Şənbə , Sentyabr 21 2019
Ana səhifə / İqtisadiyyat / Gürcüstanda 9 Aprel şəhidlərinin xatirəsi anılır – FOTO

Gürcüstanda 9 Aprel şəhidlərinin xatirəsi anılır – FOTO

Bu gün bütün Gürcüstanda 9 Aprel faciəsinin 28-ci ildönümü qeyd edilir.

APA-nın məlumatına görə, faciənin ildönümünə həsr olunan tədbirlər paytaxt Tiflisdən başlayıb.

Gecə saat 4.00-dan başlayaraq Gürcüstan dövlət və hökumət rəsmiləri, nazirlər, diplomatik korpus rəhbərləri, deputatlar, gənclər və digər əlaqədar təşkilatların nümayəndələri, şəhər sakinləri ənənəvi olaraq parlament binası qarşısındakı 9 Aprel abidəsinin önünə əklillər və gül-çiçək dəstələri qoyub, şam yandırıblar.

Gürcüstanın baş naziri Giorgi Kvirikaşvili və katolikos-patriarx II İlya da anma mərasimində iştirak edib. Abidə önünə əklil qoyan G. Kvirikaşvili 1989-cu ilin 9 Aprelinin xalqın azadlıq və müstəqilliyi ilə bağlı çox əhəmiyyətli bir gün olduğunu bildirib. Baş nazir 28 il əvvəl insanlarının azadlıq və müstəqillik “yuxu”sunun çin olması uğrunda həlak olduqlarını və bu gün xalqın daha güclü şəkildə birləşəcəyinə şübhə etmədiyini vurğulayıb.

Gürcüstan prezidenti Giorgi Maqvelaşvili faciə qurbanlarının xatirəsini yad edib, abidə önünə əklil qoyub.

Azərbaycanın Gürcüstandakı səfirliyi və səfirlik əməkdaşları, Gürcüstanın ali məktəblərində təhsil alan azərbaycanlı gənclər də 9 Aprel faciəsinin qurbanlarına ucaldılan abidə önünə əklil və gül-çiçək dəstələri qoyublar. Eyni zamanda Gürcüstan Müsəlmanlarının şeyxi Hacı Ramin İgidov və din xadimləri, Gürcüstan Azərbaycanlı Ağsaqqallar Şurasının üzvləri 9 Aprel şəhidlərinin xatirəsini yad edib, daha sonra Cümə Məscidində anım tədbiri təşkil olunub. Tədbirdə Gürcüstanın azərbaycanlı və gürcü din xadimləri iştirak edib.

Faciənin ildönümü azərbaycanlıların kompakt yaşadığı Marneulidə də qeyd olunub. Marneuli Gənclər Mərkəzi tərəfindən təşkil olunan tədbir Alget kəndindəki 9 Aprel və 20 Yanvar şəhidlərinin xatirəsinə ucaldılan abidə önündə keçirilib. Tədbirdə Gürcüstan parlamentinin azərbaycanlı və gürcü deputatları, gənclər və kənd sakinləri iştirak edərək faciə qurbanlarını ehtiramla yad ediblər.

Faciə qurbanları rayonun Tamarisi, Sereteli kəndlərində də anılıb. Tədbirdə Marneuli rayon rəhbərliyi, gürcü və azərbaycanlılar iştirak edərək müstəqillik uğrunda həlak olan 21 Gürcüstan vətəndaşlarını ehtiramla yad ediblər. Rustavidə azərbaycanlıları birləşdirən “Salam” Xeyriyyə Cəmiyyəti də faciə qurbanlarının xatirəsinə həsr olunmuş tədbir keçirib.

Qeyd edək ki, 1989-cu ilin aprelin 9-da Tiflisin Rustaveli prospektində keçirilən dinc aksiyanın sovet ordusu tərəfindən dağıdılması zamanı 21 aksiya iştirakçısı öldürülüb. 1991-ci il aprelin 9-da Gürcüstan Ali Soveti 9 Apreli Gürcüstanın Dövlət Müstəqilliyinin Bərpası Günü elan edib.

Həmçinin oxuyun

İlham Şaban: Neft infrastrukturu stabillik tələb edir

Səudiyyə Ərəbistanının neft obyektlərinin keçən həftə hücuma məruz qalmasından sonra dünya üzrə neft qiymətləri qalxsa …

Bir cavab yazın