“Ailə-məişət problemlərindən bəhs edən filmlərin vaxtı keçib”

Müasir Azərbaycan kinosunda ard-arda çəkilən filmlər tamaşaçı marağının göstəricisi kimi qiymətləndirilir. Film istehsalçıları tamaşaçılara daha çox komediya janrında çəkilmiş filmlər təqdim edirlər.

Gənc yazıçı Orxan Bahadırsoy Sputnik Azərbaycan-a deyir ki, çəkilən filmlər tamaşaçının marağını qarşılayır: “Düşünürəm ki, sənət tamaşaçı marağına görə hesablanmalı deyil. Tamaşaçı marağını təkmilləşdirmək üçün ali səviyyəli filmlər çəkilməlidir. Ancaq bu, film istehsalçıları üçün əlverişli deyil. Ona görə də mövzu, çəkiliş baxımından münasib filmlər çəkilmir. Bəsit, bayağı komediyalar, ailə-məişət problemləri mövzusunda çəkilən filmlər isə artıq işə yaramır. Onların son istifadə müddəti artıq bitib” — deyə o bildirib.