Cümə , Aprel 12 2024
Ana səhifə / Dünya / Moskvadakı hadisədə 137 nəfərin öldüyü bildirilir

Moskvadakı hadisədə 137 nəfərin öldüyü bildirilir

Rusiyanın Səhiyyə Nazirliyi “Crocus City Hall” konsert zalında baş vermiş terror aktı nəticəsində 137 nəfərin həlak olduğunu açıqlayıb.

Bu barədə nazirlik martın 24-də məlumat yayıb.

Nazirlik qeyd edib ki, hazırda terror aktı yerində 3-ü uşaq olmaqla 137 nəfərin meyiti tapılıb: “Hadisə yerinə baxış davam edir. Bu günə kimi 62 meyitin şəxsiyyəti müəyyən edilib”.

“107 nəfər stasionar, daha 44 nəfər isə ambulator müalicədədir”, – deyə nazirlik əlavə edib.

Martın 22-də Rusiyanın paytaxtı Moskvada “Crocus City Hall” konsert zalında terror aktı törədilib.

Martın 23-də Rusiya İstintaq Komitəsi terror aktı törətməkdə şübhəli bilinən 4 nəfərin Ukrayna ilə sərhəd yaxınlığında saxlanıldığı barədə məlumat yaymışdı.

Ancaq “İnterfaks” Kremlin mətbuat xidmətinə istinadən xəbər verir ki, Federal Təhlükəsizlik Xidmətinin direktoru Aleksandr Bortnikov Prezident Vladimir Putinə terror aktı törətməkdə şübhəli bilinən dörd nəfər də daxil olmaqla, 11 nəfərin saxlanıldığını bildirib.

Bu gün Rusiyada Ümumxalq hüzn günüdür.

Həmçinin oxuyun

Ukraynada 600-ü uşaq olmaqla 11 minə yaxın mülki şəxs ölüb

Birləşmiş Millətlər Təşkilatının (BMT) Təhlükəsizlik Şurasında(TŞ) Ukraynadakı vəziyyətlə bağlı iclas keçirilib. “Report”un ABŞ bürosu xəbər …