Azinforum.az İnformasiya Portalı Onlayn Xəbər Portalı
Xızı rayonunun Baxışlı kənd sakini Şıxəliyev Pərviz Talıb oğlu Xızı rayon icra hakimiyyətinin başçısı Xəzər Aslanovun onun torpağına göz dikdiyini deyib.
Avropa.info xəbər verir ki, bu barədə P. Şıxəliyevin redaksiyamıza ünvanlandığı məktubda bildirilir.
P. Şıxəliyev 2003-cü ildə Baxışlı kəndi ərazisində sahibkarlıqla məşğul olmaq məqsədilə 0.6 ha torpaq sahəsi alıb.
P. Şıxəliyev sabiq icra başçısı Vaqif Abdullayevin sərəncamı və rayonun baş memarı Elxan Həsənovun layihəsi əsasında eskiz planını hazırlanaraq, öhdəsinə verilən torpaqda həmin dövrdən kiçik bir kafe işlətdiyini bildirir.
Onun aldığı torpaq sahəsində 2011-ci ildə Dövlət Reyestr Xidmətinin verdiyi çıxarış və Dövlət Torpaq və Xəritəçəkmə şəhadətnaməsinin rəyi əsasında tikintiyə icazə belə var.
P. Şıxəliyev bildirir ki, onun işlətdiyi müəssisə ona yaxın ailənin dolanışığını təmin edir. Amma 2012-ci ildə Xəzər Aslanovun rayonun icra başçısı təyin olunmasından sonra hər şey günü-gündən pisə gedir:
“Kafemizə gələn icra başçısı nahar etmək istəyərkən biz ona oturmaq üçün yer göstərdik. Amma o həmin yeri bəyənməyərək, mənimlə mübahisə etdi və gedəndə də dedi ki, “səni işləməyə qoymayacam və obyektini sökdürəcəm”.
Sahibkar hər şeyin məhz bundan sonra başladığını deyib. O bildirir ki, qaz, su, işıq idarələrinin əməkdaşları, vergi müfəttişliyinin, sanitar epidemioloji stansiyanın işçiləri obyektə gələrək, yerli-yersiz cərimələr yazırlar.
P. Şıxəliyevin dediyinə görə, icra başçısının təzyiqi ilə Xızı rayon məhkəməsi sözügedən obyektin sökülməsi haqda qərar verib. Daha sonra sahibkar vəkil tutaraq Apelyasiya Məhkəməsinə və Ali Məhkəməyə müraciət etsə də dəyişən bir şey olmayıb.
Sahibkar bundan sonra icra başçısına dəfələrlə müraciət etsə də onun müraciətləri cavabsız qalıb. O deyir ki, icra başçısının ona tək sözü, “get, kimə şikayət edirsən, et”, olub.
Məsələni diqqətdə saxlayacağıq. Mövzu ilə bağlı qarşı tərəfin də mövqeyini dərc etməyə hazırıq.
