Ana səhifə / İdman / Milliyə niyə baş məşqçi tapılmır? -AFFA izahat verir

Milliyə niyə baş məşqçi tapılmır? -AFFA izahat verir

AFFA-nın baş katibi Elxan Məmmədov matc.az saytına müsahibə verib.

– Deyilənlərə görə, millimizin qarşısına Avropa çempionatının final mərhələsinə çıxmaq məqsədi qoyulduğu üçün heç bir mütəxəssis Azərbaycan yığmasında çalışmaq istəmir. Bu, həqiqətən belədi? Ümumiyyətlə, bu qrupdan çıxmağımız realdımı?

– Hazırda futbol ictimaiyyətini maraqlandıran əsas məsələlərdən biri, bəlkə də birincisi milli komandanın yeni baş məşqçisinin kim olacağıdı. Bildiyiniz kimi, İcraiyyə Komitəsinin dekabrın əvvəlində keçirilmiş iclasından sonra bu istiqamətdə çalışmalara başlamışıq. Əsas məsələ yalnız A millinin baş məşqçisi ilə bağlı deyildi. Buraya U-21 və daha gənc yığma komandaların baş məşqçisi məsələsi də daxil idi. Artıq U-21-ə və U-19-a baş məşqçi təyinatı olub və İcraiyyə Komitəsinin iclasında bu təyinatlar təsdiq olunması gündəliyə daxil ediləcək. Əsas milliyə gəldikdə, ilin sonunda əksər məşqçilər istirahətdə, İngiltərə kimi fasiləsiz keçirilən çempionatlarda çalışan məşqçilər isə iş başında idilər. Həmin müddətdə araşdırma apardıq, müəyyən siyahı hazırladıq. Bundan sonra adları siyahıda olan məşqçilərin bir qismi ilə telefon vasitəsilə əlaqə saxladıq, bir neçə nəfəri isə Bakıya dəvət etdik. Hazırda qısa siyahı hazırlanır və fevralın 10-dək həmin mütəxəssislərin adı AFFA rəhbərliyinə və İcraiyyə Komitəsinin üzvlərinə təqdim ediləcək. Açığı, hansısa məşqçidə bu vəzifəyə təyinatla bağlı qorxunun olması ilə bağlı səsləndirilən fikirlər düzgün deyil. Əgər hər hansı məşqçidə işlə bağlı qorxu varsa, heç karyera barədə düşünməsi məntiqli deyil. İndiyə qədər siyahımızda yer alan və görüşdüyümüz məşqçilər arasında qarşıya qoyulan məqsədlə bağlı qorxub geri çəkiləni olmayıb.

– 2020-ci il Avropa çempionatının seçmə mərhələsinin startına 2 aydan da az vaxt qalır, millinin baş məşqçisi vəzifəsi isə hələ boşdu. Sizcə, təyinat gecikmir?


– Milli komandalarda yaxşı nəticə əldə etmiş məşqçilər arasında hazırda işsiz olanları çox azdı. Əvvəlki təyinatlar zamanı İcraiyyə Komitəsi məşqçinin uzun müddət böyük millilərdə çalışdığın nəzərə alırdı. Məsələn, Berti Foqts kimi mütəxəssis Almaniya millisində uzun müddət çalışıb və nəticə qazanıb. Daha sonra Küveyt, Nigeriya milliləri də onun rəhbərliyi altında çıxış edib. Təcrübəli mütəxəssis olduğuna görə, seçim onun lehinə edilmişdi. Robert Prosineçkiyə gəldikdə, tanınmış futbolçu olmuşdu, amma baş məşqçi kimi potensialını Azərbaycanda açdı. Buraya gələnə qədər köməkçi-məşqçi, daha sonra Türkiyənin “Kayserispor” klubunda bir il baş məşqçi kimi fəaliyyət göstərmişdi. Millimizə təyinatına qədər Slaven Biliçlə birgə Xorvatiya millisində çalışmışdı. Onun təyinatı zamanı bir qədər risk etdik və bu risk müsbət nəticəsini verdi. Milli komanda tarixində rekord sayda xal topladı. Hazırda da milli komandanın baş məşqçisi postuna əcnəbi məşqçilər namizəddi. İstərdik ki, həmin məşqçinin təyinatı yanvarın sonuna qədər reallaşsın. Namizədləri təhlil edirik, çalışırıq ki, səhv seçim etməyək.

 Gecikmənin əsas səbəbi nədi? Tələblərin üst-üstə düşməməsi, yoxsa maddi məsələlər?

– Bu günə qədər danışıq apardığımız məşqçilərin heç birindən tələblərimizlə bağlı mənfi cavab almamışıq. Danışıq apardığımız mütəxəssislərdən hansınınsa komandanın qarşısına qoyulan məqsədlə bağlı geri çəkildiyinin şahidi olmamışıq. Təbii ki, müqavilənin maddi tərəfi hər bir məşqçi və bizim üçün maraqlıdı. Elə məşqçilər var ki, biz də onların millədə işləməsinin tərəfdarıyıq. Ancaq bilirik ki, onlarla danışıqlara başlasaq da, razılıq əldə olunmayacaq. Çünki həmin məşqçilər böyük yığmalardan və klublardan təklif gözləyirlər.

– 21 yaşadək futbolçulardan ibarət yığmaya serbiyalı mütəxəssis Milan Obradoviç gətirildi. Əsas komandaya təyinat zamanı bu amil rol oynaya bilərmi?

– Təcrübə göstərir ki, milli komanda gənclər yığmasından ayrı olmalıdı. Əlbəttə, qarşılıqlı iş münasibətləri istisnadı. Ancaq təyinatlar bir-birinə bağlı olmamalıdı. Çünki hər bir komandanın məqsədi fərqlidi. Milli komandanın üzün müddətli hazırlıq keçməsi və bir neçə ildən sonra nəticə qazanmalı olması düzgün yanaşma deyil. Bu gün hər yerdə iş başında nəticə qazanan məşqçilərdi. Gənclərdə isə yaş məhdudiyyəti var. Ola bilər, hansısa məşqçi komandasına bir qədər gənc futbolçuları dəvət etsin və növbəti tsikldə yaxşı nəticə əldə etsin. Ancaq bunu əsas milli komandaya şamil etmək olmaz. Çünki əsas milli komandaya yaşından asılı olmayaraq, ölkənin ən güclü futbolçuları dəvət olunur. Milli komanda klubdan da fərqlidir. Kluba transfer pəncərəsi zamanı müxtəlif ölkələrdən yeni futbolçular dəvət edə, zəif mövqeləri gücləndirə bilərsən. Ancaq milli komandada bunu etmək mümkün deyil. Ən yaxşı halda, heyətin 10 faizini dəyişmək imkanın olur. Bu, əksər ölkələrdə belədi. Misal çəkə bilərsiz ki, bəzi ölkələrdə baş məşqçilər 10 ilə yaxındı işləyir. Həmin məşqçilər nəticələrini addım-addım yaxşılaşdırdığına görə, uzun müddətdi ki, orda çalışır. Nəticə yaxşı olmayanda isə məşqçi ilə müqaviləyə xitam verilir. Yenə deyirəm, gənclərdən ibarət yığma komandaların baş məşqçilərinin təyinatının əsas millinin baş məşqçinin təyinatına birbaşa aidiyyatı yoxdu.

– Namizədlərin siyahısını tərtib edərkən hansı kriteriyalar nəzərə alınır: beynəlxalq yarışlarda uğurlu nəticələr qazanmış məşqçi, təcrübəli, yoxsa Azərbaycan kimi kiçik yığmalarda işləməyi bacaran çalışdırıcı?

– Əsas məqsəd odu ki, millimiz Avro-2020-yə vəsiqə qazanmağa daha yaxın olsun. Başa düşürük ki, çətin qrupda yer almışıq, xal qazanmaq baxımından komandaların sayı da azdı. Bu da gələcək məşqçi üçün məsuliyyətli addımdı. Lakin hər bir məşqçi ilə söhbətimiz zamanı qeyd edirik ki, AVRO-2020-nin 3 qrup, bir 1/4 final mərhələsinin oyunu Bakıda keçiriləcək və biz bu futbol bayramını öz yığmamızın iştirakı ilə yaşamaq istəyirik.

– Baş məşqçidən əsas tələb nə olacaq? Mümkün qədər çox xal toplamaq, yoxsa gələcəyin komandasını formalaşdırmaq?

– Gələcəyin komandasını formalaşdırmaq da vacib məsələdi. Amma bizim millidə nəsildəyişmə prosesi 30-35 faiz futbolçuya aiddi. Qlobal dəyişiklik olmayacaq. Biz bu prosesi Berti Foqtsun dövründə keçdik. Növbəti belə proses adətən 8-10 ildən sonra baş verir. Bu baxımdan ciddi dəyişikliyin olacağına inanmırıq. Bu məsələ ilə bağlı gənclərdən ibarət yığma komandaların məşqçiləri də məsuliyyət daşıyır. Onlar əsas milli üçün ehtiyat qüvvə yetişdirməlidirlər.

– Ola bilərmi ki, mərhələnin ilk matçına komandanı müvəqqəti olaraq Məşqçilər Komitəsinin nəzarəti ilə yerli mütəxəssis çıxarsın?

– Bunu deyə bilmərəm. Qərarı İcraiyyə Komitəsi verəcək. İnanmıram ki, o vaxta qədər məşqçi təyin olunmasın. Niyə inanmıram? Çünki martdakı oyundan sonra növbəti qarşılaşmaya qədər bizim cəmi 2 ay vaxtımız qalacaq. Bu da böyük zaman deyil. Təyinat nə qədər geciksə də, Xorvatiya ilə oyuna milli komandamızı yeni baş məşqçinin çıxaracağına inanıram.

– Avropa Liqasının finalı, Avropa çempionatının final mərhələsinin Bakıya salınması möcüzəyə bənzəyir. Xüsusən, AÇ-2020. Demək olar ki, dünya praktikasında Azərbaycan kimi kiçik və futbolu zəif ölkələrdə bu cür mötəbər yarışlar olmayıb. Bunu necə bacardız?

– Tamamilə razıyam, Avropa Liqasının finalını qəbul etmək bizim üçün bir möcüzə kimi görünürdü. Artıq bu möcüzə mayın 29-da Bakıda gerçək olacaq. Avropanın ikinci ən nüfuzlu klub turnirinin finalı ölkəmizə böyük təcrübə qazandıracaq, müsbət emosiyalar gətirəcək. Bakını seçməkdə ən böyük səbəb Azərbaycan Respublikasının prezidenti cənab İlham Əliyevin böyük dəstəyinin olmasıdı. UEFA prezidentinə, İcraiyyə Komitəsinin üzvlərinə, eləcə də texniki qrupa bizim tender sənədlərə baxan zaman əsas təsiredici məqam ölkə başçısının bizə verdiyi dəstək oldu. Digər namizədlərin də güclü tender sənədləri var idi. Ancaq UEFA üçün ölkə başçısının dəstəyi birbaşa təsiredici amildir. Bizdə də bu var. Tender sənədlərini AFFA rəhbərliyi UEFA prezidenti və İcraiyyə Komitəsinin üzvləri ilə təyin olunmuş vaxtda görüşərək təqdim etdi. Bu bizim üçün böyük təcrübə olacaq. AVRO-2020-nin oyunları isə növbəti bir futbol festivalına çevriləcək.

– Bəlli məsələdi ki, əsas problem uşaq futbolundadı. Klublar illərdi xeyli pul xərcləsə də, normal futbolçu yetişdirə bilmir. Sizcə, bunun səbəbi nədədi? Süni meydançalar, savadsız uşaq məşqçiləri, yoxsa genetikamız?

– Hərdən bu cür ifadələr də eşidirik ki, mütəxəssislər deyirlər futbolçu yoxdu, uşaqlar arasında seçim imkanı azdı. Özüm də hər bir layihəyə tənqidi yanaşıram. Baxıram ki, hansı mənfi tərəfləri var. Çalışırıq ki, layihənin mənfi tərəflərini müsbətə çevirək, futbolumuza xeyir verək. Heç kim iddia etmir ki, futbol təsərrüfatında hər şey mükəmməldi. Təbii ki, inkişafdan danışırıqsa, o deməkdi ki, çatışmazlıq var. Ancaq futbolçularımızın sayının az olması ilə bağlı fikirlərlə razılaşmıram. Premyer Liqada 14 komanda oynayan vaxtlarda da milliyə ümumilikdə 50-60 futbolçu namizəd göstərilirdi, daha sonra onlardan 35-40 nəfəri seçilirdi. Axırda isə baş məşqçi 25 nəfərə dəvət göndərirdi. Hazırda da belədi. 14, 12 komanda oynayan illərdə limit yox idi. Nəticədə oynayan yerli futbolçuların sayı çox az idi. Hətta 3 komanda var idi ki, heyətində meydana bəzən orta hesabla 1 yerli futbolçu çıxırdı. Bunu bəzən unuduruq. AFFA ancaq milli komanda ilə məşğul deyil, futbolun təhlilini, statistikasını aparır. Əgər 3 komandada 1, digərlərində isə orta hesabla 3 azərbaycanlı futbolçu oynayırdısa, deməli, vəziyyət indikindən daha pis idi. Hazırkı limitə görə minimum 5 yerli futbolçu oynayır, bu da 8 komandalı çempionatda ən azı 40 futbolçunun meydana çıxmasına şərait yaradır. Hətta “Sumqayıt” klubun üzvləri tamamilə yerli futbolçulardan ibarətdir. Bu isə say artımına gətirib çıxarır. Bəziləri limitin tətbiqi zamanı sağlam rəqabətin olmadığını qabarda bilər. Ancaq sağlam rəqabət olanda da klublarımız əcnəbi futbolçulara üstünlük verirdilər. Hazırda tətbiq edilən limitin yaxşı olduğunu düşünürəm və bu nəticəyə mərhələ-mərhələ gəlmişik. Əvvəllər limit yox idi, sonra 7+4 tətbiq etdik. Ardınca 6+5 (5 yerli) limitinə üstünlük verdik. İndiki limitdə isə bir gənc futbolçunun meydanda olması da tələbdir. İcraiyyə Komitəsinin iclasında bu məsələ mütəmadi müzakirə olunsa da, heç bir dəyişiklik edilmir. Klublar Komitəsində də bu məsələ bir klub tərəfindən qaldırılmışdı, ancaq digər klublara limit saxlanılmasının tərəfdarı olduqlarını bildirdilər.

Bir qədər dərindən araşdıraq. Hazırda klublarımız təlim-məşq toplanışlarındadırlar. Səbirsizliklə klubların akademiyalarından neçə futbolçunu əsas komandaya cəlb edəcəyini gözləyirəm. Bizdə klublarımız daha çox legionerlərin dəvət olunmasında maraqlıdırlar. Arzum akademiyaların yetirmələri barədə də legionerlər qədər çox danışılmasıdı. Hazırkı çempionatın əvvəlində bəzi komandaların gənc futbolçulara üstünlük verdiklərini də müşahidə edirik. Ad çəkmək istəmirəm, 8 klubdan 3-ü bu baxımdan seçilir. Əlbəttə, bu sevindirici haldır. Həmin gənc futbolçuların təbliğatını aparmaq lazımdır ki, digərləri üçün nümunə olsun. Məşqçilərə gəldikdə, təhsil qrupu yaratmışıq. C və B kurslarından başqa, UEFA ilə birgə A və Pro kursları təşkil edirik. Kurslarda təhsil alan məşqçilərin əksəriyyəti iş başındadırlar. Deməli, həmin mütəxəssislər öz üzərlərində çalışırlar. Uşaq komandalarında işləyən məşqçilərə gəldikdə, UEFA-nn təlimatçılarını dəvət edirik və treninqlər keçirirlər, məşqçilər üçün kitablar hazırlanır. Bu yaxınlarda “Məktəblərdə futbol dərsi” layihəsində çalışan məşqçilər üçün yeni tədris vəsaiti hazırlanıb onlara təqdim olundu. Öyrəndiklərini tətbiq etmək isə məşqçiləri məsuliyyətidir. Bu gün kursda öyrəndikləri ilə kifayətlənmək olmaz. İstənilən sahənin inkişafı nəticəsində yeni metodlar, üsullar ortaya çıxır. Buna görə də məşqçilərimiz yeniliklərlə tanış olmaq üçün əlavə qaynaqlardan da istifadə etməli, mütaliə etməlidirlər.

Həmçinin oxuyun

Qurban Qurbanov hərəkətlərinə fikir verməyən futbolçunu CƏRİMƏLƏDİ

“Qarabağ” FK-nın son günlər davamlı hal alan aqressivliyi ilə seçilən futbolçusu Elvin Cəfərquliyev baş məşqçi …