Cümə axşamı , Mart 28 2024
Ana səhifə / Cəmiyyət / Texniki Universitetin rektoru haqda yeni iddialar… – REGİONÇULUQ

Texniki Universitetin rektoru haqda yeni iddialar… – REGİONÇULUQ

Azərbaycan Texniki Universitetinin bir qrup müəllimi yenə də sözügedən ali təhsil ocağında yaşanılan neqativ olaylar haqqında həyəcan təbili çalmaqdadırlar. Xatırladaq ki, AzTU ilə bağlı buna qədər də ilginc faktları təqdim etmişdik, amma görünəni odur ki, hələ də aidiyyatı qurumlar susmağa üstünlük verirlər.

Biz isə DİA.AZ-a göndərilən növbəti müraciəti təqdim edirik:”V.Vəliyevin dillərə düşmüş struktur dəyişikliklərinin bir məqsədi də var. Hər dəfə təzə şöbələr yaradıldıqda, köhnələri ləğv olunduqda, o, işçiləri köhnə şöbədən yenisinə keçirmək bəhanəsi ilə onlara ərizə yazdırır, sonra onlarla yeni əmək müqaviləsi bağlayır və bu əmək müqaviləsi də 3 AYLIQ BAĞLANIR. İşçilər də ya bilməyərəkdən, ya da əlacsızlıqdan bu müqaviləni imzalayırlar. Həmin müqavilə 1-2 dəfə üç ay-üç ay uzadıldıqdan sonra daha uzadılmır. İşçiyə deyirlər ki, “biz səni işdən çıxarmırıq ki, sənin müqavilən 3 aylıq idi, sona çatdı, vəssalam”. Bu ləyaqətsiz üsulla neçə-neçə işçini işdən çıxarıb, əvəzinə öz regionundan olan adamları qəbul edib. İndi isə rektor özü şəxsən kafedraları gəzir və işçilərə şəxsən təzyiq edir.

Vilayət Vəliyevin regionçuluq əlaməti əsasında universitetdə həyata keçirdiyi “etnik təmizləmə” artıq indinin özündə AzTU-da müxtəlif region nümayəndələri arasında qeyri sağlam münasibətlər yaranmasına, müxtəlif arzuolunmaz mövzularda söz-söhbətlər gəzməsinə səbəb olub. Bu isə ölkəmizin bugünkü şəraitində qətiyyən yolverilməzdir və bizim dövlətçiliyimizə arxadan vurulan zərbə sayıla bilər.

Rektorun belə “etnik təmizləməsinə” sübut kimi bir neçə faktı da qeyd edək. V.Vəliyev AzTU-ya rektor gələndən sonra bütün prorektorları dəyişdirib, bir nəfərdən – beynəlxalq əlaqələr üzrə prorektor Sübhan Namazovdan başqa. Çünki, S.Namazov rektorla eyni regiondan çıxmadır. V.Vəliyev əndrəbadi bir adla “Rəqəmsallaşma və layihələr üzrə prorektor” vəzifəsi təsis edib və həmin vəzifəyə mənşəcə onunla bir regiondan olan iqtisadçı (???) Rəşad Əliyevi gətirib. Hamıya aydındır ki, rəqəmsallaşma üzrə təyin edilən mütəxəssis informasiya texnologiyaları mütəxəssisi olmalıdır, daha iqtisadçı yox. İqtisadçı nə bilir rəqəmsallaşma nədir. Amma rektor başqa cür düşünür, onun düşüncəsi qeyri-standartdır – kim olur, olsun, təki onun regionundan olsun. Onun rəqəmsallaşdırması heç kimə lazım deyil, təki bu vəzifədə onun öz adamı olsun.

V.Vəliyev AzTU-ya rektor gələndən sonra o vaxt mövcud olan 8 fakültədən 7-sinin dekanlarını dərhal vəzifələrindən kənarlaşdırdı, yalnız biri qaldı, Ərəstun Məmmədov. O da mənşə etibari ilə rektorla bir regionun nümayəndəsidir. Yarım il əvvəl isə rektor Ərəstun Məmmədovun vəzifəsini bir qədər də yüksəldərək, Tədris hissəsinin müdiri təyin etdi (bu, onun dəyişdirdiyi 4-cü Tədris hissə müdiridir). Elmlər doktoru, professor olan yüksək iş qabiliyyətli, universitetdə yüksək nüfuz qazanmış, nisbətən cavan bir çox kafedra müdirlərini V.Vəliyev kafedra müdirliyindən uzaqlaşdırdı, bəziləri isə onun yaratdığı mənəvi terror şəraitinə dözməyərək, ya öz ərizələri ilə vəzifələrini tərk etdilər, ya da AzTU-dan tamam getdilər. V.Vəliyev onlardan heç birini çağırıb soruşmadı ki, niyə işdən çıxırsınız. Dərhal sevincək ərizələrinin üstünü yazdı və elə həmin gün əmrlərini verdi. Onlardan bəzilərinin getməsi universitet əməkdaşları tərəfindən təəccüblə və narazılıqla qarşılandı. Onların yerinə rektor heç də bu vəzifəyə layiq olmayan dosentləri təyin etdi. Lakin rektor mənşə etibari ilə rektorla bir regiondan olan, 78 yaşlı kafedra müdiri Eldar Qocayevə bu günə qədər toxunmayıb. Bundan əlavə, V.Vəliyevin AzTU-ya gəlişindən əvvəl kafedra müdiri vəzifəsini tərk etmiş onun yerlisi, 75 yaşlı Vaqif Məhərrəmovu yenidən qaytarıb, kafedra müdiri təyin etdi. V.Vəliyev öz qohumları, heç kifayət qədər elmi-pedaqoji stajları olmayan Nizami Poladovu “Metallurgiya və materialşünaslıq” fakültəsinə, Fərqanə Musayevanı isə “İqtisadiyyat və idarəetmə” fakültəsinə dekan təyin etdi, halbuki bu, mövcud təlimatlara ziddir. Başqa bir qohumunu, heç dosentlik üçün kifayət qədər elmi-pedaqoji stajı çatmayan Arzu Süleymanovu iki elmlər doktorunun işlədiyi “İqtisadiyyat və statistika” kafedrasına müdir təyin etdi. V.Vəliyev öz adamı olan Nadir Ağayevi Riyaziyyat kafedrasına müdir təyin etmək xatirinə kafedranın adını dəyişdirərək, “Mühəndis riyaziyyatı və süni intellekt” qoydu, çünki N.Ağayevin elmi dərəcəsi texnika elmləri doktorudur və o, Riyaziyyat kafedrasının müdirliyinə uyğun gəlmir. Görəsən N.Ağayev heç olmazsa, ali riyaziyyatı bilirmi? Bunlar kifayətdirmi? Bu misalları istənilən qədər genişləndirmək olar, ancaq buna ehtiyac varmı?

Texniki Universitetə gəldiyi gündən V.Vəliyev işçiləri yanına çağıraraq, başqaları haqqında sorğu-suala tutmağa, məlumat toplamağa, hər kəs haqqında yazılı dosye hazırlamağa başladı. Nəticədə tezliklə universitetdə qeyri sağlam mühit yarandı, xəbərçiliyə, donosçuluğa, böhtan yaxmağa meylli olan adamlar üçün əsl münbit mühit yarandı və onlar özləri həvəslə rektorun yanına gedib, şər-böhtan, qarayaxma, donosçuluq, başqalarını “baqaja qoymaq” xarakterli məlumat verməyə başladılar. Belə adamların sayı getdikcə artdı. V.Vəliyev də özü çox zaman yığıncaqlarda utanmadan deyir ki, filankəsin haqqında mənə filan məlumatı veriblər. Deməli, o, bunları adi bir şey hesab edir. Bu insanın bir mənəvi simasına baxın. İndi onun universitetə gətirdiyi təzə kadrlar, onun yerliləri də kollektivi tanıdıqca bu işə qoşulublar. Onların sayı saysız-

hesabsızdır. Biz ancaq AzTU-nun köhnə kadrlarından bu işə qoşulanların arasında tanınmışlardan bir neçəsinin adlarını çəkmək istəyirik – prorektor Sübhan Namazov, keçmiş prorektor İlham Pirməmmədov, keçmiş dekan, indi Tədris hissəsi müdiri Ərəstun Məmmədov, Humanitar fənlər kafedrasının müdiri Həbib Mirzəyev. Həbib Mirzəyevin haqqında isə xüsusi danışmaq lazımdır. AzTU-da çoxları yaxşı bilir ki, o, V.Vəliyevin AzTU-ya gəlişindən əvvəl dekan müavini işləyərkən ən çox çirkaba bulaşmış şəxslərdən biri olub, müəllimlərlə tələbələr arasında dəllallıq edirdi, tələbələrdən pul alaraq, qiymət düzəltdirirdi. Bunun haqqında məlumat V.Vəliyevin dosyesində yoxdurmu? Yoxdursa, bilsin. İndi Həbib Mirzəyev öz çirkli keçmişini “yumaq” üçün rektora yarınır, xəbərçilik edir, başqalarının haqqında böhtan xarakterli məlumat verir. Əvəzində H.Mirzəyev indi vəzifə və hörmət sahibi olub, rektorun yaxınlarından birinə çevrilib. Nəticədə rektor onu respublikada tanınmış üç elmlər doktoru, professorun işlədiyi birləşdirilmiş Humanitar fənlər kafedrasına müdir təyin edib. Bax, budur Vilayət Vəliyevin kadr siyasəti. O, layiqli, elmli, işgüzar, mənəviyyatca təmiz, illərcə AzTU-da işləmiş professorları, dosentləri vəzifələrindən və hətta universitetdən uzaqlaşdırır, görün ətrafına kimləri toplayır. Bütün bunlar universiteti dağıtmaq deyilsə, bəs nədir? Bəlkə, V.Vəliyev özü bunları dərk etmək səviyyəsində deyil, əgər belədirsə, onu başa salırıq, başa düşsün.

Rektor V.Vəliyevin bütün fəaliyyəti belə işlərə – intriqalar qurmağa, regional klanının nümayəndələrini müxtəlif vasitələrlə universitetdə işə qəbul etməyə, özünə piar, müsbət görüntü, imic yaratmağa və beləliklə, təhsili dağıtmağa yönəlib. Ümumiyyətlə, təhsil onu maraqlandırmır, o, təhsildən uzaq adamdır. Təhsil ancaq o zaman onun yadına düşür ki, nəyi isə kəsmək, nəyi isə ləğv etmək, kafedraların tədris yükünü azaltmaq və bu yolla vəsaitə qənaət etmək lazımdır. Ona görə də təhsil heç onun yadına düşməsə yaxşıdır, biz bundan yaxşı bir şey gözləmirik. Ancaq, hər halda, hərdən yadına düşür. V.Vəliyev universitetə gələn kimi onun ilk addımlarından biri AzTU-da mühəndis hazırlığına yönəlmiş fənləri və tapşırıqları ləğv etmək oldu. Mühəndis qrafikası kafedrasını ləğv etdi, bütün müəllimləri yarım ştata keçirdi və onu başqa kafedra ilə birləşdirdi, baxmayaraq ki, bu kafedra bütün universitet ixtisaslarına dərs deyirdi və mühəndis üçün ən vacib fənni tədris edirdi. Bütün mühəndis ixtisaslarının tədris planlarında dəyişiklik edərək, kurs işləri və kurs layihələrinin, qrafik işlərin 4 illik təhsil müddətində yalnız ikisini saxladı, onlar da məcburi deyil, könüllüdür, tələbə istəsə onları verər, istəməsə verməz, ancaq bu onlara kəsir sayılmır. Buraxılış işləri ləğv edildi və dövlət imtahanı ilə əvəz edildi, karantinlə əlaqədar isə heç dövlət imtahanları da keçirilmədən tələbələrə diplom verilir. Deməli, indi bizim tələbələr 4 il ərzində heç bir kurs işi, kurs layihəsi, qrafik iş, hesabat işi, buraxılış işi vermədən, bir düsturla hesabat etmədən, bir xətt və ya çevrə (hələ çertyoj, cizgi demirik) çəkmədən universiteti bitirib, mühəndis diplomu alırlar. Bu tarix, ya ədəbiyyat ixtisası deyil ki, tələbələr təhsil müddətində yalnız danışsınlar. Ona qalsa, heç tələbələrimiz danışıq qabiliyyətinə də malik deyillər. Bunlara mühəndis demək olarmı, kimə lazımdır belə mühəndis? Bu isə tələbələrin təhsil haqqını alıb, onları aldatmaq, savadsız etməkdən başqa bir şey deyil. Heç mühəndis bilikləri demirik, tələbələrimizdən orta məktəbdə öyrəndikləri Nyuton qanunlarını və ya Om qanunu soruşun, görək neçəsi cavab verə biləcək. Əgər xarici ölkələrdə bundan xəbər tutsalar, AzTU-nun verdiyi diplomları tanımayacaqlar. İki il yarımdır ki, V.Vəliyev Texniki Universiteti “texnikisizləşdirməklə” və “iqtisadçılaşdırmaqla” məşğuldur, amma əslində heç onu da bacarmır və universitetin təhsil sistemini dağıdır. Bu, rektor tərəfindən dövlət səviyyəsində təxribatdır.

Hətta semestr imtahanları da böyük miqyaslı bir saxtakarlığa çevrilib. Bu il yanvar sessiyasının imtahanlarının əksəriyyəti universitetdə üz-üzə, şifahi formada keçirildi. İmtahan başlamazdan yarım saat əvvəl imtahan bileti və biletin 5 sualı tələbələrə məlum olur. Tələbələr imtahana daxil olduqdan 20 dəqiqə sonra kağızda öz qeydlərini edərək, müəllimin qarşısında oturub, qeydlərinə baxaraq, şifahi cavab verməlidirlər. Əvvəla, tələbələrimiz şifahi danışmaq qabiliyyətindən tamamilə məhrumdurlar və öz fikirlərini izah edə bilmirlər, deyirlər ki, biz bu vaxta qədər belə, yəni şifahi imtahan verməmişik. Bu da onların bu vaxta qədər test üsulu ilə

imtahan vermələrinin nəticəsidir. Tələbələr imtahanda oturub, cavabı hazırladıqları müddətdə isə mobil telefonlarını açıb, qarşılarına qoyurlar və cavabları oradan kağıza köçürürlər, gəlib müəllimin qarşısında cavabları oradan oxuyurlar (sualların cavabları olan mühazirə konspektini isə müəllim semestrin əvvəlində elektron formatda tələbələrə verməlidir). İmtahanları tez-tez guya yoxlamağa gələnlər isə, məsələn, prorektor Sübhan Namazov, imtahan otağına girib, müəllimə irad tutur ki, niyə tələbələrə imkan vermirsiniz telefondan, dəftər-kitabdan istifadə etsinlər, tələbələrə isə deyir, götürün telefonlarınızı, dəftər-kitabınızı, baxın. Bu da oldu imtahan. Müəllimlər isə “xatası məndən uzaq olsun” prinsipi ilə tələbələrin hamısına müvəffəq qiymət yazırlar. Məsələ ondadır ki, müəllimlər böyük təzyiq altındadırlar, əgər hər hansı bir tələbə müəllimdən şikayət yazsa, müəllimdən heç soruşmadan ki, nə olub, ağına-bozuna baxmadan, müəllim cəzalandırılır. Belə hadisələr də olub. Bunu isə əsasını rektor universitetə gələn gündən qoyub. Hələ pandemiya karantinləri başlamamışdan əvvəl rektor tez-tez ayrı-ayrı fakültələrin tələbələri ilə görüş keçirib, onlara deyirdi: “Mən sizin dostunuzam, hansı müəllimdən şikayətiniz olsa, günün istənilən vaxtında mənim yanıma gəlib, mənə məlumat verin” (müəllimlər isə lazım olanda onun qəbuluna düşə bilmirlər). Bununla da o, qeyri-etik hərəkətləri ilə normal tələbə-müəllim münasibətlərini, təlim-tərbiyə prosesini və nəticədə tədris prosesini pozur, tələbələrdə müəllimin düşmən obrazını yaradır, yəni mən sizin dostunuzamsa, deməli qarşı tərəf, yəni müəllimlər düşməndirlər, tələbələri müəllimlərin üzərinə qaldırır, onları müəllimlərdən şikayət etməyə təhrik edir. Sual oluna bilər, rektor niyə belə edir? Çünki, tələbələrin çox olmasından və onların etirazlarından qorxur, bu yolla onları “öz tərəfinə çəkir”, müəllimləri də bu yolla qorxudaraq, onları daha itaətkar və qorxaq, məzlum edir. Müəllimlər də, “mənim nəyimə lazımdır, xatası məndən uzaq olsun” prinsipi ilə ucdantutma hamıya müvəffəq qiymət yazıb, başdan edirlər. Nəticədə isə həm təlim-tərbiyə, həm də tədris prosesi zərər çəkir. Texniki tədris isə ölkəmiz üçün strateji əhəmiyyətə malikdir”.

Həmçinin oxuyun

Bakı meriyasında müşavirə keçirilib, bu şəxsə şiddətli töhmət verilib

Bakı Şəhər İcra Hakimiyyətində martın 26-da Binəqədi rayonunda qadının liftin qapıları arasında qalaraq ölməsi faktı …