“O bayrağı mən sökdürmüşəm” – Zərdabın icra başçısı…

“Mənim işimlə bağlı məni niyə sorğu-sual edirsiniz ki? Prokuror- zadsız…Bayrağı harada gəldi, özü də qəbiristanlıqda asmırlar. Həmin bayrağı və plakatı mən sökdürmüşəm”.
Bu sözləri Zərdabda şəhid məzarı üzərindəki bayrağı sökdürən icra başçısı Lütvəli Babayev bununla bağlı sualını cavablandırarkən söyləyib.
Qeyd edək ki, bir neçə gündür mediada və sosial şəbəkələrdə ictimai qınaqla üzləşən Lütvəli Babayevin bu əməli həm də vətən torpağı uğurunda şəhid olanlara qarşı hörmətsizlik kimi qiymətləndirilib.
Saytımıza açıqlamasında icra başçısı həm də şəhidin valideyinləri barəsində tənqid səsləndirib:

“Daha nə istəyirlər?  Nə lazımdırsa, o, ailə üçün edilib. Amma gedib hay-küy salırlar…”.
Xatırladaq ki, Lütvəli Babayevin göstərişi ilə Zərdab rayon Dəkkə kəndində 6 aprel tarixində şəhid olan Nurlan Abdullazadənin qəbrinə hücum olunub. Şəhidin valideynləri də oraya çağırılıb. Atasının qəbirin yanında öz hesabına düzəltdirdiyi dövlət bayrağı dirəkdən endirilib. Bayrağı sökən İcra Hakimiyyəti əməkdaşları onu şəhid atası Rasim Abdullayevin üstünə ataraq “bunu buradan götür” deyə hörmətsizlik edib və buraya bir daha bayraq asılmamasını tapşırıblar. Şəhid atası Rasim Abdullayev isə məsələyə öz etirazını bildirərək oğlunun vətən və bu bayrağın dalğalanması üçün şəhid olduğunu, həmçinin, özünün və yoldaşının bu bayraqdan təsəlli aldığını bildirib.
Hadisədən bir gün sonra rayon Əlillər Cəmiyyətinin sədri Neman Yediyarov və rayon Polis İdarəsinin rəis müavini ilə şəhid ailəsinin yaşadığı ünvana yollanıb. Şəhidin evinə gələn şəxslər burada Nurlan Abdullazadənin valideynlərinə qəbirstanlıqdakı bayrağı bir daha oraya asmamaları və girişdə quraşdırdıqları Nurlanın şəklini əks etdirən plakatı sökmələri üçün onlara təzyiqlər ediblər.(Gununsesi.info)