Mahal İsmayıloğlunun qızı Ayan: “Varlığı nə qədər xoş idisə, yoxluğu bir o qədər incitdi…”

Avqustun 28-də tanınmış jurnalist, “Xalq qəzeti”nin sabiq baş redaktoru Mahal İsmayıloğlunun ölümündən bir il ötür. Avqustun qora bişirən günlərindən birində, qızı Ayan zəng edib xəbər vermişdi redaksiyaya onun ölümünü. Atasının telefonundan… Bizimkilər də həmin nömrədən gələn zəngi görəndə hər zamankı kimi sevinclə açmışdılar telefonu:

“Əfəndim, Mahal bəy… Eşidirik sizi…” Amma dəstəyin o biri ucunda ağlayan bir qızın səsi gəlirdi. “Atam yoxdur artıq…”

Sabah ailəsinin də, Azərbaycan mediasının da Mahal bəyi itirməsindən 1 il keçir. Bu 1 ildə mətbuat onun bir çox qatı açılmamış kəlamları, köşələri ilə tanış ola bilərdi. Ailəsi onunla bir çox sevincini, gözəl anlarını paylaşa bilərdi. Yaşaya, əzizlərinə daha xoş anlar, günlər yaşada da bilərdi…

Yenə qızı Ayan danışdı bizimlə. Mahal bəysiz keçən bir ilin özətini beləcə verir: “Bu bir il ailəmiz üçün çox acı keçdi. Əzablı, əziyyət dolu keçdi. Varlığı bizi nə qədər xoşbəxt edirdisə, yoxluğu incitdi. Hər səhər evimizdə söhbəti gedir. Ən çox xoş zarafatlarını yada salırıq. Hər səhər anamla onu xatırlayırıq. İnanın ki, bu insanın bir pis cəhəti də düşmür yadımıza. Bizi sıxan, xətrimizə dəyən heç bir cəhəti olmayıb. Nəyləsə bağlı əsəbləşəndə də bunu bizə biruzə verməyib, əksinə, bizimlə danışmağı, bunu bildirməməyə çalışıb”.

Ayan atasız keçən bir ildə bəzi qohumlarının laqeydliyindən, mətbuatın, onun həmkarlarının soyuqluğundan şikayətləndi: “Atamın öz tərəfi laqeyd oldu. İstəməzdik ki, belə laqeyd olsunlar. Dostları da laqeyd oldu. Atam sıradan bir itki deyildi. Onu təkcə ailəsi yox, media itirdi. Ona görə də xatırlanmasını çox istəyərdik”.

M.İsmayıloğlunun məzarı Ramana qəbiristanlığındadır. Ailəsi bu bir ildə tez-tez onu ziyarət edib. İl mərasimi isə Bakı şəhəri Binəqədi rayonu, Əcəmi Naxçıvan küçəsi 18 A ünvanında baş tutacaq. Mərasimlə bağlı əlavə məlumat almaq istəyənlər isə 051 560 80 50 telefon nömrəsi və [email protected] ailto:[email protected] ünvanı ilə əlaqə saxlaya bilərlər.

“Yeni Müsavat” isə xatırladır ki, son 19 ildə xəstəlik tanınmış jurnalistin yaxasından əl çəkməyib. İlk əməliyyat 1998-ci ildə noyabrın 2-də Ankara nümunəvi xəstəxanasında baş verib. Həmin vaxt ürəyinin 1 damarı dəyişdirilib. 2003-cü ilin aprel ayında mykadi infarkt keçirib. 2004-cü ildə üryinin 4 damarından baypas əməliyyatı keçirib. 2010-cu ildə yenə ürəyindən ağır cərrahiyyə əməliyyatı keçirib. Ürəyinin 6 damarı dəyişdirilib.

2013-cü ildə isə daha bir ağır xəstəlik – böyrək çatışmazlığı da onda baş qaldırıb. Bütün cəhdlərə baxmayaraq müalicə mümkün olmayıb. 2014-cü ilin aprel ayında Türkiyədə sağ böyrəyi əməliyyatla götürülüb. Tezliklə eyni xəstəlik daha davamlı şəkildə sol böyrəkdə yaranıb. Böyrək çatışmazlığı ilə yaşamağa məcbur olub…

Həkimlər ona böyrək probleminin gizli şəkildə özünü göstərdiyini bildiriblər. Ailəsinə böyrəyində kista olduğu deyilib, xərçəng barədə məlumat verilməyib. M.İsmayıloğlu ölən günə qədər böyrəyində xərçəng olduğunu bilməyib.