Cümə axşamı , Mart 28 2024
Ana səhifə / Kriminal / Azərbaycanlı iş adamı sifarişlə necə öldürülüb?

Azərbaycanlı iş adamı sifarişlə necə öldürülüb?

2019-cu ildə Rusiyanın Arxangelsk şəhərində öldürülən 27 yaşlı azərbaycanlı iş adamı Hüseynov Ruslan Arif oğlunun qətlinin sifarişli olduğu müəyyənləşib.

Şəki Ağır Cinayətlər məhkəməsində keçirilən prosesdə Varis Səmədov, Məhəmməd Lətifov və Şahin Qasımzadəyə hökm oxunub.

Qətlin təşkilatçısı Varis Səmədov 16 il 6 ay, Məhəmməd Lətifov 15 il, Şahin Qasımzadə isə 15 il 6 ay müddətinə azadlıqdan məhrum edilib.

Cinayət hadisəsinə gəlincə, Ağdaşda “Taxta-şalban Məhəmməd” kimi tanınan iş adamı Məhəmməd Əliyev 2018-ci ildə Ruslan Hüseynovun qardaşı Rauf Hüseynovla iş anlaşması əldə edib. Razılaşmaya görə, Rauf Hüseynov Məhəmməd Əliyevdən 45.700.000 rubl alıb. Bu pulun qarşılığında Rauf Məhəmməd Əliyevə 18.000 m3 taxta materiallarını göndərməli olsa da, sadəcə, 14.459.320 rubl dəyərində mal göndərib. Müqavilənin bitməsinə baxmayaraq, Rauf Hüseynov malın qalananı göndərməyib. Nəticədə tərəflər arasında mübahisə düşüb.

Məhəmməd Əliyev ofisində telefonla Rauf Hüseynovla mübahiə edən zaman bunu Varis Səmədov eşidib. O, bu işi öz üzərinə götürərək məsələni həll edəcəyini bildirib.

Bundan öncə isə, Məhəmməd Əliyev Rauf Hüseynovun rəhbəri olduğu şirkətin əsl sahibi, onun keçmiş həyat yoldaşı İnci Abbasova ilə görüşüb. İş adamının ofisində görüş zamanı İ.Abbasova əri ilə danışacağını, borcun qaytarılması üçün köməklik edəcəyini bildirib. Lakin qısa müddət sonra Rauf Hüseynovun pulu qaytarmaq barədə düşünmədiyini bildirib. Bu zaman İnci Abbasova Məhəmməd Əliyevə keçmiş həyat yoldaşı Rauf Hüseynov və qardaşı Ruslan Hüseynovla birgə intim münasibətdə olarkən lentə aldığı video və fotoları təqdim edib.

Fotoda iş adamı Məhəmməd Əliyev

Bundan sonra, Varis Səmədov Rauf Hüseynovu +18 görüntülərlə şantaj edib və pulu qaytarmayacağı halda video və fotoların həm Ağdaşda, həm də Rusiyada yayılacağını, qohumlarına göstərəciyini bildirib. Lakin Varis Səmədov bu üsulla məqsədinə nail ola bilmədiyini görüb, hədə-qorxu ilə tələb etməklə bağlı cinayət əməlini davam etdirərək, 2018-ci ilin noyabr ayında Ağdaş rayonu ərazisində istintaqla müəyyən edilməyən gündə və məkanda qohumu, əvvəllər dəfələrlə məhkum olunmuş, 2019-cu ildə isə vəfat edən Rufan Səmədovla görüşüb. O, görüş zamanı istintaqa məlum olmayan məbləğdə pul verəcəyini Rauf Hüseynovda qorxu yaratmaq məqsədilə qardaşı Ruslan Hüseynovun öldürülməsini Rufan Səmədova sifariş verib.

R.Səmədov 2019-cu ildə Ağdaş rayonu, Qumlax kəndi yaxınlığında İntiqam Hüseynzadə ilə görüşüb və onu cinayətin törədilməsinə cəlb edib. O, eyni zamanda, qohumluq əlaqəsində olduğu Məhəmməd Lətifovla da əlaqə yaradıb və qətlin vaxtı, yeri barədə müzakirə aparıblar. Bundan sonra İntiqamla Məhəmməd Rusiyaya yollanıb. Onlar qətldə istifadə olunan tapançanı da Moskvadan alıblar.

Cinayət əməlinin davamı olaraq, əldə ediən avtomobillə Arxangelsk vilayətinin Nyandoma və Karqopol rayonlarında hərəkət edərək Ruslan Hüseynovun hərəkət qrafikini və gedib-gəldiyi yerləri dəqiqləşdirməyə başlayıblar. Bundan sonra, Şahin Qasımzadəyə zəng edərək cinayətin icraçısının tapılması üçün kömək istəyiblər. Şahin isə öz növbəsində Belarusun Qomel şəhərində yaşayan, kriminal qruplaşmaların üzvü kimi tanınan Ruslan Tarasovla əlaqəyə çıxıb. Ruslan Tarasova qətlin sifarişi üçün 15 min dollar vəd edilib.

Tarasov isə Hüseynovun hərəkət etdiyi avtomobil yolunda qalıb mövqe tutmağa başlayıb. Daha sonra adaşının gəldiyini görərək, ona yaxınlaşıb və 3 dəfə ardıcıl atəş açmaqla onu qətlə yetirib.

Bundan sonra, Ruslan Tarasov Rusiya hüquq-mühafizə orqanının əməkdaşları tərəfindən saxlanılıb və o sifarişlə yerinə yetirdiyi qətlə görə ona vəd edilən pulu ala bilməyib. Onunla yanaşı, İntiqam Hüseynzadə də Rusiyada həbsdədir.

Qeyd edək ki, məhkəmə istintaqı zamanı Ruslan Hüseynovun qardaşı Rauf Hüseynov ifadəsində ilkin olaraq təqsirləndirilən şəxslərə qarşı heç bir şikayət və tələbinin olmadığını, onlarla barışdığını bildirib və əlavə olaraq hazırda pisixoloji vəziyyəti ilə bağlı müalicə aldığından, baş vermiş hadisələri xatırlamığını qeyd edib.

R.Hüseynov ona ünvanlanan sualları cavablandırarkən bildirib ki, Məhəmməd Əliyevlə taxta-şalban materiallarından ibarət olan ticarətləri olub, bununla bağlı aralarında ticarət müqaviləsi bağlanılıb və Rusiyadan ona mal yollayıb. O qeyd edib ki, M.Əliyevdən aldığı pulu material aldığı şəxslərə verib, həmin insanlar da onu aldadaraq pulu qaytarmayıb. Mərhumun qardaşı pulun batdığını dilə gətirib. O, cinayətin sifarişçisi Varis Səmədovu tanımadığını, onun tərəfindən hədələnmədiyini də bildirib. O, hazırda boşandığı arvadının çəkdiyi görüntüləri də xatırlamadığını, hazırda qardaşı ilə bağlı hadisədən sonra psixoloji problemlər yaşadığını söyləyib.

Qafqazinfo

Həmçinin oxuyun

3 azyaşlı uşaq anası məhkəmə zalında həbs edildi: əri ondan şikayətçi oldu

Bakının Qaradağ rayonu, Qızıldaş qəsəbəsində həyat yoldaşına balta ilə xəsarət yetirməkdə ittiham olunan Lalə İmaşova …