Azinforum.az İnformasiya Portalı Onlayn Xəbər Portalı
“Palmali” Şirkətlər Qrupunun sahibi Mübariz Mənsimovun sinif yoldaşı, şirkətin icraçı direktoru olmuş Vaqif Hüseynovun adı bir pul fırıldağı qalmaqalında keçir. Bu haqda redaksiyamızı bilgiləndirən mənbənin sözlərinə görə, Vüqar Hüseynov Türkiyədə Samir Tağıyev və Mübariz Nəsibovla iş qurublar. Bilinən odur ki, iş birliyi 3 il əvvəl start götürüb. M.Nəsibovun təklifi ilə qurulan iş birliyindən əldə olunan gəlir tərəflər arasında hər birinə 33 faiz olmaqla, bölünməliymiş. S.Tağıyevin Türkiyədə tanınan banklardan birinin təmsilçisi olduğu iddia edilir. Bildirilir ki, tərəflər razılaşıblar ki, M.Nəsibovla V.Hüseynov qurduqları şirkət üzərindən Samir Tağıyevin təmsil etdiyi bank üçün müştəri tapacaqlar. Göstərilən xidmətlərin qarşılığında əldə etdikləri gəliri isə aralarında böləcəklər.
Mənbəmiz obyektivlik naminə onu da qeyd edir ki, həmin dövrdə Mübariz Mənsimov Vüqar Hüseynovu “Palmali” Şirkətlər Qrupundan uzaqlaşdırdığından, həmin dövrdə o, işsiz olub. Mübariz Nəsbov isə hələ 2012-ci ildə Azərbaycandan Türkiyəyə gedərək, orada daşınma şirkəti qurub. M.Nəsibovun vaxtilə “İdnoy” adlı şirkəti olub. O, Xocalı işğal edildikdən və sakinləri Bakıya sığındıqdan sonra onlara “İdnoy” şirkəti üzərindən yardımlar göstərib, hər cür köməklik edib. Sonradan müflisləşən iş adamı uzun illər Azərbaycanda xırda bizneslə məşğul olub. 2012-ci ildə Türkiyəyə köçüb və orada yeni iş qurub.
Vüqar Hüseynov haqda bilinən odur ki, Mübariz Mənsimovla sinif yoldaşı olub. 2005-ci ilə qədər MTN-in Kadrlar İdarəsində çalışıb. Sabiq milli təhlükəsizlik naziri Eldar Mahmudovla yaxşı münasibətləri olub. V.Hüseynov biznes çevrələrində M.Mənsimovla yanaşı Eldar Mahmudovun kadrı kimi də tanınır.
“Palmali” Şirkətlər Qrupuna daxil olan gəmilərdən birinə Eldar Mahmudovun atası akademik Əhməd Mahmudovun adının verilməsində də V.Hüseynovun xidmətlərinin olduğu iddia edilir. 2005-ci ildən 2013-cü ilə qədər M.Mənsimovun yanında işləyən V.Hüseynovu həmin ilin dekabrında işdən qovublar. Yerinə türkiyəli Ələddin Aykaçı təyin ediblər. (Daha sonra Mübariz Mənsimov onu da işdən qovaraq, məhkəməyə verib – Red.) Belə bir vaxtda V.Hüseynova M.Nəsibovdan gələn iş təklifi göydəndüşmə olub. Lakin az keçməyib ki, V.Hüseynov yeni qurulan şirkəti tamamilə ələ keçirib və M.Nəsibovu pulsuz-parasız Türkiyədə küçədə qoyub. Qaynağımız bildirib ki, M.Nəsibov hazırda Bakıdadır. Vaxtilə xocalıdan olan qaçqınlara hər cür yardım etmiş M.Nəsibovun bu gün özünün yardıma ehtiyacı olduğu deyilir. O müxtəlif ünvanlara baş vuraraq aldadılması ilə bağlı tədbirlər görülməsinə nail olmağa çalışır.
Məsələ ilə bağlı “Palmali” şirkətlər qrupunun İctimaiyyətlə əlaqələr şöbəsinin müdiri Fidan Quliyeva ilə əlaqə saxlamağa çalışdıq. Çünki mənbələrimiz müxbirimizə bildirib ki, Vüqar Hüseynov 2016-cı ildən yenidən “Palmali” Şirkətlər Qrupuna qaytarılıb və hazırda bu şirkətdə yüksək vəzifə tutur.
Fidan xanım mesajlarımıza və zənglərimizə cavab verilmədi. M.Nəsibovu Bakıda arayıb tapa bilmədik. Bununla belə yazıda adı hallanan hər kəsi dinləməyə hazırıq.(musavat.com)
