Azinforum.az İnformasiya Portalı Onlayn Xəbər Portalı
Fevralın 16-da səhər saatlarında Bakının Binəqədi rayonunun 8-ci mikrorayonu ərazisindəki zibil qutularından birində hissələrə bölünmüş cəsədi tapılmış qadının qatili eyni vaxtda bıçaq və balta ilə silahlanıb. Bu barədə Bakı şəhər prokurorluğundan məlumat verilib.
Qeyd edək ki, sakinlər bu gün səhər saat 08:00-da zibil qutusunda hissələrə parçalanaraq sellofan torbaya yığılmış qadın cəsədi aşkarlayıblar. Hazırda hüquq-mühafizə orqanlarının əməkdaşları qətlə yetirilmiş qadının şəxsiyyətini müəyyənləşdirməyə çalışırlar. Ehtimala görə, qətl mənzildə törədilib. Qatil şübhə doğurmamaq üçün meyiti hissələrə ayıraraq torbalara yığıb və zibil qutusuna atıb.
O da məlum olub ki, qəddarcasına törədilmiş qətlin qurbanı ilkin ehtimala görə, 50-60 yaşlarda qadındır. İlkin məhkəmə-tibbi ekspertizanın rəyinə görə, qətl sonuncu sutka ərzində, daha doğrusu fevralın 15-dən 16-na keçən gecə baş verib. Qətldən dərhal sonra qatil cəsəddən qurtulub.
Cəsəd səliqə ilə 10-20 sm-lik xırda parçalara doğranıb. Bu isə qatil kişinin peşəkar qəssab olduğunu ehtimal etməyə əsas verir. Qatil başı bədəndən ayırıb, amma qurbanının üzünə toxunmayıb. Bu isə qadının tanınması və şəxsiyyətinin müəyyən edilməsi şansını artırır. Onun tapılmayan yeganə orqanı əlidir. Görünür, qatil istintaqın qadının şəxsiyyətini barmaq izlərinin köməyilə müəyyənləşdirəcəyindən ehtiyatlanaraq, onun əllərini gizlədib.
Qətllə əlaqədar olaraq, AR Cinayət Məcəlləsinin 120-ci maddəsi ilə cinayət işi açılıb.
