Çərşənbə axşamı , Sentyabr 17 2019
Ana səhifə / Gündəm / Bakıda toyuq əti bahalaşdığı halda, dönərin qiyməti necə ucuzlaşır? – FOTOLAR

Bakıda toyuq əti bahalaşdığı halda, dönərin qiyməti necə ucuzlaşır? – FOTOLAR

Bakıda ətin qiyməti bahalaşsa da, dönər satılan yerlərdə qiymətlər ucuzlaşıb. Belə ki, paytaxt ərazisində bəzi dönərxanalarda toyuq ətindən hazırlanan dönər və ayran cəmi 1 manata satılır.

Musavat.com-un əməkdaşı metronun “Elmlər Akademiyası” və “Qara Qarayev” stansiyaları ətrafında yerləşən dönərxanalarda olub. Hansı ki, bu dönərxanalarda toyuq ətindən hazırlanan dönərlərin qiyməti 1 manatdır.

Öncə məlumat üçün qeyd edək ki, ötən ay mal və qoyun ətindən sonra toyuq ətinin də qiymətində firmasından asılı olaraq 20-50 qəpik arasında bahalaşma oldu. Hazırda toyuq ətinin kiloqramı 4-4.30 AZN-ə satılır.

Bəs, 1 manata dönər üstündə də ayran satanların qazancı nədir? Və ya bu ətlər doğrudanmı təmiz ətlərdir?

İlk olaraq metronun “Elmlər Akademiyası” stansiyasının yaxınlığında ard-arda düzülən dönərxanalarda olduq. Müşahidə etdik ki, buradan dönər alanların əksəriyyəti tələbələrdir. Dönər satılan yerdə anti-sanitariya qaydalarına əməl etdilməsindən isə heç danışmağa da dəyməz. Bir nəfərin güclə dayandığı kiçik dönərxanada dönərçi tez-tez çörəkləri kəsir, sifarişləri yerinə yetirməyə çalışır.

Hər gələn müştəridən pulu alır, xırdalayır və yenidən əlçəksiz formada dönəri hazırlamağa davam edir. Çörəyin arasına toyuq ətindən başqa nələrin qoyulduğunu öyrənmək üçün, bir dönər də biz aldıq. Müşahidə etdik ki, az miqdarda olsa da çörəyin arasında dönərin hazırlanması üçün lazım olan bütün ərzaqlar var.

Bəs, qiymətin nə üçün bu qədər ucuz olduğunu soruşduğumuzda isə dönərçilər bildirdilər ki, müştərilərinin çoxu tələbələr olduğu üçün qiyməti belə ucuz edirlər. Söylədilər ki, toyuq əti ilə yanaşı istifadə etdikləri digər ərzaqlar da təzə və təmizdir…

Metronun “Qara Qarayev” stansiyasının yaxınlığında sıra ilə düzülmüş dönərxanalarda da vəziyyət oxşardır. Fərq odur ki, burada dönərxanalarda oturmaq üçün də yer var. Oturmaq üçün yer, bir ədəd ayran və bir dönərin isə qiyməti yuxarıda da qeyd etdiyimiz kimi 1 manatadır. Buradan dönər alanlar əsasən həmin ətrafda olan mağazalarda çalışanlardır. Dönərçilər bildirdilər ki, ətlərinin təmizliyinə söz ola bilməz. Bir neçə tanınmış firmanın adını sadalayaraq söylədilər ki, əti həmin firmalardan alırlar.

Alıcılarla söhbətimiz zamanı onlar isə bildirdilər ki, dönərlərin təmiz olmasına şübhə edirlər, lakin ucuz olduğu üçün yox da deyə bilmirlər…

Məsələ ilə bağlı musavat.com-a danışan Azad İstehsalçılar Birliyinin sədri Eyyub Hüseynov bildirib ki, bu sahə dövlət tərəfindən tam nəzarətsiz buraxılıb: “Hələ iki il əvvəl biz dönərxanalarla bağlı standart hazırlamışdıq. Bizim monitorinqlər göstərdi ki, Bakıda 95 faiz dönərxanalar standarta uyğun yerlərdən ət almırlar. Ona görə də uşaq bağçaları, məktəb bufetləri demək olar ki, yeyinti sənayesinin bütün sferası nəzarətsizdir. Bu yerlərdə hər bir ətdən istifadə oluna bilər. Dövlət orqanlarının heç bir müdaxiləsi olmadan tam nəzarətsiz formada fəaliyyət göstərirlər. Ona görə də ölkə prezidentinin fevral ayında Qida təhlükəsizliyi agentliyinin yaradılması ilə bağlı verdiyi fərman çox yerinə düşür. Bu agentlik fəaliyyətə başladıqdan sonra güman edirik ki, vəziyyət dəyişəcək. Bizim hazırladığımız standarta görə, bir dönərin qiyməti, şəhərdə ən baha satılan dönərin qiymətindən təxminən 20 qəpik baha idi. Yəni 1 manata normal dönərin hazırlanması mümkün deyil”.

 

Həmçinin oxuyun

Vidadi Zeynalovun oğlu ilə bankir kürəkəninin şirkəti haqda sənədlər yayıldı

Rabitə və Yüksək Texnologiyalar Nazirliyinin sabiq aparat rəhbəri Vidadi Zeynalov azadlığa çıxdıqdan sonra Şamaxıdakı restoran …

Bir cavab yazın