Azinforum.az İnformasiya Portalı Onlayn Xəbər Portalı
Bu gün mətbuatda qalmaqallı məntəqlərdən biri kimi adı hallanan 85 saylı Şamaxı Seçki Dairəsinin 6 saylı məntəqəsində hazırda işıqlar söndürülüb. Bu barədə məlumatı Azinforum.az-a həmin məntəqədə müşahidə aparan jurnalist Raziyə İmranqızı verib :
“Seçki başa çatan kimi burada işıqları söndürdülər. Bu məntəqədə seçkidə iştirak etmək yaşı çatmayan məktəb uşaqlarının səs verməsinə dair məlumatları ictimailəşdirəndən sonra, rayonun bir sıra rəsmi şəxsləri tərəfindən sorğu-suala tutuldum. Hətta mənə bəzi şirnikləşdirici təkliflər də edildi. Ancaq mən bir müşahidəçi kimi işimi sona qədər vicdanla yerinə yetirəcəyimi dedim. Maraqlansanız bilərsiniz ki, Şamaxının mərkəzində işıqlar nadir hallarda sönür. Bir neçə saatdır ki, burda işıq yoxdur. Tələblərimizə baxmayaraq DSK məntəqəni generatorla da təmin etmək istəmir”.
Biz MSK-nın saytı vasitəsilə həmin məntəqədəki vəziyyəti canlı izləmək qərarına gəldik. Məntəqədə zülmət qaranlığın hakim olduğunu gördük.
Qeyd edək ki, bu gün sözügedən məntəqədə məktəb yaşlı şagirdlərin səs verməsinə dair KİV-lərdə video və foto materiallar yayılmışdı.
Azinforum.az həmin məntəqədəki real vəziyyətin fotosunu təqdim edir.
