Cümə , İyun 21 2019
Ana səhifə / Kriminal / Fədayə Laçın və digərlərinin cinayət işi: “ağsaqqal” deyilən şəxs kim olub?

Fədayə Laçın və digərlərinin cinayət işi: “ağsaqqal” deyilən şəxs kim olub?

Müğənni Fədayə Laçın və həbs edilən digər şəxslərin məhkəməsi davam etdirilib.

Musavat.com xəbər verir ki, Bakı Ağır Cinayətlər Məhkəməsində müğənni Fədayə Laçın, Penitensiar xidmətin Konvoy taborunun komandiri, ədliyyə polkovnik-leytenantı Bəhruz Abdullayev, Penitensiar xidmətin üç əməkdaşı – qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov, Əli Ağami, Günay Atakişiyeva, taksi sürücüsü Məhəmməd Hacıyevlə yanaşı, Aqil Nəcəfov, Anar Əsgərov, İsrəfil Soltanov, Şahmar Bəyəlizadə və Tərlan Zeynalovun cinayət işi üzrə məhkəmə iclası keçirilib.

Hakim Azad Məcidovun sədrliyi ilə davam etdirilən prosesdə şahid qismində Firuz Qasımov ifadə verib. Penitensiar Xidmətin Konvoy taborunun keçmiş əməkdaşı olduğunu deyən şahid bu işlə heç bir əlaqəsinin olmadığını deyib.

O, söyləyib ki, istintaq dövründə onu çağırıb, bir neçə sual veriblər: “Həmin vaxt da pensiyada olmuşam. Sualların çoxu da yadımda deyil. “Qoca” Lənkərana aparılarkən qaravul rəisi olmamışam”.

Verilən suallardan məlum olub ki, F.Qasımovun Konvoy taborunun digər əməkdaşları ilə telefon danışıqları zamanı “ağsaqqal” sözünü çox işlədib. Həmçinin digər əməkdaşlar da “ağsaqqal” sözünü işlədirmiş. İstintaq da bunu aydınlaşdırmaq istəyib ki, “ağsaqqal” kimdir?

Suallara cavab verən F.Qasımov “özümüzdən böyüklərə ağsaqqal deyirdik” cavabını verib. Bildirək ki, əvvəlki məhkəmələrdə də konvoy işçilərinin telefonda “ağsaqqal” sözü işlətdiyi üzə çıxmışdı. Məlumata görə, Həmin şəxs həbs edilən polkovnik Bəhruz Abdullayev olub. Amma konvoy işçiləri bunu inkar ediblər.

Hakim söyləyib ki, Bakı İstintaq Təcridxanasına sorğu göndəriləcək: “Hadisədən əvvəl Etibar Məmmədov Fədayə Laçınla telefonla danışıb. Bunu da araşdıraq görək ki, o, telefonu necə əldə edib”.

Məhkəməyə gəlməyən şahidlər barəsində məcburi gətirilmə qərarı çıxarılıb.

Məhkəmə prosesi oktyabrın 3-də davam etdiriləcək.

Səs-küylü hadisə ötən il oktyabrın 23-də baş verib. Bakı-Astara-Bakı planlı dəmir yolu qarovulu ilə xüsusi təyinatlı vaqonda Bakı şəhərinə etap olunan xüsusilə ağır cinayətlərlə təqsirləndirilməklə həbs edilmiş “Qoca” ləqəbli Etibar Ələkbər oğlu Məmmədov və Əli Rasim oğlu Ağami Biləcəri qəsəbəsi ərazisində müşayiət altından qaçıblar.

Vəzifə borclarını lazımınca yerinə yetirmədiklərinə görə ədliyyə nazirinin əmri ilə Penitensiar xidmətin Konvoy taborunun komandiri, ədliyyə polkovnik-leytenantı Bəhruz Abdullayev və taborun Qərargah rəisi vəzifəsini icra edən, ədliyyə mayoru Hikmət Sadıqov ədliyyə orqanlarından xaric edilib, taborun 2-ci konvoy bölüyünün komandiri, ədliyyə kapitanı Ruslan Zeynalov, 3-cü bölüyün komandiri, ədliyyə kapitanı Rza Xankişiyev və Qərargah rəisinin konvoy xidməti üzrə baş köməkçisi, ədliyyə kapitanı Rakif Məmmədov tutduqları vəzifədən azad olunublar.

Məhbuslara nəzarət edən qarovul rəisi Ceyhun Səmədov, qarovul rəisinin müavini Fuad Hacıyev və qarovul rəisinin digər müavini Tural Poladxanov saxlanılıb və məhkəmənin qərarı ilə barələrində həbs qətimkan tədbiri seçilib.

Faktla bağlı Baş Prokurorluğun Ağır cinayətlərə dair işlər üzrə istintaq idarəsində Cinayət Məcəlləsinin 304.2.1 (qabaqcadan əlbir olan bir qrup şəxs tərəfindən azadlıqdan məhrum etmə və ya həbs yerindən, yaxud mühafizə altından qaçma) və 308.2-ci (vəzifə səlahiyyətlərindən sui-istifadə ağır nəticələrə səbəb olduqda) maddələri ilə cinayət işi başlanmaqla istintaq qrupu yaradılıb, dərhal təxirəsalınmaz istintaq hərəkətləri aparılıb.

Bildirək ki, mühafizə altından qaçan Əli Ağami həbs olunub, kriminal aləmdə “Qoca” ləqəbi ilə tanınan Etibar Məmmədov isə hüquq-mühafizə orqanlarının keçirdiyi əməliyyat zamanı öldürülüb. “Qoca” ilə sevgi münasibəti olan müğənni Fədayə Laçın da ona kömək etdiyi üçün həbs edilib. Əli Ağami və “Qoca” adam öldürməyə görə həbs edilmişdilər. Əli Ağami törətdiyi əmələ görə 19 il müddətinə azadlıqdan məhrum edilib.

Həmçinin oxuyun

Bakıda ağır qəza: Maşın səkidə dayanan kişiyə çırpıldı (FOTO)

Bakıda yol qəzası baş verib.  Azinforum.az “Report”a istinadən xəbər verir ki,  hadisə Yasamal rayonunda, Şərifzadə küçəsində qeydə alınıb.  …