Çərşənbə axşamı , Oktyabr 20 2020
Ana səhifə / Media / Biləcəridə naməlum qüvvə həyəti işğal edib, sakinlər etiraza hazırlaşır…

Biləcəridə naməlum qüvvə həyəti işğal edib, sakinlər etiraza hazırlaşır…

“Məhəlləmizi sanki müharibə vaxtı düşmənin bir kəndi ələ keçirdiyi kimi zəbt ediblər. Bu biabırçılığı dayandırmasalar, yolu kəsəcəyik, etiraz aksiyaları edəcəyik. Bircə ağacın da kəsilməsinə imkan verməyəcəyik. Məmurlar tamahlarına sahiblənə bilmirlər, cibləri dolsun deyə, insanların yaşayış şəraitini əlindən almaqla onları dövlətə qarşı qaldırırlar”.

Bu, Biləcərinin Rəşid İsmayılov küçəsi, 12 ünvanında yaşayan sakinlərin müraciətidir. Sakinlər bildirirlər ki, ərazidə qəfil başlanan hasarlama işləri binaya giriş-çıxışı məhdudlaşdırıb. Sakinlər bu hasarlama işlərinin səbəbi ilə maraqlananda əvvəlcə onlara bildirilib ki, Binəqədi rayon İcra Hakimiyyəti ərazidə abadlaşma işləri aparır.

Sakinlər yazır: “Dedilər, guya yollara asfalt döşəyəcəklər, əlavə ağaclar əkəcəklər. Uşaqların oyun meydançasını genişləndirəcəklər. Ancaq bir də gördük ki, məhəlləyə hansısa şirkət işçiləri gəlib gedir, qulağımıza söhbət çatdı ki, həmin adamlar ərazidə bünövrə qazıntıları aparmağı planlaşdırırlar. Artıq binanın tikintisinə hazırlıq işləri görülür. İcra hakimiyyətinə, bələdiyyəyə yazdıq, indi də gözləyirik görək, nə cavab verəcəklə”

Həmin ünvanda yaşayan Musa Zamanov danışır ki, hələ də adını öyrənə bilmədikləri şirkətin işçiləri çox arxayındırlar: “Özbaşınalığa baxın ki, şirkət adını da gizlədir. Deyir, “kimsən ki, sənə hesabat verim”. Deyirlər,”əlimizdə daşdan keçərli hər sənədimiz var”. Biz də bilirik ki, arxalarında dayanan, o sənədi onlara verən olmasa, özbaşına daşı daş üstə qoya bilməzlər. Bizi maraqlandıran odur ki, azı əlli ailənin üstündən keçib, bu qədər insanın rahatlığını əlindən alıb o şirkətə razılıq verən məmur nə yeyib içib həyatda yaşayır?..”.

Sakinlərin deməsinə görə, əraziyə giriş-çıxış o qədər məhdudlaşıb ki, bir qəza baş versə, nə təcili yardım, nə də yanğınsöndürən maşınına yol qalmayıb. Onlar tikinti aparılmasına imkan verməməkdə israrlıdırlar.

Qeyri-iş günləri olduğundan Binəqədi rayon İcra Hakimiyyətindən məsələyə münasibət öyrənmək mümkün olmayıb. (“Azadlıq” radiosu)

Həmçinin oxuyun

“Axı niyə İrəvanı bombalamırlar?” – “Kommersant” qəzeti

17 oktyabr gecəsi Azərbaycanın ikinci böyük şəhəri Gəncə yenidən beş gün əvvəlki hadisələri yaşadı. “Elbrus” …

Bir cavab yazın