Ana səhifə / Cəmiyyət / Samir Şərifov istefa vermək istəyir

Samir Şərifov istefa vermək istəyir

Son günlər maliyyə naziri Samir Şərifovun və onun rəhbərlik etdiyi Maliyyə Nazirliyinin fəaliyyətindəki ciddi nöqsanlarla bağlı araşdırmalara başlanıldığı haqda məlumatlar intensivləşib. Həmin məlumatlarda iddia olunur ki, Azərbaycan Hesablama Palatası Maliyyə Nazirliyində əsaslı yoxlamalara başlayıb.

Həmin yoxlamaların “növbədənkənar və təcili” olduğu vurğulanan həmin məlumatın ardınca isə bu təftişlərin təsadüfi olmadığı və konkret olaraq Samir Şərifovun çökdürülməsinə hesablandığlı bildirilir. Maraqlıdır, bəs Samir Şərifovun gözlənilmədən hakimiyyət üçün “arzuolunmaz şəxs” statusu qazanmasının sirri nədədir?

Savash.org mövzuyla bağlı əldə etdiyi informasiyaların təlilini və olayla bağlı ehtimallarını oxucuları ilə bölüşür. Hər şeydən öncə bir məqamın xüsusi vurğulanmağa ehtiyacı var ki, əslində Samir Şərifovun “vurulma” kampaniyası nə qədər də “gözlənilməz” effekti yaratsa da, proses gözlənilən və proqnozlaşdırılan idi. Belə ki, Samir Şərifov üst qatda özünü nə qədər “sözəbaxan” göstərməyə çalışsa da, onun iddialarını görməmək imkansız idi. Özü haqda “islahatçı nazir”, “qərbyönümlü məmur” imici formalaşdırmağa cəhdlər göstərən maliyyə nazirinin ən yaxın hədəfi isə baş nazir postu idi.

Diqqətli oxucular xatırlamamış olmaz və o qədər də uzaq keçmiş deyil ki, Samir Şərifov parlamentdə baş nazirin əvəzinə hökumətin hesabatlarını təqdim edir, hökumətə ünvanlı suallara məhz o cavab verir və faktiki baş nazir postunu icra etməsi görüntüsü yaratmağa çalışırdı. Bu baxımdan yalnız bir məqamı qabartmağa lüzum görürük ki, bir neçə il öncə ABŞ səfirliyində keçirilən rəsmi qəbulda da Azərbaycan hökuməti adından məhz Samir Şərifov çıxış etmişdi ki, bu da bir daha diqqətləri onun üzərinə cəmləmişdi.

Bu və digər məqamların nəzərə alınması isə Samir Şərifov haqqında “ikinci Fərhad Əliyev” obrazının yaranması ilə nəticələnib. Bu obraz Samir Şərifova Qərbin siyasi dairələrində müəyyən üstünlüklər qazandırsa da, bu amilin onun sıxışdırılmasında ştrixlərdən biri olması da unudulmamalıdır.

Savash.org altını cızaraq xatırladır ki, Samir Şərifovun əleyhinə kampaniyanın daha da sürətlənməsi məhz “MTN işi” prosesindən sonra start götürdü. Belə ki, məhkəmə ifadələrində Beynəlxalq Bankın sabiq rəhbəri Cahangir Hacıyevin məhz maliyyə nazirini hədəf seçməsi Samir Şərifov üçün “soyuq duş” effekti idi. Sözügedən prosesin Samir Şərifovun sonunu gətirəcək mümkün inkişafı haqda növbəti yazımızda geniş bəhs edəcəyik. İndilik isə daha vacib bildiyimiz informasiya ilə tanışlığa keçək.

Əldə etdiyimiz məlumata görə, Samir Şərifov ətrafında cərəyan edən proseslərdən ciddi şəkildə narahatdır. Yalnız cüzi hissəsini bildiyimiz, əhəmiyyətli hissəsini isə bilmədiyimiz həmin qorxu səbəbindən isə maliyyə naziri “sudan quru çıxmaq” taktikasını seçib. Belə ki, hakimiyyətin daha üst yetkililərinə istefaya getməyə hazır olduğunu bəyan edən Samir Şərifov ən çox çəkindiyi “yox” cavabını alıb. Hazırda Samir Şərifov üçün ən yaxşı çıxış yolunun vəzifəsini itirməklə canını qurtarmaq olduğunu söyləyən mənbənin sözlərinə görə, ona başa salınıb ki, bu imkandan məhrumdur və onun fəaliyyətindəki bütün şübhəli məqamlar ciddi şəkildə araşdırılacaq.

Məsələ diqqətimizdədir və mövzuya qayıdacağıq.

Həmçinin oxuyun

“OMİD” 10 min manatədək cərimə oluna bilər – Məhkəmə davam edir

Azərbaycanda inşaat mallarının topdan və pərakəndə satışı üzrə ən böyük satış mərkəzlərindən birinə sahiblik edən …

Bir cavab yazın