Ana səhifə / İdman / Məşqçilər Komitəsi: “Bəsdir kağızda kimisə favorit göstərib, ondan çəkindik”

Məşqçilər Komitəsi: “Bəsdir kağızda kimisə favorit göstərib, ondan çəkindik”

Qış fasiləsində mövsümün qalan hissəsinə hazırlığı davam etdirən klublarla yanaşı, Məşqçilər Komitəsinin də müəyyən planları var. Həm qarşıdakı planlarla, həm də klublarımızın durumu ilə bağlı Komitənin sədri Vaqif Sadıqovla danışdıq.
Sadıqov Qaynarinfo-ya müsahibəsində klubların durumunu dəyərləndirdi, “Neftçi” – “Qarabağ rəqabətindən danışdı. Mütəxəssis “Neftçi”nin yeni transferi Eddi İsrafilovla bağlı fikirlərini də bildirdi.
– Məşqçilər Komitəsinin qarşıdakı planları necədir?
– Əsgər Abdullayevlə, Şahin Diniyev Antalyaya yollanmışdılar. Klubların fəaliyyəti ilə tanış olurdular. Oyunları izləyirdilər. Biz də Ağasəlim Mircavadovla birlikdə burada “Səbail”lə “Keşlə”nin oyunlarına baxdıq. Fəaliyyətimizi həmişəki kimi davam etdiririk. Gördüyümüzü rəhbərliyə çatdırırıq, hesabatlar hazırlayırıq. Görülən işlərə sırf peşəkar şəkildə qiymət veririk.
– Klubların oyunlarını izlədiyinizi bildirdiniz. Necə təsəvvür yaranıb artıq?
– Məşqçilər Komitəsi olaraq Əsgər Abdullayev və Şahin Diniyevin hesabatını dinlədik. Hazırda rəhbərliyə hesabat hazırlayırıq. Bəzi məşqçilərlə görüşdülər. Komandaların əksəriyyətinin oyunlarında və məşq proseslərində iştirak etdilər. Əcnəbi statusu daşıyan məşqçilərlə ünsiyyətdə oldular, söhbətlər apardılar. Onların da fikirlərin öyrəniblər. Həmin ətrafda müzakirələr aparırıq. Biz də öz tövsiyələrimizi rəhbərliyə çatdıracağıq. 
– Klublarımız qış fasiləsində bəzi transferlər həyata keçirdilər. Onlardan hansı daha çox diqqətinizi çəkdi?
– Hazırda transferlər haqqında nəsə demək tezdir. Klublar az müddətdir ki, yeni futbolçuları heyətlərinə qatıb. Zamana ehtiyac var, ola bilər, bəzi futbolçular buna tez, ya da gec uyğunlaşsın. Əsas odur, yeni transferlər etməklə heyətlərini gücləndirirlər. Bununla da ümumi futbolumuzun səviyyəsini yüksəltməyə çalışırlar.
– Eddi İsrafilovun “Neftçi”yə transferi diqqətçəkən oldu və eyni zamanda birmənalı qarşılanmadı. Sizin fikirləriniz necədir?
– Komandanın baş məşqçisinin qərarıdır. Eddi yararlı olacaq ya yox, bunu zaman göstərəcək. Klubun transferini mənim müzakirə etməyim nə dərəcədə düzgündür? Bu, klubun siyasətidir.
– İsrafilov bildirmişdi ki, millidə də oynamaq istəyirəm. İndidən sonra onun millimizə nə dərəcədə faydası dəyə bilər?
– Atılmayan addımdan əvvəl hansısa müzakirələrə başlayırıq. İdman tərəfindən yanaşaq. O, milliyə qayıtmağa nə dərəcədə hazır olacaq? İkinci məsələ, onun oyunu baş məşqçini qane edəcəkmi? Bunu zaman göstərəcək. İndidən nəyisə müzakirə etmək düzgün olmaz. Qərarı verən baş məşqçidir. Eddi ilə bağlı De Byazi nə qərar verəcək, zamanla bunun şahidi olacağıq. Sırf mənim fikrimi bilmək istəyirsinizsə, yığmanın uğuru üçün hər bir futbolçuya şans verilir. Eddinin də belə şansı və bundan istifadə etmək imkanı var. Özü də həmişə yığmada oynamaq istədiyini deyib.
– Bir neçə gündən sonra İcraiyyə Komitəsinin hesabat konfransı olacaq. Bizi hansısa sürprizlər, yenilik gözləyir?
– Hazırda gündəlik açıqlanıb. Hər kəs məlumatlandırlıb. Hansı dəyişikliklərin gözlənilib-gözlənilmədiyini deyə bilmərəm. Çünki heç nə bilmirəm. Nə deyim ki? Sürprizlə dolu həyatımız var. Hesab edirəm ki, bizə bəlkə də sürprizdən başqa stabillik lazımdır.
– Premyer Liqada qış fasiləsinə qədər baş tutan ilk iki dövrə haqqında fikirləriniz necədir?
– Gərgin mübarizə getdi. Yeni nəsə deyə bilmərəm. “Neftçi”nin “Qarabağ”dan bu qədər uzaq düşməsi gözlənilmirdi. Sevindirici hal odur ki, “Qəbələ” öz ənənəsinə qayıdır. “Zirə” tamamilə fərqli görünür. “Sabah” dəyişməyə başlayıb. Məncə, bu hamımızı sevindirməlidir. “Səbail”in büdcəsinə görə digər komandalardan seçildiyi deyilir. Fikrimcə, bu komandada ruh düşkünlüyü hiss olunmur. Bütün komandaları qeyd etmək olar. Bu onu göstərir ki, gələcəkdə də çox maraqlı çempionatın şahidi olacağıq. Məncə, intriqa sona qədər qorunub saxlanacaq. 
– “Neftçi” ilə “Qarabağ” arasında xal fərqi çoxdur. Hələ də “Neftçi”ni çempionluğa namizəd hesab etmək mümkündür?
– Fikrimcə, “Neftçi” bu gün özünü çempionluğa namizəd hesab etmirsə, fasilədən sonra çempionata qoşulmamalıdır. İlk növbədə inam olmalıdır. “Neftçi” hər oyunda “Neftçi” olduğunu sübut etməlidir. Sona qədər iddiasını qoruyub saxlamalıdır. “Neftçi”yə yaraşan budur. Bunu başa düşməliyik. “Qarabağ”la sona qədər sərt, başabaş mübarizə aparmağı bacarmalıdır. 
– Bunun üçün heyətdə dəyişikliyə ehtiyac var?
– Öz oyun dəst-xətti olan, keçən il çempionluq yaşamış komandadır. “Neftçi”yə də bütün komandalar kimi uğurlar arzulayaq. İnanaq ki, onlar ancaq və ancaq çempionata rəqabət gətirəcək, nəticədə futbolçular inkişaf edəcək. Millimiz də bundan faydalanacaq.
– “Qarabağ” Konfrans Liqasında “Marsel”lə qarşılaşacaq. “Marsel”in gücü və “Qarabağ”ın şansları haqda nə düşünürsünüz?
– Rəqibin gücü nə qədər böyük olsa da, “Qarabağ”ımız var. Hansı ki, bizi ildən ilə sevindirə-sevindirə inkişafa doğru irəliləyir. Bütün rəqiblərə qarşı mübarizə aparacaq gücdədir. Bəsdir kağızda kimisə favorit göstərib, ondan çəkindik. Artıq xeyli vaxtdır, sübut edirik ki, futbol oynamağı bacarırıq. Hər bir rəqiblə mübarizə aparmaq mümkündür.

Həmçinin oxuyun

UEFA Avropa Liqasının qalibi bəlli olub

UEFA Avropa Liqasında 2021/2022 mövsümünün qalibi bəlli olub. Turnirin final oyununda Şotlandiya “Reyncers”ini məğlub edən …