Azinforum.az İnformasiya Portalı Onlayn Xəbər Portalı
Eldar Mahmudov və onun MTN-də yüksək vəzifə tutan əlaltılarının qeyri-adi hobbiləri barədə mətbuatda az dərc olunmayıb. Xüsusilə də, sabiq MTN generalı Mövlam Şıxəliyevin “çılğın” it həvəskarı olması barədə ölkə mətbuatından bu sətirlər diqqəti çəkir:
“Sabiq MTN generalı Mövlam Şıxəliyev Novxanıdakı bağ massivində öz itləri üçün sözün həqiqi mənasında saray hesab ediləcək it damı inşa etdirib. Hansı ki, öz möhtəşəmliyi ilə göz oxşayan bu “damı” M.Şıxəliyevin köpək sevgisinin yaratdığı xarüqə də adlandırmaq olar. Mənbənin sözlərinə görə, aqlaylarla əhatələnən it damlarında sabiq general alman və Dağıstan sortu olan itlər saxlayır ki, bu itlərə göstərilən baxım uzun illərdir ki, dillər əzbəridir. Belə ki, sözügedən itlərin qidalanmasına, tibbi baxımına, təliminə fantastik dərəcədə pul xərcləyən M.Şıxəliyev, məlum “MTN işi”ndən sonra da bu xobbisindən əl çəkmiş deyil. Bu gün də Novxanıdakı villasına ara-sıra baş çəkən MTN generalı itləri ilə birlikdə zaman keçirmək ənənəsinə sadiqlik nümayiş etdirir” (bizimyol.info).
Bu günlərdə Qafqaznews.az və Legion.az saytlarında sabiq MTN polkovnik-leytenantı İlham Qasımzadə və onun sahibkar dostu “BSC Group”un rəhbəri İkram Mütəllimov tərəfdindən aldadıldığını və şərlənərək həbs olunduğunu iddia edən Kürdəxanı sakini Hacı Hənifə Həşimovun şikayəti dərc olunmuşdu. Şikayətin araşdırılması zamanı, İlham Qasımzadənin hələ bir il bundan əvvələ qədər Azərbaycan Milli Karate Federasiyasında 1-ci vitse-prezident olduğu və Beynəlxalq Bankda da yüksək vəzifə tutduğu müəyyən olunmuşdu. Bu barədə İ.Qasımzadənin özü də Qafqaznews.az-a açıqlamasında təsdiqləmişdi.
İyunun 28-də redaksiyamıza İlham Qasımzadə ilə bağlı daha maraqlı bir məlumat daxil oldu. Belə ki, əldə etdiyimiz məlumata görə, İlham Qasımzadə Namiq Abbasov dövrünün yetişdirdiyi kadrlardan olsa da, MTN-də rəhbərlik dəyişdiyi vaxtda belə, öz mövqeyini qoruyub saxlayıb və istər Mahmudovla, istər onun əhatəsindəki generallarla, istərsə də ABB rəhbəri Cahangir Hacıyevlə isti münasibətlər yaradıb. Legion.az-a məlumat verən mənbə bildirir ki, uzun illərdir it həvəskarı olan və hətta it həvəskarları üçün ictimai təşkilat yaradıb xaricdə əlaqələr quran İlham Qasımzadə Mahmudov-Hacıyev cütlüyünü də məhz bu hobbisi ilə özünə bağlayıb.
Mənbənin məlumatına görə, həm Badamdarda villası, həm də Kürdəxanıda iki hektara yaxın böyük bağları olan İlham Qasımzadə tez-tez bağında MTN “çətə”sinə qonaqlıq verib və it boğuşdurma tamaşaları təşkil edərək, onların “könlünü ovlayıb”. Məlumata görə, çılğın it həvəskarı olan sabiq MTN generalı Mövlam Şıxəliyev də bu mövzuda məhz İlham Qasımzadə ilə məsləhətləşib və xaricə səfərlər edərək “paroda” itlər gətirməsi üçün maliyyə buraxıb. Mənbə bildirir ki, ikisinin də it sevgisinə görə, onların arasında sıx dostluq yaranıb və hətta birlikdə it boğuşdurma “turnir”ləri təşkil edərək, imkanlı adamlar arasında “mərc”lər təşkil ediblər. Eyni zamanda, M.Şıxəliyev, A.Çovdarov və digər generallar üçün “şilləvuran”ların hazırlanmasında da böyük rolu olan şəxslərdən biri kimi, məhz İlham Qasımzadənin adı hallanır.
Maraqlıdır ki, müxtəlif internet saytlarında İlham Qasımzadə təkcə AMKF-nin vitse-prezidenti kimi yox, həm də “Qafqaz İt Cinsləri” İctimai Birliyinin sədri kimi təqdim olunur. Müxtəlif saytlarda hətta İlham Qasımzadənin beynəlxalq sərgilərə çoban itləri aparması barədə məlumatlar və bu şəxsin çoxsaylı fotoları dərc olunub. “Bu qədər təsadüf ola bilərmi?” sualı bizi vadar etdi ki, İlham Qasımzadənin özü ilə əlaqə saxlayaq. Lakin İ.Qasımzadə Legion.az-ın zənglərinə cavab vermədi. Araşdırmamız davam edir…
Xatırlatma: Hənifə Həşimovun Qafqaz Xəbər Agentliyinə yazdığı ərizəsində deyilir:
“Mən sabiq MTN polkovnik-leytenantı, Azərbaycan Milli Karate Federasiyasının vitse-prezidenti və Beynəlxalq Bankın nümayəndəsi olan İlham Niyazi oğlu Qasımzadə və “Business Service Centre” şirkətinin rəhbəri İkram Mütəllimov tərəfindən aldadılmışam. 2002-ci ildə İlham Qasımzadə mənə bildirdi ki, oğlum Əlövsət Həşimov hərbi xidmətə gedib rütbə alsın, onu da MTN-ə düzəltdirməyə kömək edəcək. 2003-cü ildə mənə dedi ki, bu işin xərci var, yaxşı əlaqələri olan İkram Mütəllimov sənə kömək edə bilər. 2003-cü ilin oktyabrında İkram Mütəllimovla İlham Qasımzadənin vasitəçiliyi ilə görüşdük. Onlar Məhəmmədi bələdiyyəsindən uzunmüddətli icarə götürdüyüm 8 hektarlıq torpaq sahəsinin 2 hektarını istədilər. Onların şərtinə görə, mən 2 hektardan imtina etdim, İkram Mütəllimovun adına keçirildi”.
H.Həşimovun sözlərinə görə, oğlu o müddətdə MTN-də müsahibəyə gedib-gəlirdi, İlham Qasımzadə isə deyirdi ki, əmri yaxınlarda veriləcək.
“Bir müddət sonra İlham Qasımzadə mənə dedi ki, sənin oğlun 9 yaşında Məşhəd və 11 yaşında Həcc ziyarətində olub (özümlə aparmışdım), ona görə müsahibədən keçməyib. İlham mənə dedi: “Fikir eləmə, 3-4 aydan sonra yenidən sənədləri toplayıb təqdim edərik, söz verdiyimiz kimi iş düzələr”.
2004-cü ildə müxtəlif bəhanələrlə və “dövlət məmurlarının sənin torpaqlarından xoşu gəlir” iddiası ilə məndən yenə də torpaq istədilər və imtina edəcəyim halda, ehtiyatda olan zabit kimi, oğlumu cəbhə bölgəsinə göndərməklə qorxuzdular. 4 hektarı da İkram4f8183 Mütəllimov öz oğlu Əhmədin adına keçirdi. Mən torpaqları geri tələb etdiyimdə, İlham dedi ki, darıxma, pul ver, oğlunu Sərhəd Xidmətində xarici əlaqələr şöbəsinə düzəldim. İlham Qasımzadə məndən ilin sonunda 22 min dollar aldı. Mən torpaqların hesabını soruşduqda, “İlham Qasımzadə mənə “cin ayrı, şeytan ayrı” deyə cavab verdi”, – deyə H.Həşimov vurğulayıb. O qeyd edib ki, bir müddət sonra, aldadıldığını anlayaraq, dəfələrlə İlham Qasımzadə və İkram Mütəllimovla görüşüb, torpağını və pulunu tələb etdi.
“Lakin mənə dedilər ki, hara gedirsən get, respublika əlimizdədir. Mən dəfələrlə hüquq mühafizə orqanlarına şikayət eləsəm də, İlham Qasımzadə və İkram Mütəllimov müxtəlif vasitələrlə mənim işimi uzadıblar. Hətta məni dəfələrlə şərləyib həbs etdirməyə də çalışıblar. Eyni zamanda, İlham Qasımzadə mənə müxtəlif vasitələrlə təzyiq göstərirdi, öldürməklə belə hədələyirdi. Bir dəfə İlham Qasımzadə üstümə tapança da çıxarıb. Mən bu süründürməçilikdən bezərək, Azərbaycan Prezidenti İlham Əliyev cənablarına məktub yazmışam. Amma bu məktublar kimlərsə tərəfindən “itirilib”.
Sonda mən təngə gələrək, 2006-cı il iyunun 29 və iyulun 25-də iki dəfə dövlət başçısının kortecinin qarşısına çıxmağa, dərdimi Cənab Prezidentə şəxsən bildirməyə çalışdım. Lakin heç bir günahım olmadan, MTN-çilər tərəfindən təxribatda günahlandırılmışam, Səbail rayon Məhkəməsinin hökmü ilə 221.2.1 və 221.2.2-ci maddəsi ilə təqsirli bilinərək, 2 il 6 ay müddətinə həbs olunmuşam. 2009-cu il yanvar ayının 25-də azadlığa çıxdım, ondan sonra dəfələrlə bu işin sonuna çıxmağa, İlham Qasımzadədən şikayətlər verərək, ədalətə nail olmağa çalışmışam. Lakin heç bir nəticə hasil olunmayıb. Eldar Mahmudov MTN başçısı vəzifəsindən azad olunduqdan sonra, dəfələrlə hüquq mühafizə orqanlarına müraciət etsəm də, yenə də İlham Qasımzadə və İkram Mütəllimov barəsində tədbir görülməyib. Yazıb sizdən xahiş edirəm, məni aldadan bu şəxslərin ifşa olunmasında və haqlarımın bərpasında dəstək verəsiniz”, – deyə şikayətçi bildirib. 2003-cü ildə MTN başçısı Namiq Abbasov olub, lakin Eldar Mahmudovun nazir olduğu vaxtlarda da İlham Qasımzadənin cəmiyyətdə fəal çıxış etməsi, Karate Federasiyasında və Azərbaycan Beynəlxalq Bankında rəhbər vəzifələr tutması bir sıra suallar doğurdu. İyunun 20-də araşdırma zamanı, İlham Qasımzadənin özüylə əlaqə saxladıq.
İlham Qasımzadə daha Karate Federasiyasında çalışmadığını, “dövlət qulluğunda olduğunu” bildirdi. “O adam mənim qanımı içir, illərdir ailəmə də əziyyət verir. Dedikləri şər-böhtandır. Onunla bağlı dəfələrlə prokurorluq araşdırıb, məhkəmə keçirilib. Heç nə sübut edə bilməyib”, – deyə İ.Qasımzadə qeyd etdi.
“Axı onun sizinlə başqa nə problemi olub ki, belə düşmənlik etsin? Eyni kənddənsiniz, səbəbsiz yerə sizdən şikayət edir?” – deyə maraqlandıq. “Mən o vaxt ona “posrednik” olmuşam. Sadəcə xahiş edib, köməklik etmişəm”, -deyə İlham Qasımzadə bildirdi. İ.Qasımzadənin sözlərinə görə, Hənifə Həşimov torpaq satmaq istəyib, o da öz növbəsində onu İkram Mütəllimovla tanış edib. H.Həşimovun oğlunun MTN-ə işə düzəlməsi məsələsinə gəlincə isə… İlham Qasımzadə bizimlə birinci söhbətində kömək etməyə çalışdığını, amma alınmadığını bildirdi. Növbəti dəfə isə (özü yenidən bizə zəng etdiyində) bildirdi ki, bu məsələ Namiq Abbasovun vaxtında olub, o vaxtı kimisə tanışlıqlıa MTN-ə düzəltmək mümkün deyildi (Qafqaznews.az).
Legion.az olaraq, araşdırmanı davam etdirdik. Hənifə Həşimov bizə Məhəmmədi Bələdiyyəsinin ona 4 hektar torpaq ayrılması 2003-cü il 15 may tarixli qərarını və 2 hektar torpaq ayrılması barədə 5 noyabr 2003-cü il tarixli qərarını təqdim etdi. H.Həşimov 2005-ci il fevralın 17-də Abşeron Rayon Məhkəməsinə müraciət edərək, İkram Mütəllimovu ona məxsus mülkiyyəti qanunsuz zəbt etməkdə günahlandırıb. Hənifə Həşimov İkram Mütəllimovun məhkəməyə etiraz məktubun surətini də Legion.az saytına təqdim edib. “Mənimlə Hənifə Həşimov arasındakı şifahi razılaşmaya görə, o, üç hektar torpaq sahəsinin icarə hüququnu mənə satmalı idi. İki hektar torpağın arenda sənədlərini o dərhal mənim adıma rəsmiləşdirməli idi. Bir hektarın sənədləşdirilməsi isə bir müddət sonra olmalı idi. Şifahi razılaşmadan sonra isə Hənifə Həşimov məndən 5 min dollar aldı. O, ilk mərhələnin reallaşmasını təmin etdi. 2003-cü ilin 5 noyabrında mənim Məhəmmədi Bələdiyyəsi ilə müqaviləmə görə, bu torpaq sahəsi mənə icarəyə verildi. 2003-cü il noyabrın 11-də Dövlət Torpaq və Xəritəçəkmə Komitəsinin Abşeron Rayon Şöbəsi tərəfindən mənə torpaqların müvəqqəti istifadəsinə dair şəhadətnamə verildi. Həmin gün mən Hənifə Həşimova 2 min dollar verdim. 2004-cü ildə isə isə Hənifə Həşimova 3 min dollar verdim”, – deyə İkram Mütəllimov məktubda qeyd edib.
Xatırladaq ki, Hənifə Həşimov torpaq mülkiyyətçisi deyil və torpaq sahəsindən müvəqqəti istifadə edən icarədar onu sata bilməzdi. Məhəmmədi Bələdiyyəsinin sədri Vaqif Məmmədov Legion.az-a bildirib: “Heç kim Bələdiyyə mülkiyyətini almaq hüququna malik deyil. Bu alqı-satqı ləğv olunmalıdır”. Biz dəfələrlə İkram Mütəllimovun da münasibətini öyrənməyə çalışdıq. Lakin İ.Mütəllimov zəngimizə cavab vermədi.
