Xanımı Nazim Bəydəmirlinin 'kars'a salındığını deyir
Həbsdə olan keçmiş deputat Nazim Bəydəmirlinin ailəsi onun həyatına təhlükə olduğunu düşünür. Xanımı Fəridə Bəydəmirli aprelin 16-da bildirib ki, əri bir neçə gün əvvəl müalicəsi yarımçıq saxlanılaraq Penitensiar Xidmətin Müalicə Müəssisəsindən 13 saylı Cəzaçəkmə Müəssisəsinə göndərilib: "Bu gün məlum olur ki, Nazimi karsa (cərimə kamerası) salıblar. Sabah Nazimin səhmləri ilə bağlı Nizami rayon Məhkəməsində məhkəmə prosesi başlayır. Nə hikmətdirsə, bu gün Nazim karsa salınıb".
Ölkə rəhbərliyinə müraciət edən F.Bəydəmirli səhhəti ağır olan ərinin heç bir səbəb göstərilmədən cəza kamerasına yerləşdirildiyini vurğulayıb.
F.Bəydəmirlinin açıqlamasına Ədliyyə Nazirliyi və başqa rəsmi qurumlardan münasibət almaq mümkün olmayıb.