Cümə axşamı , Mart 28 2024
Ana səhifə / Manşet / ARİF ALIŞANOVUN MƏHBUSU HƏBSXANADA ÖLDÜ – İkisinin vəziyyəti isə ağırdır

ARİF ALIŞANOVUN MƏHBUSU HƏBSXANADA ÖLDÜ – İkisinin vəziyyəti isə ağırdır

“Azərbaycan Televiziya və Radio Verilişləri” QSC-nin sabiq sədri Arif Alışanovun şikayəti əsasında həbs edilmiş Qoçəli Cəbiyev iki gün əvvəsaxlanıldığı Penitensiar Xidmətin Müalicə Müəssisəsində dünyasını dəyişib.

Bu barədə “AzPolitika.info”-ya mərhumun yaxınları məlumat verib. Bildirilir ki, mərhum böyrək çatışmazlığından həyatını itirib. O, doğulduğu Şamaxı rayonunun Nağaraxana kəndində dəfn olunub. Q. Cəbiyevin həyat yoldaşı da ötən il vəfat edib.

Xatırladaq ki, Q. Cəbiyev məhkəmə prosesində bildirmişdi ki, istintaq zamanı ciddi təzyiqlərə məruz qalıb. Müstəntiq Kamal Talıbov ondan digər təqsirləndirilən Şücayət Əkbərovun üzünə durmağı, bunun müqabilində azadlığa çıxmağa şərait yaradacağını təklif edib. Amma o müstəntqin təklifindən imtina edərək Ş. Əkbərova şər atmayacağını deyib.

Arif Alışanovun həbs etdirdiyi Zöhrab Şirinov isə dəri xərçənginə tutulub. O, hazırda həbsdə müalicə ounur.

AzTV-nin keçmiş sədrinin eyni ittihamla həbs etdirdiyi daha bir məhbus – Şücayət Əkbərovun da səhhəti ağırdır. Onun qızı Cəmilə Tağıyeva “AzPolitika.info”-ya bildirib ki, atası iki dəfə açıq ürək əməliyyatı keçirib, ağır şəkər xəstəsidir: “Biz hər an onun başına bir iş gələcəyinin qorxusu ilə yaşayırıq. Arif Alışanov gücü, imkanları hesabına atamı və onunla birgə tutdurduğu şəxsləri şərlədərək həbsdə saxlayır. Biz bəlkə yüz dəfə hüquq mühafizə orqanlarına, ölkə rəhbərliyinə müraciət etmişik, atamın günahsız olduğunu, ona böhtan atıldığını, istintaqın və məhkəmənin sifarişlə ona qarşı ağır ittihamlar düzüb-qoşub cəzalandırdığını yazmışıq. Bizi eşidən olmadı. Nəticə faciəli oldu, Qoçəli əmi həbsxanada dünyasını dəyişdi. Atamla bağlı ədalətsiz məhkəmə qərarı ləğv olunmasa, onun da aqibəti elə ola bilər” .

Cəmilə Tağıyeva növbəti dəfə Prezident İlham Əliyevə müraciət edərək atası ilə bağlı çıxarılmış əsassız məhkəmə qərarının ləğv olunmasına dəstək verməyi xahiş edib: “Hörmətli cənab Prezident! Ölkəmiz üçün ağrılı keçən bu pandemiya günlərində var gücünüzlə xalqımızı bu bəladan çıxarmaq üçün çalışırsız. Bu yaxınlarda həbsxanada cəza çəkən yaşlı məhbusların həyat və sağlamlığını düşünərək onları əfv etmisiniz. Mənim atam günahsızdır, ağır xəstədir, onun yaşamağa məcbur edildiyi həbs həyatına son verilməsə, həyatına ciddi təhlükə yarana bilər. Sizdən çox xahiş edirik, bu ədalətsizliyə müdaxilə edin, atam da Qoçəli əmi kimi həbsxanada həyata vida etməsin.”

Xatırladaq ki, Bakı Ağır Cinayətlər Məhkəməsinin hökmü ilə Şücayət Əkbərova 18, Qoçalı Cəbiyevə 17, Zöhrab Şirinova 16, Aqşin Hüseynova isə 1 il 4 ay həbs cəzası verilmişdi. Aqşin Hüseynovun həbsdə saxlanma müddəti başa çatdığına görə məhkəmə zalından azadlığa buraxılıb.

Sumqayıt Apellyasiya Məhkəməsinin qərarı ilə onların cəzası azaldılıb. Qərara əsasən, Şücayət Əkbərovun cəzası 18 ildən 16 ilə, Zöhrab Şirinovun cəzası isə 16 ildən 14 il 6 aya endirilib. Lakin onlar bu qərardan da narazı qalıblar. Məhkəmədə də onların vəkilləri müvəkkillərinin günahsız olduğunu bildirərək, bəraət hökmü çıxarılmasını istəyiblər.

Üç nəfər Alışanov və yaxınlarına qarşı sui-qəsddə ittiham olunsa da, Aqşin Hüseynov isə ancaq qanunsuz silah saxlamaqda təqsirləndirilirdi.

İttihama görə, Şücayət Əkbərov Alışanovun əmlakını ələ keçirmək məqsədilə Musabi Namazov, Qoçəli Cəbiyev, Zöhrab Şirinov və Aqşin Hüseynovdan ibarət dəstə yaradıb. Ş.Əkbərov Alışanovun qətlinin müqabilində Q.Cəbiyevlə M.Namazova 600 min manat pul vəd edib. Prosesin gedişində M.Namazov bu barədə polisə xəbər verib. Bundan sonra əməliyyat keçirilib və digər dörd nəfər həbs olunub.

M. Namazov özü isə məsuliyyətdən azad edilib. Təqsirləndirilən şəxslərə qarşı Cinayət Məcəlləsinin 29,120 (qəsdən adam öldürməyə cəhd), 178 (dələduzluq), 228-ci (qanunsuz silah saxlama) maddələri ilə ittiham irəli sürülüb.

AzPolitika.info

Həmçinin oxuyun

Naxçıvanda: Dərzi şikayət etdiyi üçün obyekt icarə götürə bilmədiyini deyir

“Aylardır iki azyaşlı körpəmi dolandırmaqda çətinlik çəkirəm” Ötən il, oktyabrın 22-də Naxçıvanın Şərur rayonundakı ticarət …