Azinforum.az İnformasiya Portalı Onlayn Xəbər Portalı
Kənd təsərrüfatı mülkiyyətçilərinə maliyyə dəstəyini artırmaq və bu sahədə çalışan insanların kredit əldə etmək imkanlarını daha da asanlaşdırmaq üçün mərkəzləşdirilmiş ixtisaslı bank qurumu yaratmaq nəzərdə tutulur.
«Kənd təsərrüfatı kooperasiyası haqqında» Qanunda dövlətin aqrar sahəyə dəstəyini artırmaq üçün kredit zəmanəti fondunun yaradılması öz əksini tapıb. Məqsəd yeni kooperativlərə güzəştli şərtlərlə kreditləşmənin təmin olunmasıdır.
Milli Məclisin Aqrar siyasət komitəsinin sədri Eldar İbrahimov bildirib ki, kənd təsərrüfatına daha çox universal banklar xidmət göstərməlidir. Hazırda hökümət tərəfindən aqrar sahəyə maliyyə dəstəyi ilə bağlı dövlət və özəl olmaqla, müxtəlif formada maliyyə dəstəyi göstərilir. Sahibkarlığa Kömək Milli Fondu və Kənd Təsərrüfatı Nazirliyi yanında Kredit Agentliyi mülkiyyətçilərə güzəştli kreditlər verir. Bunlarla yanaşı, regionlarda mikromaliyyələşdirmə təşkilatları da fəaliyyət göstərir: «Bu gün Azərbaycan iqtisadiyyatı qarşısında duran böyük hədəflərə çatmaqda kənd təsərrüfatı əhəmiyyətli rol oynayır. Amma ölkənin müasir inkişafı və kənd təsərrüfatının potensialı maliyyələşmənin artırılmasını tələb edir. Ölkə əhalisinin 40 faizi kənd təsərrüfatı sahəsində çalışır və onların sayı 4,5 milyon nəfər olan iqtisadi fəal əhalinin 80 faizini təşkil edir. Ona görə də kənd təsərrüfatı mülkiyyətçiləri üçün ayrıca güzəştli şərtlərlə kredit siyasətini həyata keçirən banka ehtitac var. Kommersiya bankları mülkiyyətçilərə kredit vermək istəmir. Kəndlinin torpaqdan başqa elə bir qiymətli əmlakı yoxdur, banklar isə onu girov kimi qəbul etmək istəmir. Buna görə də kommersiya xarakterli maliyyələşdirmə ilə bağlı uyğun mexanizm tapılmalıdır. Bu məqsədlə Zəmanət Fondunun yaradılması nəzərdə tutlur. Fond torpağı girov kimi qəbul edəcək, fermer krediti qaytara bilmədikdə torpağa sahib olacaq. Bank məsələsinə gəlincə, bu, müsbət addım olardı. Hazırda kənd təsərrüfatı mülkiyyətçiləri üçün «Aqrarkredit» qeyri-bank təkşilatı fəaliyyət göstərir. Onun bazasında ixtisaslaşmış bank yaratmaq mümkündür».
Mərkəzi Bankın sədr müavini Aftandil Babayevin bildirdiyinə görə, ixtisaslaşdırılmış aqrar bankın yaradılması gündəmdədir və bunun üçün iqtisadi mexanizmlər mövcuddur. Əvvəlcə bankın kommersiya xarakterli, yaxud dövlət bankı olması məsələsi müəyyən olunmalıdır, sonra isə bu maliyyə strukturunun yaradılması potensialına baxmaq mümkündür. Burada bir neçə variant təklif olunur. Təkliflərdən biri budur ki, «Aqrarkredit» Qapalı Səhmdar Cəmiyyəti bank olmayan kredit təşkilatının bazasında bank yaradılsın. Qeyd edək ki, bir neçə il əvvəl ölkəmizdə kənd təsərrüfatının maliyyələşməsi ilə məşğul olan Aqrar-Sənaye Bankı mövcud idi, sonradan həmin bank ləğv olundu və onun hüquqi varisi kimi “Aqrarkredit” kredit təşkilatı yaradıldı. Bu qurum neçə ildir ki, aqrar sahəyə maliyyə dəstəyi göstərir, təşkilatın fəaliyyətini genişləndirib banka çevirmək mümkün hesab olunur. Bu məqsədlə Türkiyə, İspaniya və Hindistanın təcrübəsi öyrənilir.
Azərbaycan Mikromaliyyə Assosiasiyasının icraçı direktoru Jalə Hacıyeva bildirib ki, kənd təsərrüfatı üzrə Zəmanət Fondunun yaradılması ilə yanaşı, həmin sahədə sığorta mexanizminin tətbiqi də təmin edilməlidir. Kənd yerlərində evlər və torpaqlar, əkinçilik və heyvandarlıq kompleksləri də sığorta olunmalıdır. Bundan sonra Zəmanət Fondunun fermerə zəmanət məktubu verməsi üçün əsas yarana bilər. Sığorta ilə bağlı problemlər həll olunarsa və uğurlu işlək mexanizm qurularsa, getdikcə kənd təsərrüfatı ilə məşğul olanların da sayı artar və dövlət vəsaitinin səmərəli istifadəsi üçün əlverişli zəmin yaranar.(fins.az)
