Cümə , Avqust 7 2020
Ana səhifə / Manşet / 1960-cı ildə yaradılan mənzil-tikinti kooperativinin mirasını kimlər talayıb, milyonçu olub… – Sakinlər imdad diləyir

1960-cı ildə yaradılan mənzil-tikinti kooperativinin mirasını kimlər talayıb, milyonçu olub… – Sakinlər imdad diləyir

Bakı şəhəri, Nəsimi rayonu C.Məmmədquluzadə küçəsi 98 saylı binanın «Müəllimlər» mənzil-tikinti kooperativi payçıları tərəfindən Azinforum.az saytına  şikayət ərizəsi daxil olub. Binanın sakinləri ərizədə bildirirlər ki, “Müəllimlər” mənzil-tikinti kooperativi 1960-cı ildə yaradılmış və pay sahibləri tərəfindən binanın tikilməsi üçün sərmayə qoyulmuşdur: “Burada 0.65 ha həyətin ümumi sahəsində, beşmərtəbəli, beş bloklu, 60 mənzilli olan bina, zirzəmi və 188,3 kv.m sahəsi olan yarımzirzəmisi, həmçinin zirzəminin mebeli, kondinsionerləri, nasosxana, işıqlandırma və elektrik sistemlərinin alınması və quraşdırılması, həyətin yaşıllıqla abadlaşdırılmış istirahət zonası, kooperativ üzvlərinin yığıncağı üçün nəzərdə tutulmuş qeyri-yaşayış sahəsi pay sahiblərinin sərmayəsi hesabına inşa edilib. Bina 1965-ci ildə istismara verilib. Binanın texniki pasportu və sahə sənədləri yaradılıb. Bütün xərclər kənardan heç bir maddi köməklik olmadan sakinlər (pay sahibləri) tərəfindən ödənilib. Bundan əlavə, sözü gedən binanın yarızirzəmisi «Azərittifaq»ın laboratoriyasına icarəyə verilib və alınan vəsait həyətin təmizlik işlərinə, xadimə xidmətlərinə, kooperativin mühasibi və kooperativ sədrinə əmək haqqı ödəmək üçün xərclənirdi.

2002-ci ildə binanın sakini Ramazanov Səfər Müslüm oğlu «Müəllimlər» MTK-nın sədr vəzifəsini ələ keçirdikdən sonra əvvəllər icarəyə verilən yarımzirzəmini öz şəxsi ofisinə çevirərək MTK-nı icarədən gələn vəsaitdən məhrum edib. Ramazanov Səfər Müslüm oğlu 2004-cü ildə həyətin ümumi sahəsinin 0,40 ha-nı pay sahiblərinin xəbəri və razılığı olmadan öz şəxsi mülki kimi qeyri-qanuni şəkildə «Baku Clock Tover» şirkətinə külli miqdarda pul müqabilində satıb. (Bizdə olan məlumatlara görə 2 milyon ABŞ dollarına) Və həmin sahədə adı çəkilən şirkət bina inşa etməyə başlayır. Kooperativin pay sahibləri həyət sahəsinin bu dərəcədə azalmasından narazı qalıb Ramazanov Səfərdən izahat verilməsini tələb etdikdə o, «kürd mafiyasının işləridir, baş qoşmayın, yoxsa bizi mənzillərimizdən köçürdərlər» -deyərək hədə-qorxu gəlib sakinlərin narazılığını bildirməmələrinə məcbur edib.

Həmin ildə Ramazanov Səfərin maddi durumu sürətlə yüksəlir, hər iki oğluna bahalı avtomobillər, yeni evlər və öz sözlərinə görə, Qəbələ rayonunda villa alır. Hər il xaricə ailəsi ilə birlikdə bahalı kurortlarda istirahət edir. Bundan başqa yaşadığımız binada da bir neçə mənzil alır.

Ramazanov Səfər Müslüm oğlu həyətdə uşaqlar üçün yaradılan guşəni zəncirlə ayıraraq şəxsi avtomobilləri üçün parkinq kimi istifadə edir. Sakinlərin uzun müddət şikayətlərinə baxılmır və heç bir tədbir görülmür.

2017-ci ildə məlum olur ki, pay sahiblərinin ümumi istifadəsində olan 188,3 kv.m sahəsi olan yarımzirzəmi saxta sənədlərlə oğlu Ramazanov Böyükağa Səfər oğlunun adına keçirilib. Sakinlərin haqlı etirazına cavab olaraq

Ramazanov Səfər onu Birjada 35 min manata aldığını deyir, lakin sonradan məlum olur ki, Əmlak Komitəsinə rüşvət verərək dövlət sahəsi adı ilə həmin zirzəmini hərraca çıxarıb.

Bütün bunlardan sonra kooperativ üzvləri iclas keçirərək Ramazanov Səfəri səsvermə ilə tutduğu vəzifədən azad ediblər. Sənədlərin və binaya aid möhürün təhvil-təslim zamanı məlum olur ki, binaya və ümumi sahə yə aid olan texniki pasport və kooperativin nizamnaməsi guya itirilib. Eyni zamanda təhvil alınan möhür «Müəllimlər» MTK-nın möhürü yox, «Müəllim» mənzil istismar kooperativ möhürü kimi qeyd olunmuşdur. Bu o deməkdir ki, bu illər ərzində Ramazanov Səfər tərəfindən sakinlərə verilmiş yaşayış yeri üzrə arayışlar saxta möhürlə verilib. Vergilər Nazirliyinə, icra hakimiyyətinin kooperativlər üzrə idarəsinə və Ədliyyə Nazirliyinə ünvanlanmış sorğulara rəsmi cavabda bildirilir ki, həmin möhür heç bir dövlət qurumunda qeydiyyatdan keçməyib. Bu isə o deməkdir ki, Ramazanov Səfər Müslüm oğlu illər boyu vergilər orqanına heç bir rüsum ödəməyib.

Həmin məsələdən Nəsimi rayon prokurorluğuna, Bakı şəhər prokurorluğuna şikayət verilsə də məsələ ilə bağlı

prokurorluq tərəfindən araşdırma aparılmayıb. 2018-ci ilin oktyabrında sakinlərin Nəsimi rayon məhkəməsinə iddia ərizəsi üzrə işə baxılıb. Əmlak Komitəsinin səlahiyyətli nümayəndəsi məhkəmədə çıxış edərkən bildirib ki, 1965-ci ildə dövlət tərəfindən 188,3 kv.m sahəli zirzəminin tikintisinə büdcədən pul ayrılıb. Lakin bunu təsdiq edən heç bir sənəd məhkəməyə təqdim olunmayıb. Amma pay sahiblərinin təqdim etdikləri sənədlərə əsasən bina 1963-cü ildə inşa edilmiş, 1965-ci ildə isə sakinlərin istismarına verilmişdi. Necə ola bilər ki, hazır tikilmiş binaya sonradan dövlət tərəfindən pul ayrılır. Sakinlərin haqlı iddiası nədənsə məhkəmə tərəfindən ədalətlə araşdırılmayıb və iddia ərizəsi rədd edilib.

Hazırda məsələ ilə bağlı Bakı Apellyasiya Məhkəməsinə şikayət olunub və iş məhkəmənin hakimi Xumar xanım Mərdanovanın icraatındadı.

Şikayətçilər: Nemətova Zarema.Ə, Quliyev Fərid.A., Quliyeva Elvira.U., Dəmirova Elmira.P,,İmanov Neman, Mirzəliyeva Dilbər, Mirzəliyev Xəqani.M., Adilov Emin.İ., Məmmədov İlqar, Məmmədov Aydın, Abdullayev Tofiq.S., Aslanova Kübra.F. tərəfindən”.

Yazıda adları qeyd olunan şəxslər və qurumların da mövqeyinə yer verməyə hazırıq.

Çinarə SEYİDOVA,

 Azinforum.az

Həmçinin oxuyun

“Bakı-Xəbər” qəzetinin redaksiyasında dəyirmi masa keçirildi – FOTO

“Bakı-Xəbər” qəzetinin redaksiyasında Azərbaycanın tanınmış ziyalılarının-İctimai Nəzarət Koalisiyasının baş katibi, Yeni Yazarlar və Sənətçilər İctimai …