Azinforum.az İnformasiya Portalı Onlayn Xəbər Portalı
Əməkdar artist Rəhman Rəhmanov bir neçə gün əvvəl bildirmişdi ki, əgər sənətlə bağlı televiziya verilişlərinə qatılırsa ona mütləq qonorar ödənilməlidir. O həmçinin qeyd edib ki, bu ən-ənə ona məşhur sənətkarlarımız olan Yaşar Nuri və Siyavuş Aslandan ötürülüb:
“Məsələn, Yaşar Nuri və Siyavuş Aslan mənə həmişə deyirdilər ki, nə badə qonorarsız verilişlərə gedəsən, qonorarını al get. Hər ikisi böyük sənətkar idi, hər ikisi də verilişlərdən qonorar alırdı. Burda nə var ki?” deyə o bildirmişdi.
Mövzu ilə bağlı moderator.az-a Siyavuş Aslanın oğlu Eldar Aslan müsahibə verib.
“Mən Rəhman Rəhmanovun dediklərini dəstəkləyirəm, çünki aktyorluq da bir peşədir, onlar da öz zəhmət haqlarını almalıdırlar. Sənətçi öz işindən əlavə bir yerə dəvət olunursa mütləq ona qonorar ödənilməlidir. Bütün dünya praktikasında bu belədir. Sadəcə bizdə bu məsələyə qeyri-adi baxırlar. Televiziyalar ən yaxşı ulduzları dəvət edib, auditoriyanı çoxaldırlar, reytinq qazanırlar. O ki, qaldı Siyavuş müəllimin verilişlərə qonorar müqabilində getməsinə. Sözün düzü o bu mövzunu mənimlə müzakirə etməyib, amma ümumi götürəndə Siyavuş Aslan da, Yaşar Nuri də çox tanınmış aktyorlar idi. Onları bir çox yerlərə dəvət edirdilər, təbii ki, onlar müqavilə bağlayıb verilişlərə də gəliblər, qonorarlarını da alıblar. Bu həm verilişlərdə olub, həm də tədbirlərdə. Çünki onlar bilirdilər ki, adları ilə bağlı olan verilişlər böyük tamaşaçı kütləsi gətirəcək. Bunlar da orada öz vəzifələrini yerinə yetirib, qonorarlarını alıblar” deyə Eldar Aslan bildirib.
Mərhum aktyorumuz Yaşar Nurinin həyat yoldaşı Rəhimə Nuriyeva da Rəhman Rəhmanovun dediyi sözləri təsdiqləyib.
“Biz Yaşar müəllimlə evlənən ilk günündən son gününə qədər bu insan o qədər çəkilişlərdə olurdu ki.. Əsas da bir dövlət televiziyası var idi, AzTV. Bayram, Novruz çəkilişlərində çəkilirdi. Hamısında mütləq şəkildə Yaşar olmalı idi. O çəkildiyi verilişlərdən əlbəttə ki, qonorar alırdı. Qonaq kimi gedib kiminsə haqqında danışıb, müsahibə verirdisə o pul almırdı. Belə olan halda Yaşarın pul istəməyinin yeri də yox idi. Heç vaxt Yaşara deyə bilməzdim ki, sən qonorar aldın, almadın, gətirdin, gətirmədin. O həmişə kişi kimi evə pul gətirirdi. Kiminləsə telefonda danışanda mən bu mövzuları eşidirdim. Son vaxtlar Siyavuş Aslan ona deyirdi ki, verilişə gedirsənsə sən qonorar al. O da o bütün verilişlərlə müqavilə bağlayırdı, pulunu alırdı. O insan qonorar istəyə bilər ki, həmin adam sənətdə öz yerini tutsun, onun təcrübəsi olsun, bir sözlə qonorar istəməyə haqqı çatsın. Bunun üçün də illərin iş təcrübəsi lazımdır. Əgər cavan aktyor məşhurdursa o deməkdir ki, televiziya kanalından verilişdə iştirakına görə pul istəməlidir? Bu nə dərəcədə doğrudur? Onlar Yaşar Nuri, Siyavuş Aslan, Hacıbaba Bağırov kimi məşhur sənətkar olsalar, qonorar istəməyə haqları çatar, əks halda yox” deyə Rəhimə Nuriyeva bildirib.Açar sözlər
