ANS TV ARXİVLƏRİNİ AÇDI – FOTOLAR

ANS TV-nin yaratdığı arxiv videolar dünya televiziya aləmində yeni bir sistemdir.

ANS Şirkətlər Qrupunun vitse-prezidentiMir Şahin ANS-in tarixindən danışaraq, çəkilişlər zamanı başına gələn kadrarxası bəzi olayları xatırladıb və bu layihəni ərsəyə gətirənlərə təşəkkür edib:

“Yəqin ki, Seyfulla Mustafayevin Çeçenistanda, Vahid Mustafayevin Gürcüstanda, Əfqanıstanda, Bosniya və Hersoqovinyada və digər qaynar nöqtələrdə apardığı çəkilişlər bunun əhatə dairəsinin nə qədər geniş olduğundan xəbər verir. Belə demək istəmirəm ki, cəsarətli olmaq bizim xoşumuza gəlir, sadəcə olaraq bu belə idi. Mən inaniram ki, bu günə qədər CNN arxivində olan Zviad Qamsaxurdiya ilə məşhur bunkerdə müsahibə ilə bü gün istəlinən reportyor fəxr edə bilər. Vahid Mustafayev də təbii ki fəxr edirdi o kadrlarla. O müsahibəni bütün dünya Zviad Qamsaxurdiyanı axtaran zaman Vahid bunkerdə götürmüşdü”.

Layihənin rəhbəri Eldəniz Elgün də tədbirdə çıxış etdi. Onun sözlərinə görə, ANS-in bu təşəbbüsü “Çingiz Mustafayev Fondu”nun dəstəyi ilə həyata keçirilib.

“Layihənin yaradılmasında məqsəd 1991-ci ildən bu günə qədər olan verilişləri, xəbərləri, müxtəlif hadisələri, bir sözlə, Azərbaycan tarixini insanlara çatdırmaqdan ibarətdir. 1991-ci ildən 2015-ci ilə qədər ANS TV-də efirə gedən verilişlər, çəkilən filmlər hamısı bu saytda yer alacaq. Hətta ANS-də bir dəfə adı çəkilən şəxsin, texniki heyətin də bilgiləri bu saytda olacaq. Bu sənədli filmlərdə ANS-in arxivində olan, bu vaxtadək efirə getməyən, o cümlədən bir çox gizli məsələlərin üstündən sirr pərdəsini götürəcək süjetlər təqdim ediləcək .Həmçinin “Qızıl Fond” əsasında hazırlanmış sənədli filmlər də efirə gedəcək”, – deyə Eldəniz Elgün bildirib.

Millət vəkili Qənirə Paşayeva ANS-dəki arxiv materiallarının çox dəyərli olduğunu vurğulayaraq bunları söyləyib: “ANS-də olan tarix bu gün kimlərinsə fikir və düşüncələrindən süzülən deyil, görüntülü, real tarixdir. Burada ictimai-siyasi xadimlərin çıxışları, o dövrə aid materiallar var. Bu, ictimaiyyət üçün çox maraqlı olacaq. İnsanlarımız sanki o tarixə film kimi baxacaqlar. Həmçinin jurnalistika ilə məşğul olacaq gənclər üçün bu bir dərslik ola bilər. Onlar bunlara baxaraq jurnalist peşəsinin incəlikləri və necə şərəfli və çətin olduğunu görə bilər”.

“ANS TV nin bu layihəsi həm də cəmiyyət üçün yayrarlıdır. Çünki bu arxivdə qorunub saxlanan görüntülər illər keçsə də öz əhəmiyyətini itirməyəcək. ANS Azərbaycan cəmiyyətini, Azərbaycan insanını daha yeni tarixə, realist bir məcraya qaytardı”, – deyə təqdimat mərasimində çıxış edən millət vəkili Fazil Mustafa bildirib.

ANS TV-nin yaratdığı arxiv videolar dünya televiziya aləmində yeni bir sistemdir. Əslində, ABŞ və Avropa ölkələrinin televiziyalarında buna oxşar layihələr olsa da tarixi əks etdirən bu sistem Müstəqil Dövlətlər Birliyi (MDB) və Şərqi Avropada tam yeni bir layihə kimi özü də tarixə düşdü.

ANS (“Azerbaijan News Service”) – Azərbaycanda ilk özəl və ilk xəbər televiziya kanalıdır. Yarandığı vaxtdan bu günə kimi ANS Qarabağ müharibəsi, Xocalı soyqırımı, AXCP tərəfdarlarının “istefa” səsləri ilə Milli Məclis binasına silahla basqın etməsi və Ayaz Mütəllibovun istefası, Bakı metrosunda partlayışlar və metrodakı yanğın, 1994 və 1995-ci ildə dövlət çevrilişinə cəhdlər, Neft Akademiyasındakı terror, Əfqanıstan, Çeçenistan, İnquşetiya, İraq, Gürcüstan, Misir və Türkiyə kimi ölkələrdə baş verən münaqişə və qarşıdurmalar kimi məsələlər ANS-in tarixində böyük yerə sahibdir. Məhz bu hadisələr BBC, CNN, Euronews, CBS, NBC, NHK, ITN, TBS, ZDF, RAI, ARD, WTN, RTL, Amerikanın Səsi, Azadlıq Radiosu və Rusiya, İsveç, Səudiyyə Ərəbistanı, Türkiyə kimi ölkələrin media qurumlarının marağına səbəb olmuş və ANS-lə əməkdaşlıq ediblər.