Cümə , Oktyabr 23 2020
Ana səhifə / Kriminal / Fədayə Laçın və digərlərinin məhkəmə prosesi yekunlaşır: prokuror onlara cəza istəyəcək

Fədayə Laçın və digərlərinin məhkəmə prosesi yekunlaşır: prokuror onlara cəza istəyəcək

Müğənni Fədayə Laçın və həbs edilən digər şəxslərin məhkəməsi davam etdirilib.

Musavat.com xəbər verir ki, Bakı Ağır Cinayətlər Məhkəməsində müğənni Fədayə Laçın, Penitensiar xidmətin Konvoy taborunun komandiri, ədliyyə polkovnik-leytenantı Bəhruz Abdullayev, Penitensiar xidmətin üç əməkdaşı – qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov, Əli Ağami, Günay Atakişiyeva, taksi sürücüsü Məhəmməd Hacıyevlə yanaşı, Aqil Nəcəfov, Anar Əsgərov, İsrəfil Soltanov, Şahmar Bəyəlizadə və Tərlan Zeynalovun cinayət işi üzrə məhkəmə iclası keçirilib.

Hakim Azad Məcidovun sədrliyi ilə davam etdirilən prosesdə sənədlərin tətqiqi mərhələsi davam etdirilib. Ötən prosesdə müdafiəçilərin qaldırdıqları vəsatətlər müzakirə olunub və təmin edilməyib.

Fuad Hacıyevin vəkili Elçin Əliyev növbəti dəfə vəsatət qaldıraraq məhkəmə istintaqı dövründə ifadə verən bir neçə şahidin məhkəmədə həmin ifadələrini təkzib etdiyini söyləyib: “Həmin şəxslər ifadələrindəki imzaların onlara aid olmadıqlarını bildirdilər. Buna görə də məhkəmə-xəttşünaslıq ekspertizasının keçirilməsini istəyirik”.

Bu vəsatəti də təmin edilməyən vəkil həmin şahidlərin məhkəmədə yenidən dindirilməsini istəyib. Məhkəmə həmin vəsatəti də təmin etməyib.

Müğənni Fədayə Laçının vəkili Türkel Süleymanlı da vəsatət qaldırıb. O, qeyd edib ki, “Qoca” qatardan qaçarkən istifadə etdiyi açar maddi sübut kimi istintaq orqanından tələb olunsun: “İstintaq dövründə həmin açar barədə ekspertiza rəy verməyib. Hətta istəyirəm ki, məhkəmə hadisə yerinə baxış da keçirsin”.

Təqsirləndirilən Fədayə Laçın vəsatətə münasibət bildirərkən söyləyib ki, Etibar Məmmədov açarı ondan istəyən zaman qatardan qaçacağını deməyib: “Açarı istəyəndə həbsxanada qəfəsin qapısını açacağını demişdi”.

Məhkəmə bu vəsatəti də təmin etməyib. Proses oktyabrın 29-da davam etdiriləcək.

Səs-küylü hadisə ötən il oktyabrın 23-də baş verib. Bakı-Astara-Bakı planlı dəmir yolu qarovulu ilə xüsusi təyinatlı vaqonda Bakı şəhərinə etap olunan xüsusilə ağır cinayətlərlə təqsirləndirilməklə həbs edilmiş “Qoca” ləqəbli Etibar Ələkbər oğlu Məmmədov və Əli Rasim oğlu Ağami Biləcəri qəsəbəsi ərazisində müşayiət altından qaçıblar.

Vəzifə borclarını lazımınca yerinə yetirmədiklərinə görə ədliyyə nazirinin əmri ilə Penitensiar xidmətin Konvoy taborunun komandiri, ədliyyə polkovnik-leytenantı Bəhruz Abdullayev və taborun Qərargah rəisi vəzifəsini icra edən, ədliyyə mayoru Hikmət Sadıqov ədliyyə orqanlarından xaric edilib, taborun 2-ci konvoy bölüyünün komandiri, ədliyyə kapitanı Ruslan Zeynalov, 3-cü bölüyün komandiri, ədliyyə kapitanı Rza Xankişiyev və Qərargah rəisinin konvoy xidməti üzrə baş köməkçisi, ədliyyə kapitanı Rakif Məmmədov tutduqları vəzifədən azad olunublar.

Məhbuslara nəzarət edən qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov saxlanılıb və məhkəmənin qərarı ilə barələrində həbs-qətimkan tədbiri seçilib.

Faktla bağlı Baş Prokurorluğun Ağır Cinayətlərə dair işlər üzrə İstintaq İdarəsində Cinayət Məcəlləsinin 304.2.1-ci (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Bildirək ki, mühafizə altından qaçan Əli Ağami həbs olunub, kriminal aləmdə “Qoca” ləqəbi ilə tanınan Etibar Məmmədov isə hüquq-mühafizə orqanlarının keçirdiyi əməliyyat zamanı öldürülüb. “Qoca” ilə sevgi münasibəti olan müğənni Fədayə Laçın da ona kömək etdiyi üçün həbs edilib. Əli Ağami və “Qoca” adam öldürməyə görə həbs edilmişdilər. Əli Ağami törətdiyi əmələ görə 19 il müddətinə azadlıqdan məhrum edilib.

Həmçinin oxuyun

Bakıda bank işçisindən iş yoldaşına qarşı cinayət — Təfərrüat

Bakıda dələduzluq etməkdə ittiham olunan 1978-ci il təvəllüdlü Səbuhi Əhmədovun cinayət işi üzrə məhkəmə prosesi …