Bakıda erməni əsgərlərin məhkəməsi başlayır

Azərbaycan dövlət sərhədini pozmaqda təqsirləndirilən erməni əsgərlər – Ovagimyan Arutyun Yurikoviç və Kazaryan Karen Aşotoviçin məhkəməsi başlayır.

Bu gün, iyunun 3-də Sumqayıt Ağır Cinayətlər Məhkəməsində keçiriləcək prosesə hakim Fəhmin Hümbətov sədrlik edəcək.

Ermənistan vətəndaşları olan hərbi qulluqçular bu il mayın 26-sı saat 19 radələrində Zəngilan istiqamətində saxlanılıblar. Onlar diversiyada təqsirləndirilirlər. 

Erməni əsgərlərinə silah qaçaqmalçılığı, terrorçuluq, Azərbaycanın dövlət sərhədini qanunsuz keçmə və digər maddələrlə ittihamlar irəli sürülüb.

Ermənistan tərəfi ittihamları rədd edir. 

Qeyd edək ki, bu ilin aprel ayında da Ermənistanda azərbaycanlı hərbi qulluqçular saxlanılmış və məhkəməmin qərarıyla onlara uzunmüddətli həbs cəzaları kəsilmişdi. Azərbaycan Müdafiə Nazirliyi iki hərbçinin – 2004-cü il təvəllüdlü Aqşin Bəbirov və 2003-cü il təvəllüdlü Hüseyn Axundovun Naxçıvanın Şahbuz rayonunda əlverişsiz hava şəaitinə görə yolda istiqaməti azaraq itkin düşdüyünü açıqlamış və Ermənistan tərəfinin əsgərləri qanunsuz olaraq həbs etməkdə ittiham etmişdi.