Cümə axşamı , Mart 28 2024
Ana səhifə / Kriminal / Məktəbli qızın intiharının dəhşətli təfərrüatı – Oğlanlar təpikləyib, müəllimlər gizlədib

Məktəbli qızın intiharının dəhşətli təfərrüatı – Oğlanlar təpikləyib, müəllimlər gizlədib

Bakı şəhərinin 162 saylı məktəbində baş verən intihar hadisəsinin təfərrüatları məlum olub. Özünü məktəbin üçüncü mərtəbəsindən atan qızcığaz uşaqlara xas olmayan qəddarlığın qurbanı olub. O özünə qapılaraq, intihara əl atıb. 
14 yaşlı Elina Hacıyevanın anası Sevil Hacıyeva Oxu.Az-a qızının intihara əl atmazdan əvvəl ətrafında cərəyan edən hadisələr barədə danışıb.
Onun sözlərinə görə, məktəbli qızı aprelin dördü, 09:11 radələrində özünü məktəbin dördüncü mərtəbəsindən atıb.
Yeniyetmə çoxsaylı ağır xəsarətlər alıb. 12:00-da uşağın anasına zəng edərək baş verən bədbəxt hadisə barədə məlumatlandırıblar.
“Qızınız özünü üçüncü mərtəbədən atıb, ancaq narahat olmayın, hər şey yaxşıdır. Onu Kiliniki xəstəxanaya yerləşdiriblər”, – deyə S.Hacıyevaya bildirilib.
“Həkimlər dedilər ki, onun çanaq sümüyü sınıb, döş qəfəsi əzilib, ağ ciyərləri zədələnib. Ancaq məni yanına buraxmadılar”, – deyə S. Hacıyeva söyləyib.
S.Hacıyeva baş verən hadisənin şokundan əlavə, məktəb müəllimlərindən ünvanına xoşagəlməz sözlər eşidib. Ananı etinadsızlıqda, laqeydlikdə ittiham edirlər.
“Sən demə, qızım biologiya müəllimi Leyla Mixaylovnanın onunla kobud davranması ilə bağlı rəfiqəsinə gileylənibmiş. Bundan heç xəbərim yox idi. Müəllimlə danışmaq istədim, ancaq zənglərimə cavab vermir”, deyən ana qeyd edib ki, övladının problemlərin 203 saylı məktəbdən bu məktəbə keçən andan başlayıb.
162 saylı orta məktəb Hacıyevlərin qaldığı evin yaxınlığında yerləşir, ona görə uşağı elə ora köçürməyi qərara alıbmışlar. Ancaq nədənsə, qız məktəb yoldaşlarının xoşuna gəlməyib. Onu ələ salmağa və müxtəlif aşağılayıcı adlar qoymağa başlayıblar. Sonradan hücumlar daha aqressiv hal alıb.
Elina özünü müdafiə edə bilməyib və nəticədə özünə qapanıb. Həmyaşıdlılarının ona qarşı münasibətindən anasına bir neçə dəfə şikayət edib.
Anası direktorun yanın gedib, məktəbdə baş verənlər, məktəb yoldaşlarının onun qızına qarşı davranışları barədə onunla danışıb. Direktor məsələni araşdırmağa söz versə də, heç bir ölçü götürülməyib.
“Elinanın rəfiqəsi məktəbin tədris şöbəsinin müdiri Lalə Arifovnaya Azərbaycan şöbəsinin 10-11-ci siniflərində oxuyan oğlanların mənim qızımı təpiklədiyini danışıb. Uşaqlar başqalarını da onunla pis rəftara təşviq edib. Şöbə müdiri qızımın rəfiqəsinə tapşırıb ki, bu barədə bizə heç nə deməsin, ona məsələni araşdıracağına söz verib”, – deyə Elinanın anası qeyd edib.
Son iki həftə ərzində Elina dərslərini buraxmağa başlayıb. O, çantasını götürüb, məktəb saatında evdən çıxırmış, vaxtında da evə qayıdırmış.
Ancaq sonradan məlum olub ki, sən demə, bu vaxt ərzində məktəbdə nadir hallarda gözə dəyib. Elina təhsilə olan marağını itirib, kafi və qeyri-kafi qiymətlər almağa başlayıb. Ancaq görünən odur ki, bu, təhsil ocağında az adamı maraqlandırıb.
“Sinif rəhbəri Çimnaz Hacıyeva bir dəfə zəng edib, qızımın haralarda olduğunu, dərslərə niyə gəlmədiyini soruşmayıb. O əlinə qolbaq, qulağına sırğa salanda buna müəllimləri o dəqiqə reaksiya göstərirdi. Ancaq qızıma qarşı belə aqressiv davranışlara və məktəblilərin tərbiyəsizliyinə, nədənsə göz yumublar”, – deyə Hacıyeva gileylənib.
Müəllimlər hər şeydə valideynləri günahlandırır. Halbuki bütün bu xoşagəməz hallar məhz məktəbin ərazisində yaşanıb.
Niyə uşaqlardan başqa heç kim bu rüsvayçılığa reaksiya göstərməyib?
Məktəb və Təhsil Nazirliyinin bu hadisə ilə bağlı göstərəcəyi reaksiya hamıya maraqlıdır.
Yeri gəlmişkən, bu qızın artıq ikinci intihara cəhdi olub. Bir neçə ay əvvəl Elina rəfiqəsi ilə arasında düşən mübahisə ucbatından depressiyada olub. Həmin vaxt valideynləri onunla söhbət aparıb, ona izah ediblər ki, həyat ən böyük dəyərdir və belə ağılsız addımı atmaq olmaz.
Ancaq qızın özünəinam səviyyəsi çox aşağı olub. Məktəbliyə mənəvi yardım göstərmək, onun maraqlarına, istəklərinə hörmətlə yanaşmaq, onu olduğu kimi qəbul etmək əvəzinə, həmyaşıdları ona psixoloji təsir göstəriblər.
Anası Elinanın evə qayıtdığını, tez-tez göz yaşı tökdüyünü görüb. Ancaq nə baş verdiyini soruşanda qısa cavablar verib və təfsilata varmayıb.
S.Hacıyevanın dediyinə görə, qızını çıxarıb yaxınlıqdakı başqa məktəbə köçürməyə çalışsa da, qızının qiymətlərinin ürəkaçan səviyyədə olmamasına və siniflərin dolu olmasına görə onu qəbul etməyiblər.
Özünü pəncərədən aşağı atmazdan qabaq, qız 30 ketotifen (sakitləşdirici və yuxugətirici – red.) həbi içib. Bu o anlama gəlir ki, Elina qəti şəkildə intihar etmək qərarına gəlib. 
Səbail rayon prokurorluğundan Oxu.Az-a verilən məlumata görə, faktla bağlı Azərbaycan Cinayət Məcəlləsinin 125-ci maddəsi (özünü intihar həddinə çatdırma) üzrə cinayət işi açılıb. İlkin istintaq versiyasına görə, hadisə E. Hacıyevanın  bir məktəbdən başqasına keçidi, məhz həmyaşıdlarının ona qarşı olan münasibətləri ilə əlaqədar olub.

Həmçinin oxuyun

3 azyaşlı uşaq anası məhkəmə zalında həbs edildi: əri ondan şikayətçi oldu

Bakının Qaradağ rayonu, Qızıldaş qəsəbəsində həyat yoldaşına balta ilə xəsarət yetirməkdə ittiham olunan Lalə İmaşova …