Həbsdə olan jam.az saytının baş redaktoru Fikrət Fərəməzoğlunun ailəsinin İran səfirliyinə sığınması barədə xəbər vermişdik. Bu barədə jurnalistin həyat yoldaşı Faiqə Nosrati öz facebook səhifəsində məlumat yaymışdı.
F.Nosrati hətta qəzetimizə açıqlamasında yaşadığı mənzilin səfirlik əməkdaşları tərəfindən mühafizə olunduğunu və yaşayış ünvanına kamera quraşdırıldığını bildirmişdi. Bununla bağlı apardığımız araşdırmaların sonunda jurnalistin həyat yoldaşının yaydığı xəbərin doğru olmadığı üzə çıxdı.
Məlum oldu ki, İran vətəndaşı olan F.Nosrati sığınacaq üçün ümumiyyətlə, səfirliyə müraciət etməyib. İlk xəbəri yaydığımız zaman səfirliklə əlaqə saxlaya bilməsək də, bu dəfə bunu etmək mümkün oldu.
İran səfirliyindən F.Nosratinin yaydığı xəbərin dezinformasiya olduğunu bildirərək, Fərəməzoğlu ailəsi tərəfindən sığınacaqla bağlı səfirliyə müraciətin daxil olmadığını qeyd etdilər.
Musavat.com