“Əksinə, biz düşünürük ki, Kommunist Partiyası niyə birinci yeri tutmadı?”
Rusiya Dövlət Dumasındakı 450 yerdən 225-nə seçkilər proporsional, qalan 225-nə majoritar əsasda keçirilib. Seçkilərin ilkin nəticələrinə əsasən heç bir sensasiya baş verməyib və səslərin əksəriyyətini hakim partiya qazanıb. Baxmayaraq ki, bu seçkilər Rusiyada ciddi sosial-iqtisadi çətinliklərin yaşandığı bir vaxtda keçirilir. Dövlət Dumasında qalan yerləri bölüşdürənlər formal olaraq müxalifət partiyaları hesab edilsə də, onlar prinsipial məsələlərdə Kremlin siyasətini dəstəkləyir.
Artıq Rusiya Mərkəzi Seçki Komissiyası nəticələri açıqlamağa başlayıb. MSK səslərin təxminən 7 faizinin sayılmasından sonra hakim “Vahid Rusiya” partiyasının 44.15 faiz səs topladığını elan edib. Jirinovskinin partiyasının (LDPR) 18.39, Kommunist Partiyasının (KPRF) 17.24, “Ədalətli Rusiya”nın 6.24 faiz səs topladığı elan edilib. Beşinci yerdə isə “Rusiya Kommunistləri” partiyası gəlir, lakin bu partiya 5 faizlik baryeri keçə bilmir.
MSK bildirir ki, birmandatlı dairələr üzrə hakim “Vahid Rusiya” partiyası Dövlət Dumasında 65 mandat qazana bilər. Lakin bunlar hələ ilkin nəticələrdir.
Ümumrusiya İctimai Rəyi Öyrənmə Mərkəzi və Federal İctimai Rəy sorğu mərkəzlərinin apardığı “exit-poll”arın nəticələrinə əsasən isə, nəticələr daha fərqlidir. Belə ki, bu “exit-poll”ardan birinə görə, hakim partiya 49.9 faiz səs yığıb. KPRF 16.3 faiz səslə ikinci, LDPR 14.3 faiz səslə üçüncüdür, “Ədalətli Rusiya” isə 7.6 faiz səs yığıb. Lakin Ümumrusiya İctimai Rəyi Öyrənmə Mərkəzinin apardığı “exit-poll”a əsasən, qərbmeylli müxalifət partiyası “Yabloko” 3 faizlik baryeri keçir və bu partiya dövlətdən maliyyə almaq şansı qazanır. Partiyanın 3.4 faiz səs ala biləcəyi bildirilir. MSK-nın sədri Olqa Pamfilova isə deyib ki, “exit-poll” hələ rəsmi nəticə deyil və rəsmi nəticələrlə rəy sorğuları arasında kardinal fərqlər ola bilər.
Göründüyü kimi, həm rəsmi dairələrin açıqladığı rəqəmlərdə, həm də müstəqil müşahidəçilərin gəldiyi qənaətdə birinci yeri hakim partiya, ikinci yeri isə kommunistlər tutur. Artıq bu sıralama ənənə halını alıb. Uzun illərdir kommunistlər ikinciliyi əldən vermir.
Azərbaycan kommunistləri Rusiyadakı əqidədaşlarının uğurunu nə ilə izah edir?
Azərbaycan Kommunist Partiyası Mərkəzi Komitəsinin birinci katibi Telman Nurullayev qəzetimizə açıqlamasında bildirdi ki, kommunistlərin Rusiyada yüksək səs toplamasında qeyri-adilik yoxdur: ” Bu sırf qanunauyğunluqdur. Əksinə, biz düşünürük ki, Kommunist Partiyası niyə birinci yeri tutmadı? Ancaq, istənilən halda, Rusiya kimi böyük ölkə üçün bu böyük göstəricidir. Züqanovun partiyasının qazandığı səslərdə bir qədər azalma var. Hesab edirik ki, bunun da fərqinə varıb növbəti seçkidə daha böyük əzmkarlıq nümayiş etdirəcəklər. Biz sabah rusiyalı kommunist əqidədaşlarımıza qazandıqları uğurla bağlı təbrik məktubu göndərəcəyik. Rusiyada solçuluq hər zaman populyar olub. Hazırda da bu bələdir. Çünki həmin ölkənin orta təbəqəsi kollektivçiliyə meyllidir. Bundan əlavə, bir əsrdən artıqdır marksizm-leninizm ideologiyası həmin ölkədə tüğyan edir. Təbii ki, bütün bunların həmin uğura böyük təsiri var. Bizim və rusiyalı kommunistlərin istəyi budur ki, növbəti seçkilərdə onlar birinciliyi qazansın. Bunun üçün həmin ölkədə münbit şərait var”.
Məhəmmədəli QƏRİBLİ