Cümə axşamı , Mart 28 2024
Ana səhifə / Köşə Yazarları / “Efirdə aparıcının unitazda oturması…” – MTRŞ-dan reaksiya

“Efirdə aparıcının unitazda oturması…” – MTRŞ-dan reaksiya

“Hər dəfə bildiririk ki, yayımçılar Azərbaycanın tamaşaçı auditoriyasının həssaslığını nəzərə almalıdır. Efirdə aparıcının unitazda formal olaraq, oturması və ya tualet mövzusunda danışması qanunla qadağan deyil. Amma ümumilikdə milli mentalitet, azərbaycanlı tamaşaçısının həssaslığı baxımından bu, yersiz hərəkət idi. Yerli yayımçılar bunu nəzərə almalıdır”.  

Bunu  Milli Televiziya və Radio Şurasının (MTRŞ) Monitorinq şöbəsinin müdiri Təvəkkül Dadaşov deyib.

O qeyd edib ki, ola bilsin, yayımçı bununla diqqət çəkmək, eksperiment etmək istəyib:

“Lakin bunun doğuracağı reaksiyanı nəzərə almayıb. Əlbəttə, milli efirin monotonluğu, yeknəsəqliyi, eksperimentlərdən uzaqlığı məqbul deyil, amma bununla bərabər, tamaşaçını qıcıqlandıracaq addımlara da yol vermək olmaz. “Ferma” realiti-şousunda mütəmadi baş verən qalmaqallar da xoşagələn deyil və tənqidlərə tuş gəlir. Bu da onu deməyə əsas verir ki, ssenaridə, formatda müəyyən dəyişikliklər edilməlidir.

Biz yaradıcı işə müdaxilə etmirik. Amma tamaşaçının xoşuna gəlməyən hala müxtəlif formada reaksiya verməsinin də qarşısını ala bilmərik. Hazırda ölkə əhalisinin 75 faizinin internetə, bununla da sosial şəbəkələrə çıxış imkanı var. Sosial şəbəkələrdə, mediada kütləvi şəkildə tənqidlər yer alırsa, bu zaman müvafiq olaraq, yayımçı da, tənzimləyici qurum da məsələyə laqeyd qala bilmir. Bu baxımdan yayımçılar ehtiyatlı olmalıdır. Baş verən hallarla bağlı kanal təmsilçiləri ilə müvafiq səviyyədə müzakirələr aparılıb. Ümid edirik ki, gələcəkdə bu cür hallar olmayacaq”.

Qeyd edək ki, yuxarıda qeyd olunan məsələ ARB telekanalında yayımlanan proqramda baş verib.

APA

 

Həmçinin oxuyun

Jurnalistləri noqdauna salan gənc, xanım direktor…

Təhsildə vəziyyət bərbaddır. Bunun əksini kimsə sübut edə bilməz. Xüsusilə də paytaxt məktəbləri direktorlar üçün …

Bir cavab yazın