Nazir ad günü keçirən məktəb direktorunu niyə qovmadı? – Detallar

İctimaiyyət yeni təhsil naziri Emin Əmrullayevdən karantini pozaraq özünə ad günü keçirən məktəb direktoruna daha ağır cəza verəcəyini gözləyirdi.
Sosial media fəalları və vətəndaş cəmiyyəti üzvləri Bakının 187 nömrəli tam orta məktəbinin direktoru Nailə Məmmədovanın işdən azad olunmasını tələb edir.
Reportyor.info xəbər verir ki, təhsil naziri isə məktəb direktoruna yalnız töhmət verməklə məhdudlaşdı. Halbuki, rəhbərlik etdiyi məktəbin şagirdlərinə nümunə olmalı direktor barəsində sərt tədbir görülməliydi.

N.Məmmədova ilk növbədə karantin qaydalarını pozub, şagirdlərə ədəb-ərkan, qayda-qanun öyüd-nəsihəti verən məktəb direktoru özü qanunları tapdalayıb, ən vacib məsələ isə yenicə şəhidlər verən ölkədə özünə şadyanalıq təşkil edib. Bu da işin mənəvi tərəfidir.

Amma görünür ki, təhsil naziri E.Əmrullayev N.Məmmədovaya bata bilməyib və onu vəzifəsindən azad etməyə iqtidarı çatmayıb. Bəzi iddialara görə, məktəb direktorunu himayə edən güclər var.

Bundan əlavə, N.Məmmədovanın məktəb direktorluğundan uzaqlaşdırılmasını şərtləndirən səbəb qalmaqallı reputasiyaya malik olmasıdır. O, mətbuat üçün kifayət qədər məşhur personajdır.
Deputat Etibar Əliyev də bildirib ki, Bakı şəhəri 187 saylı tam orta məktəbin direktoru Nailə Məmmədova vəzifəsindən azad olunmalıdır.
Millət vəkilinin sözlərinə görə, N.Məmmədova bilərəkdən qaydaları pozmaqla saymazlıq nümayiş etdirir. Yada salaq ki, Nailə Məmmədovanın adı dəfələrlə qalmaqallı olaylarda hallanıb.

Bundan əvvəl jurnalisti təhqir etdiyi üçün töhmət almışdı. Həmçinin, N.Məmmədova rüşvət almaqda və sələmçi kimi fəaliyyət göstərməkdə ittiham olunub.
O, amerikapress.com saytının rəhbəri Rauf Sultanovla məhkəmə çəkişməsində olub. Jurnalist ondan rüşvət almağa görə həbs edilib.
Bu haqda mediada uzun müddət məlumatlar dərc olunub. Nailə Məmmədovanın Rauf Sultanovun həbs edilməsi üçün qurulan əməliyyatdan danışdıqları da gündəmdə böyük səs-küy qoparmışdı.
Sitat: “Pulu vermək üçün məni evinə çağırdı, dedi ki, nə içirsən, hazırlayım. Mən dedim ki, heç nə içmirəm, amma başı xəmirli tut arağı istəyirəm, bunu da zarafatla ona dedim.
Məni evində görüşməyə çağırdı. Korrupsiyanın işçiləri gec gəlirdi, bu səbəbdən evdə danışmaqla onun başını qarışdırdım, suallar verməyə başladım. Qapının ağzında yerə yıxdım, üstünə oturdum ki, qaça bilməsin”.

Reportyor.info