Bazar , Noyabr 29 2020
Ana səhifə / Kriminal / Prokuror Emin Zeynalova 13 il cəza istədi – 41 milyonluq dələduzluq işi

Prokuror Emin Zeynalova 13 il cəza istədi – 41 milyonluq dələduzluq işi

Bakı Ağır Cinayətlər Məhkəməsində Emin Zeynalovun cinayət işi üzrə məhkəmə iclası davam etdirilib. Hakim Əfqan Hacıyevin sədrliyi ilə keçirilən sonuncu məhkəmə iclasında dövlət ittihamçısı çıxış edib.

Prokuror Emin Zeynalovun törətdiyi əmələ görə 13 il müddətinə azadlıqdan məhrum edilməsini istəyib.

Məlum olub ki, Emin Zeynalov istintaq orqanının müəyyən etdiyi 41 milyon manat zərərdən 4.4 milyon manatını ödəyib.

Prokuror çıxışında Emin Zeynalovun məhkəmə qərarı ilə üzərinə həbs qoyulmuş əmlaklarının müsadirə edilməsini istəyib.

Daha sonra məhkəmə iclasında iştirak edən zərərçəkmişlər prokurorun istədiyi cəzaya münasibət bildiriblər.

Zərərçəkmişlərdən Xalidə Məmmədova ona dəymiş zərərin ödənmədiyini deyib. O bildirib ki, bu iş üzrə ən az zərərçəkmiş şəxsdir. O, ev almaq üçün 143 min 700 dollarını Emin Zeynalova verdiyini deyib.

Xalidə Məmmədova söyləyib ki, əgər zərərçəkmişlər razı olarsa, Emin Zeynalovun üzərinə həbs qoyulmuş mənzili dəymiş zərərin qarşılığında ona verilsin.

Zərərçəkmiş Tamerlan Şeyxzamanovun nümayəndəsi zərərin ödənilmədiyini deyib və qərarı məhkəmənin mülahizəsinə buraxdığını söyləyib.

Digər zərərçəkmiş Elvin Xalıqov pulu Emin Zeynalova vermədiyi üçün ondan şikayətçi olmadığını deyib.

Emin Zeynalova valyuta alış-satışı üçün 750 min dollar verən və sonra da aldadılan İlkin Nuriyev şikayətini geri götürüb.

İş üzrə zərərçəkmişlərdən Fərid Məmmədov da şikayətçi olmadığını deyib. Emin Zeynalova 1 milyon dollar verdiyini bildirən Fərid Məmmədov pulunu geri almasa da hazırda şikayətçi olmadığını söyləyib. O qeyd edib ki, razılaşmaya əsasən Emin Zeynalovla aralarındakı pul məsələsini azadlığa çıxdıqdan sonra həll edəcəklər.

Qeyd edək ki, Fərid Məmmədov Emin Zeynalovun bacısının həyat yoldaşı olub.

Məhkəmədə digər zərərçəkmişlər iştirak etmədiyinə görə proses təxirə salınıb.

Emin Zeynalov məhkəmədəki ifadəsində həbs edilənə qədər ölkədə valyuta bazarına nəzarət etdiyini deyib. Belə ki, onun müəyyən etdiyi məzənnə ilə dollar və digər xarici valyutalar satışa çıxarılırmış.

Emin Zeynalov əlavə edib ki, onun özünün də bir neçə valyutadəyişmə məntəqələri olub. Həmin məntəqələr bankların müxtəlif filiallarında imiş.

Emin Zeynalov ifadəsində deyib ki, hətta bankların bir neçəsi xarici valyutanı ondan alıb-satırmış. Zeynalov bildirib ki, ölkədə ən ucuz qiymətə dollar və digər xarici valyuta satan şəxs olub.

“Valyuta bazarında hamı məni tanıyırdı. Böyük əməliyyatları mən aparırdım. Elə gün olurdu ki, “Günaybank”a bir əməliyyatla 450 min dollar xeyir vermişəm. Hər gün səhər heç kim əməliyyata başlamırdı. Məzənnəni mən müəyyən edirdim. Bundan sonra xarici valyuta satışa çıxarılırdı”- deyə Emin Zeynalov bildirib.

İttihamda yazılır ki, Emin Zeynalov müxtəlif şəxslərdən külli miqdarda pul alıb. Həmin şəxslərə vəd edib ki, bankdan kənar valyuta dəyişməklə qısa zamanda qazanc əldə edəcək, onlara da qazanc verəcək.

İş üzrə zərərçəkmiş şəxslərin sayı 20-dir. Ümumi zərər 41 milyon manatdır.

Törətdiyi əmələ görə ona qarşı Cinayət Məcəlləsinin 178.4-cü maddəsi ilə ittiham irəli sürülüb.

Qeyd edilir ki, E.Zeynalovun pulunu mənimsədiyi şəxslər arasında yüksək vəzifəli məmurların yaxınları da var.

Həmçinin oxuyun

“Qulini snayperlə vurdular” – qatil və sifarişçi haqda sensasion bilgilər

Bu ilin avqust ayının 20-də Antalyadakı hotellərin birində qətlə yetirilən “qanuni oğru” Nadir Səlifovun (Quli …