Azərbaycanda çörəyin içində siçovul nəcisinin olduğu təsdiqləndi – VİDEO

Gəncədə Türkiyə vətəndaşının mağazadan aldığı çörəyin içərisindən siçovul nəcisi çıxması ilə bağlı Standartlaşdırma, Metrologiya və Patent üzrə Dövlət Komitəsinə laborator müayinə üçün təqdim etdiyi nümunənin nəticələri məlum olub.

Komitənin “Yeyinti və kənd təsərrüfatı məhsullarının sınağı” laboratoriyasına təqdim olunan çörəkdə fikizi və kimyəvi yoxlamalar aparılıb.

Çörək QOST-un 6 göstəricisindən cəmi 1-nin tələbinə cavab verib. Nəticədə Şahin Mahmudun müraciəti ilə bağlı çörəyin xəmir hissəsində aşkar olunan 8 kənar qarışığın isə həqiqətən də siçovul nəcisi olduğu müəyyən edilib. Əcnəbi vətəndaşın müraciəti ilə ictimailəşən məsələyə Standartlaşdırma, Metrologiya və Patent üzrə Dövlət Komitəsindən də açıqlama gəlib.

Qurumun mətbuat katibi Fazil Talıblı bildirib ki, bu barədə şikayətçiyə cavab verilib: “Həmçinin Azərbaycan Respublikasının İqtisadiyyat və Sənaye Nazirliyi yanında Antiinhisar Siyasəti və İstehlakçıların Hüquqlarının Müdafiəsi Xidmətinə həmin o marketdə satılan istehsalçısı məlum olmayan dairəvi çörəyin tərkibi ilə bağlı sınaq protokolunu əlavə etməklə nəticələri bildirməklə xahiş etmişik ki, bu çörəyin istehlak bazarında qarşısını alınması məqsədilə qanunvericiliyə uyğun olaraq tədbirlər görülsün”.