Kəmaləddin Heydərovun yeni kənd təsərrüfatı şirkəti

«Gilan Holding» müasir suvarma sistemlərinin qurulması işini genişlətmək məqsədilə yeni şirkət qurub. Fövqəladə hallar naziri Kəmaləddin Heydərovun ailəsinə məxsus holdinqin regionlarda min hektarlarla əkin sahəsinin olduğu bildirilir.

Vergilər Nazirliyi martın 13-də «Gilan Pivot» MMC-ni dövlət qeydiyyatına alıb. Şirkətə Rəşid Əliyev direktor təyin edilib.

«Gilan Holding» şirkətlər qrupuna kənd təsərrüfatı sektorunda çalışan 10-dan çox şirkət də daxildir. Bunların bir çoxunun yönəldilməsinə Avropa, Türkiyə və Rusiyadan menecerlər dəvət olunub.

Şoranlaşma təhlükəsi aradan qalxır?

Son illər Azərbaycanda pivot (süni yağış) suvarma sistemi daha böyük torpaq sahələrində tətbiq edilir. Şəmkirdə, Yalamada və başqa bölgələrdə yaradılan yeni aqroparklarda bu tip təsərrüfatdaxili suvarma texnologiyası qurulub. Bu texnologiyadan yararlanmaqla əkin sahəsinin məhsuldarlığını 2-3 dəfə artırmaq mümkündür. Ən əsası, torpaqların şoranlaşma təhlükəsi aradan qalxır.

Sahibkarlığa Kömək Milli Fondunun hazırladığı nümunəvi investisiya layihəsinə görə, 500 hektar sahədə pivot suvarma şəbəkəsinin qurulması təxminən 1 milyon manata başa gəlir. Bir suvarma aqreqatı 50 min manatdan baha deyil.

Azərbaycanda, əsasən, ABŞ-ın «Valmont İrriqation İNC.» şirkətinin Valley pivot suvarma texnologiyası tətbiq olunur. Mövcud sahələrdə pambıq, taxıl, göy noxud, qarğıdalı və digər bitkilər yetişdirilir. (Azadliq.org)