Öldüyü deyilən Gülnarədən yeni xəbər – Zirzəmidə qalır

Öldürüldüyü barədə məlumatlar yayılan Özbəkistanın mərhum prezidenti İslam Kərimovun qızı Gülnarə Kərimovadan yeni xəbər var.

“Qafqazinfo” Türkiyə KİV-nə istinadən xəbər verir ki, Gülnarə Kərimova çirkli pulların yuyulması iddiasına görə İsveçrədən gələn müstəntiqlər tərəfindən dindirilib. Onu Cenevrə Vəkillər Kollegiyasının təyin etdiyi vəkil Qreqor Mangit təmsil edib. Vəkil bildirib ki, 9-10 dekabr tarixlərində, Özbəkistanın paytaxtı Daşkənddə keçirilən sorğu-sual 23 saat davam edib. Bundan başqa, Q.Mangit Gülnarə Kərimovanın sağlamlığının qaydasında olduğunu və Daşkənddəki köhnə evinin zirzəmisində qaldığını deyib. Vəkil onu da əlavə edib ki, Kərimovanın uşaqları, vəkilləri, ümumiyyətlə kənardan kimləsə əlaqə qurması qadağandır.

Xatırladaq ki, Gülnarə Kərimovanın ötən il noyabrın 5-ində zəhərlənərək öldürüldüyü və gizli şəkildə dəfn edildiyi barədə məlumatlar yayılmışdı.