Azinforum.az İnformasiya Portalı Onlayn Xəbər Portalı
Azərbaycanda hazırda qazlaşdırmanın səviyyəsi 93 faizdir və bu ciddi nailiyyətdir. Çünki ölkənin relyefi nəzərə alınarsa qazlaşdırmanın bu səviyyəyə çatdırılması mürəkkəb işdir. Bu barədə prezident İlham Əliyev regionların inkişafına dair 2014-2018-ci illər Dövlət Proqramının yekunlarına dair keçirilən konfransda yekun çıxışı zamanı deyib. Prezidentin çıxışını AzTV yayıb.
İlham Əliyev bildirib ki, bu il ölkədə qazlaşdırmanın səviyyəsinin 95 faizə çatdırılması nəzərdə tutulur. Çünki hələ də təbii qazı olmayan kəndlər var. “Dövlət büdcəsindən bu məqsədlə SOCAR-a 100 milyon manat vəsait ayrılıb. SOCAR da öz növbəsində bu qazlaşdırma işlərini həyata keçirməlidir”, – prezident vurğulayıb.
“Ucqar dağ kəndlərinə qaz çəkilməsi barədə hansı addımlar atılmalıdır, daha sonra buna da baxılacaq”, – İlham Əliyev əlavə edib.
Prezident çıxışında onu da deyib ki, bu il ərzində ölkədə iri elektrik stansiyasının-400 meqavatt gücündə “Şimal-2” İstilik Elektrik Stansiyasının istifadəyə verilməsi gözlənilir. Ölkənin elektrik enerjisinə olan tələbatının ödənildiyi nəzərə alınarsa bu stansiyanın işə düşməsi qonşu ölkələrə elektrik enerjisinin ixracını genişləndirməyə imkan yaradacaq.
İlham Əliyev il ərzində regionlarda görüləcək işlər barədə danışarkən bildirib ki, içməli su və kanalizasiya layihələri davam etdiriləcək. İl ərzində Mingəçevir də daxil olmaqla üç şəhərdə bu layihələr başa çatdırılmalıdır, daha 20 şəhərdə isə içməli su, kanalizasiya layihələrinin icrası davam edəcək. Habelə çaylar boyu yerləşən kəndlərdə müasir sutəmizləyici qurğuların tikintisi həyata keçiriləcək, azı 300 subartezian quyusu qazılacaq.
Prezident il ərzində bölgələrdə müxtəlif təyinatlı 2300 km. uzunluğunda avtomobil yollarının çəkiləcəyini də deyib. İlham Əliyev çıxışında onu da bildirib ki, məcburi köçkünlər üçün yeni binaların tikintisi də davam edəcək, il ərzində 20 min köçkünün evlə təmin edilməsi nəzərdə tutulur. Virtualaz.org
