticarət mərkəzlərində çalışan işçilərin də qarşı tərəfə təhlükəsiz formada keçmələrini təmin etmək üçün şəraitin yaradılmasına ehtiyac var”.