Qlobal fond birjaları iki gündə 3 trln. dollar itirib

Qlobal fond birjaları iyunun 23-də keçirilən “Brexit” referendumundan sonrakı iki iş günündə 3 trln. dollar itirib.

“Report” xəbər verir ki, bu barədə “Reuters” agentliyi məlumat yayıb. Bildirilib ki, referendumdan sonra dünya üzrə qiymətli kağızların satışı başlanıb. Belə ki, “S&P Global Broad Market” indeksi referendumdan sonra 6,9% azalıb və bu, 2008-ci il maliyyə böhranından sonra ən sərt iki günlük düşüş olub. İndeksə daxil olan şirkətlərin səhmləri 1 trln. dollar zərərə uğrayıb.

Aktivlərin menecmentini həyata keçirən ABŞ-ın TCW şirkətinin analitiki Maykl Reylli (Michael Reylli), “ABŞ maliyyə bazarlarında neqativ əhval-ruhiyyəyə səbəb investorların riskdən qaçmaq istəməsi olub”, deyə bildirib.

Xatırladaq ki, son iki iş günündə inkişaf etmiş ölkılərin fond bazarları 2,8 trln. ABŞ dolları, inkişaf etməkdə olan ölkələrin fond bazarları isə 179 mırd. ABŞ dolları zərər edib.