Bazar , Noyabr 29 2020
Ana səhifə / Dünya / Sərkisyan üçün son gün elan edildi: polis həbslərə başladı – Canlı

Sərkisyan üçün son gün elan edildi: polis həbslərə başladı – Canlı

İrəvanda bu gün etirazlar yenidən başlayıb.

Azinforum.az xəbər verir ki, etirazçılar artıq şəhərin müxtəlif hissələrində toplaşırlar.

Səhər saatlarından etibarən polis də hərəkətə keçib. Belə ki, polis aktivist David Sanasaryan və daha bir neçə şəxsi həbs edib. Sanasaryan həbsi zamanı etirazçılara sosial şəbəkələr vasitəsilə müraciət edib:

“Biz sizi sevirik. Əmin olun ki, tez, ya gec, hər şey dəyişəcək. Serj Sərkisyan hamımızı manipulyasiya edə bilməz”.

Sanasaryanın bu müraciətindən az sonra onun telefonu əlindən alınıb.

Sanasaryanla bərabər, gecə İrəvan məhkəməsi daha bir aktivistin – Tiqran Mazmanyanın 2 aylıq həbsi ilə bağlı qərar qəbul edib. O, kütləvi iğtişaşlar təşkil etməkdə ittiham olunub.

Nikol Paşinyan isə bugünkü mitinqin başlanğıcında yenidən etirazçılara müraciət edib. O bildirib ki, bugünkü etirazlar Serj Sərkisyanı hakimiyyətdən getməyə məcbur etməlidir:

“Əminəm ki, bizim işimizin nə qədər çətin olmasına baxmayaraq, tezliklə qələbə gələcək. Bizim əsas fəaliyyətimiz Ermənistanın bütün yolları və avtomagistrallarını bağlamaqdır. Polis onların yerini dəyişə bilməz”.

O, yolları yük maşınları ilə bağlayacaqlarını bildirib və bunun üçün yük maşınları və traktor sürücülərinə müraciət edib.

Polis indidən Paşinyanın həbsinə cəhd edir.

***

İrəvanda etirazçılar Gülbenkyan küçəsində toplaşıblar. Onlar əvvəlcə yolu bir neçə avtomobillə bağlasalar da, polis onların fəaliyyətinə mane olub. Yolu bağlayan maşın polis evakuatoru tərəfindən aparılıb.

Aksiyaçılar polisin daha bir neçə nəfəri həbs etdiyini bildiriblər.

***

Ermənistan polisi səhər saatlarından etibarən 16 nəfəri saxlayıb.

Qeyd edək ki, dünənki aksiyalar zamanı ümumilikdə 122 nəfər saxlanılmışdı.

***

İrəvandakı həbslər zamanı polis güc tətbiq edib.

Mətbuat bu gün həbs edilənlər arasında aktivist Kristina Poqosyanın da olduğunu bildirib. Onun polis tərəfindən zorakılığa məruz qaldığı, buna görə də polis bölməsinə aparıldıqdan sonra təcili yardım çağırıldığı vurğulanıb.

***

Ermənistan polisi tərəfindən İrəvanda həbs edilənlərin sayı 37-yə çatıb.

Nikol Paşinyan erməni aktivistlərin həbsi ilə bağlı jurnalistlərə açıqlama da verib. O, Ermənistan İctimai Radiosuna edilən hücumun məsuliyyətini özünün daşıdığını bildirib:

“Tiqran Mazmanyan iki aylıq həbs edilib. Polis etirazçıları yox, məni həbs etsin. Mən bu dəhşətlər qarşısında sizi təslim olmamağa səsləyirəm”.

 

Həmçinin oxuyun

Putin Təhlükəsizlik Şurasını yenə topladı

Rusiya Prezidenti Vladimir Putin bu gün Rusiya Təhlükəsizlik Şurasının daimi üzvləri ilə toplantıda Dağlılq Qarabağdakı …