Çərşənbə axşamı , Avqust 20 2019
Ana səhifə / İqtisadiyyat / Xəzərdən Azərbaycana qaz kəməri: İran da qarşıdır, Rusiya da…

Xəzərdən Azərbaycana qaz kəməri: İran da qarşıdır, Rusiya da…

Türkmənistanın Xəzər sahilindəki Avaza şəhərində ötən gün işini yekunlaşdıran beynəlxalq iqtisadi forum zamanı “Transxəzər” qaz kəməri ideyası da gündəmə gəlib. Forumda həm Rusiya, həm İran nümayəndələr bu layihəyə qarşı olduqlarını nümayiş etdiriblər.

“İran Xəzər dənizində şərqdən qərbə qaz kəmərlərinin tikintisinə qarşı çıxır, çünki bu regionun ekologiyasına ciddi zərər vura bilər”,-İranın “National Gas Company” şirkətinin nümayəndəsi Bəhruz Namdari Xəzər forumunda çıxışı zamanı bildirib.

O xatırladıb ki, İran qonşu ölkələrə karbohidrogen resurslarını dünya bazarlarına çıxarmaq üçün öz infrastrukturunu-qaz kəmərlərini və terminallarını təklif edir.

Rusiyanın baş naziri Dmitri Medvedyev də forumda çıxışı zamanı Xəzərdə neft-qaz kəmərlərinin çəkilməsinə dair layihələrin əvvəlcə bütün sahilyanı ölkələr tərəfindən ekoloji ekspertizadan keçirilməli olduğunu deyib. Belə müddəa Xəzərin statusuna dair konvensiyada da əksini tapır. Hərçənd konvensiyanın digər müddəasına görə Xəzərdə neft-qaz kəmərlərinin çəkilməsi həmin kəmərlər hansı ölkənin milli sektorlarından keçirsə onların öz aralarında razılaşdırılmalıdır.

Sergey Prixodko

Daha əvvəl Rusiya hökumətinin aparat rəhbəri Sergey Prixodko da Transxəzər qaz kəməri ideyasını məqsədəuyğun saymadığını deyib. “Xəzərin unikal ekosisteminin qorunub saxlanılması maraqları istənilən hipotetik iqtisadi layihələr üzərində prioritet təşkil edir”,-Prixodko “Transxəzər” qaz kəməri ideyasını nəzərdə tutaraq deyib.

“Transxəzər” qaz kəməri ideyasını Qərb fəal müdafiə edir və dəfələrlə bu layihə Türkmənistanla danışıqlarda müzakirə olunub. Azərbaycanın layihə ilə bağlı mövqeyi belədir ki, “Transxəzər” barədə qərarı kəmərin başlanğıcını götürdüyü ölkə qəbul etməlidir. Azərbaycan isə ancaq bundan sonra tranzit ölkə kimi öz mövqeyini ortaya qoyacaq. Virtualaz.org

Həmçinin oxuyun

Məmur hərisliyi Azərbaycanda otellərin boş qalmasına səbəb olub

Azərbaycanda mehmanxana otaqlarının təxminən 80 faizə yaxını boşdur.  Dövlət Statistika Komitəsinin məlumatına görə, 2019-cu ilin …