“Xankəndi” gəmisi ilə bağlı prezidentə şikayət edildi

“Caspian Marine Services”(CMS) şirkətinin əməkdaşı Həsənov Fariz Fikrət oğlu Prezident İlham Əliyevə, Dövlət Təhlükəsizlik Xidmətinə (DTX)və Baş Prokurorluğa müraciət edib. 

Müraciətin bir surətini də Yenisabah.az-a ünvanlayan Fariz Həsənov CMS şirkətinə məxsus “Xankəndi” gəmisində aşkar şəkildə Azərbaycanın dövlət əleyhinə təbliğat aparılır. Müraciət müəllifi bu məsələdə əsasən gəminin kapitanı Sahil Həziyevi və bossman Cavid Məmmədovu ittiham edir.

“Xankəndi” gəmisinin kapitanı Sahil Həziyev və bossman Cavid Məmmədov gəmini şəxsi təsərrüfatı kimi idarə edir. Gəmi heyətinə isə qul kimi yanaşırlar. Bir neçə dəfə bu cütlüyün qanunsuz əməllərinə görə etirazlar olub.

Amma problem təkcə bu deyil. Məni narahat edən və etirazıma səbəb olan xüsusilə Cavid Məmmədovun dövlətçilik əleyhinə çıxışlarıdır. O açıq-aydın İranın dövlət siyasətini təbliğ edir. Azərbaycanı az qala İranın bir hissəsi kimi görür. Yeznəsinin İran vətəndaşı olması ilə fəxr edir və Azərbaycanda da oradakı kimi şəriət dövlətinin qurulmasının vacib olduğunu deyir.

Şəxsi maraqlarını təmin etmək üçün isə Azərbaycan Prezidentinin adını hallandırır, onun nüfuzuna xələl gətirir. Gəmi heyəti də bütün bunların şahidi olub. Mən onun bu sayaq çıxışlarına sərt şəkildə etiraz etmişəm və baş verənlərlə bağlı kapitan Sahil Həziyevə şikayət məktubu yazmışam. O isə gəmiyə məsul olan şəxs kimi bu təhlükəli məsələni ciddi şəkildə araşdırmaq əvəzinə məktubu üzərimə ataraq qəzəblə “Bu nədir yazmısan?” dedi. Onun nəzərinə çatdırdım ki, daha yuxarı instansiyalara şikayət edəcəm. Sahil Həziyev isə bildirdir ki, kimə istəyirsən şikayət et”, – deyə müraciət müəllifi yazır.

Onun sözlərinə görə, kapitan Sahil Həziyevin özünə arxayın danışması təsadüfi deyil. Fariz Həsənov bildirir ki, onun himayədarı “Azərbaycan Xəzər Dəniz Gəmiçiliyi” QSC-nin sədri Rauf Vəliyevdir. “Sahil Həziyev Rauf Vəliyevin himayədarlığı ilə kapitan vəzifəsinə yüksəlib. Ona güvənərək də gəmini şəxsi təsərrüfatı kimi idarə edir”, – şikayətçi yazır.

Fariz Həsənov “Xankəndi” gəmisində baş verənlərlə bağlı CMS şirkətinin rəhbərliyinə də müraciət edib: “Şikayətlərimin və müraciətlərim gəmidən faktiki olaraq qovulmağımla nəticələndi. Azərbaycan dövlətinin əleyhinə təbliğat aparan, Azərbaycanın bayrağı altında üzən bir gəmidə başqa dövlətin təəssübünü çəkən Cavid Məmmədova isə quru töhmət verildi. Ona dəstək verən, qanunsuz əməllərinə şərait yaradan Sahil Həziyev ümumiyyətlə cəzasız qaldı”.

Müraciət müəllifi bildirir ki, “Xankəndi” gəmisində baş verənlərin araşdırılmasını xahiş edir.

Fariz Həsənov yazır ki, bir müddət “Xankəndi” gəmisində matros kimi çalışıb. Gəmidə baş verənlərə etiraz etdiyi üçün oradan faktiki olaraq qovulub.