Türkiyədə referendumun vaxtı məlum oldu

Türkiyədə Konstitusiya dəyişikliyi barədə referendumun vaxtı açıqlanıb.

AzVision.az Türkiyə mətbuatına istinadən xəbər verir ki, Yüksək Seçim Qurumu sədri Sədi Güvən bildirib ki, ölkədə Konstitusiya dəyişikliyi barədə referendum aprelin 16-da keçiriləcək.

Referendum qutularının yanında 10 siyasi partiyanın təmsilçisi müşahidə aparacaq deyən Sadi Güvən bildirib ki, seçici siyahısı fevralın 18-dək tamamlanacaq.

Qeyd edək ki, bundan öncə Türkiyə baş nazirinin köməkçisi Numan Kurtulmuş da referendumun böyük ehtimalla aprelin 16-da keçiriləcəyini bildirib.

Xatırladaq ki, referendum qəbul olunacağı təqdirdə, millət vəkillərinin sayı 550-dən 600-dək artırılacaq, parlament üzvü seçilmək yaşı 25-dən 18-ə endiriləcək.
Parlament və prezident seçkiləri beş ildən bir eyni gündə keçiriləcək. Qanun ümumilikdə Türkiyədə idarəetmə formasının dəyişdirilməsini və prezident idarəçiliyinin tətbiqini nəzərdə tutur.