Cümə axşamı , İyul 18 2019
Ana səhifə / Gündəm / AMEA-nın Fizika İnstitutuna ayrılmış vəsaitlərin xərclənməsində nöqsanlar aşkarlanıb

AMEA-nın Fizika İnstitutuna ayrılmış vəsaitlərin xərclənməsində nöqsanlar aşkarlanıb

Hesablama Palatasının Kollegiyası dövlət büdcəsindən 2013-2015-ci illərdə Azərbaycan Milli Elmlər Akademiyasının (AMEA) akademik H.M. Abdullayev adına Fizika İnstitutuna ayrılmış vəsaitlərin proqnozlaşdırılması və istifadəsi vəziyyəti ilə bağlı həyata keçirilmiş auditin nəticələri üzrə hesabatı müzakirə edərək təsdiq edib.
Palatadan Trend-ə verilən məlumata görə, AMEA-nın akademik H.M. Abdullayev adına Fizika İnstitutu dövlət büdcəsindən ayrılmış vəsaitləri 2013-cü ildə 99,4%, 2014-cü ildə 97,4% və 2015-ci ildə 97,6% səviyyəsində icra edib, auditin əhatə etdiyi hər bir il üzrə AMEA tərəfindən İnstitutun xərclər smetasında müvafiq qaydada bir neçə dəfə dəqiqləşdirmə aparılıb. Audit tədbiri ümumilikdə 11719,2 min manat məbləğində vəsaiti əhatə edib, Fizika İnstitutunun 2015-ci il üçün saxlanılması xərcləri 2013-cü illə müqayisədə 0,97% çox, 2014-cü illə müqayisədə isə 1,15% az olmaqla 3903,9 min manat təşkil edib.
Əməyin ödənilməsi ilə bağlı fəaliyyətin araşdırılması zamanı müəyyən edilib ki, İnstitut tərəfindən tarif dərəcələri düzgün tətbiq olunmayıb, Əmək Məcəlləsinin bəzi tələblərinə əməl edilməməsi nəticəsində işçilərə əlavə əmək haqqı ödənilib, keçirilmiş beynəlxalq səviyyəli tədbirlərdə yerli iştirakçıların sayının çox göstərilməsi nəticəsində artıq büdcə vəsaiti xərclənib.
Auditlə əhatə olunan dövrdə altı elmi proqrama 1622,4 min manat vəsait sərf edilib, bu məbləğin 44,5%-ni əmək haqqı və 9,8%-ni sosial-sığorta xərcləri təşkil edib, 17,8%-i malların (işlərin və xidmətlərin), 21,2%-i əsas vəsaitlərin və 6,7%-i proqram təminatının alınması ilə bağlı olub. Elmi proqramların araşdırılması zamanı bir halda internetə çıxışının təmin olunmaması səbəbindən proqramın daimi işlək vəziyyətdə olmadığı, proqram təminatının istifadəsinə xüsusi lisenziyanın tələb olunmadığı halda bu məqsədlə vəsait xərc edildiyi, eyni zamanda elmi proqramlar üçün ayrılmış ezamiyyə xərclərinin digər işçilərin ezamiyyə xərclərinin ödənilməsinə yönəldildiyi müəyyən olunub.
Maliyyə hesabatlarının təhlili zamanı müəyyən edilib ki, İnstitutun ehtiyatları əvvəlki dövr ilə müqayisədə 30,2 min manat və ya 15%, əsas vəsaitləri 9449,5 min manat və ya 3 dəfə artıb, debitor borclar 7732,0 manat və ya 38%, qısamüddətli kreditor borclar isə 2375,0 manat azalıb. Qeyd edilib ki, əsas vəsaitlərin artımı əvəzsiz verilmiş vəsaitlər hesabına olub, eyni zamanda gəlir vergisi və sosial sığorta haqqı üzrə ilin sonuna debitor borc yaranıb.
Hesablama Palatasının Kollegiyası Azərbaycan Milli Elmlər Akademiyasının akademik H.M. Abdullayev adına Fizika İnstitutu tərəfindən yol verilmiş nöqsanların əsasən audit dövründə aradan qaldırıldığını nəzərə almaqla müəyyən edilmiş digər nöqsan və çatışmazlıqların qısa müddət ərzində aradan qaldırılması, həmçinin nöqsanlara yol vermiş vəzifəli şəxslərin Azərbaycan Respublikasının qanunvericiliyi ilə nəzərdə tutulmuş qaydada məsuliyyətə cəlb edilməsi barədə qərar qəbul edib, icra olunması və həyata keçirilmiş tədbirlər barədə Hesablama Palatasına məlumat verilməsi məqsədilə qərarın surəti Azərbaycan Milli Elmlər Akademiyasının akademik H.M. Abdullayev adına Fizika İnstitutuna göndərilib.
Auditin nəticələri ilə bağlı Milli Məclisə və aidiyyəti üzrə AMEA-ya məlumat verilib.

Həmçinin oxuyun

Vilayət Eyvazovdan yeni əmr: “Bandotdel”ə rəis təyin olundu – Əbülfət Rzayev kimdir? + FOTO

Daxili İşlər Nazirliyinin Baş Mütəşəkkil Cinayətkarlıqla Mübarizə İdarəsinə (BMCMİ) yeni rəis təyin olunub.Mia.az Strateq.az-a istinadla xəbər …

Bir cavab yazın