Çərşənbə axşamı , Mart 19 2024
Ana səhifə / Köşə Yazarları / Gecəqonduda yaşayan deputatlar

Gecəqonduda yaşayan deputatlar

Evi olmayan deputatlara verilən kirayə haqqının qaldırılmasını təklif edən Razi Nurullayev cəmiyyətin reaksiyasından narazıdır. Razi müəllim deyir ki, cəmiyyətdə millət vəkilləriylə bağlı yanlış təsəvvür formalaşıb: “Elə bilirlər ki, deputatlar yağ-bal içində yaşayırlar. Halbuki qayğılarımız başımızdan aşır”.

Dünəndən bəri xalq kirayədə qalan deputatların kimliyini araşdırır. Jurnalist həmkarlarım sağ olsunlar, cəmiyyəti intizardan qurtardılar. Məlum oldu ki, 10 deputat Bakıda kirayədə yaşayır. Sən demə, Milli Məclis Cəbi Quliyev, Ülviyyə Həmzəyeva, Müşfiq Cəfərov, Pərvin Kərimzadə, Ramil Həsən, Anar Məmmədov və onların bir neçə həmkarına hər ay 200 manat kirayəhaqqı ödəyir. 

Əl tutmaq Əlidən qalıb. Dövlətimiz də deputatlarımıza əl tutur. Nahaq deməyiblər ki, verən əli qaytarmazlar. Görünür, vəkillərimiz bunu bildikləri üçün dövlətin verdiyi 200 manatdan imtina etməyiblər. Ehtiyacları olsa da, olmasa da o 200 manatı hər ay alıb ciblərinə qoyublar. Əgər Razi müəllim həmkarlarına canıyananlıq etməsəydi, bizim heç vaxt bu 200 manatdan xəbərimiz olmayacaqdı…

Dünəndən bəri Azərbaycan xalqı bu suala cavab tapmaq üçün “baş sındırır”: Hörmətli deputatlarımızı Bakıda 200 manata harda kirayədə qalırlar?

Jurnalist marağı güc gəldiyi üçün mən də bu məsələ ilə maraqlandım. “Makler” tanışım dedi ki, 200 manata Binəqədidə gecəqondu tapmaq mümkündür. Sadəcə, həmin evlər ümumi həyətdə yerləşir. Yəni darvazanı açıb həyətə girəndə 10-15 ailənin eyni məkanda yaşadığının şahidi olursan. Həmin evlərin çoxunda hamam və tualet ümumi olur. Bu isə o deməkdir ki, ümumi həyətdə 10-15 ailə ilə bir yerdə qalan deputatlarımız 30-40 nəfərlə eyni hamam və tualeti bölüşürlər…

Mən bunda pis heç nə görmürəm. Biz 1993-cü ildə Cəbrayıldan didərgin düşəndə Bakıda heç bir şəraiti olmayan darısqal bir yataqxanada məskunlaşmışdıq. 17 ailənin bir hamamı, bir tualeti vardı. Bu üzdən orta məktəbdə oxuyan uşaqlar hər gün dərsə gecikirdilər.

Mən dövlətdən hər ay 200 manat kirayə pulu alan deputatlarımızın Binəqədidə kirayədə qalmağını alqışlayıram. Onlar xalqa yaxın olduqları üçün bu məkanı seçiblər. Əgər göydələndə qalsaydılar hamımız deyəcəkdik ki, xalqa üstdən aşağı baxırlar. Bir halda ki, onlar bizə üstdən aşağı baxmırlar, gecəqonduda qaldıqları üçün biz niyə onlara altdan yuxarı baxaq?!

Dövlətin kirayədə qalmaq üçün deputatlara verdiyi 200 manatın artırılmasına isə ehtiyac yoxdur. Yoxsa, bahalı evlərdə qalıb xalqdan uzaq düşərlər…

Seymur VERDİZADƏ

Həmçinin oxuyun

Jurnalistləri noqdauna salan gənc, xanım direktor…

Təhsildə vəziyyət bərbaddır. Bunun əksini kimsə sübut edə bilməz. Xüsusilə də paytaxt məktəbləri direktorlar üçün …