Prezident İlham Əliyevin Naxçıvana etdiyi səfər və həmin səfər zamanı verdiyi bəzi mühüm bəyanatlar Ermənistan tərəfini ciddi narahat etməyə başlayıb. İlham Əliyevin Naxçıvanın dəmir yolu vasitəsilə blokadadan çıxarılacağına dair verdiyi bəyanatı erməni KİV-ləri öz istəklərinə uyğun şəkildə yozmağa başlayıb.
Onlar bildirir ki, İran heç də İlham Əliyevin bəyan etdiyi və nəticə etibarilə Naxçıvanın blokadadan çıxarılmasına hesablanan Astara-Rəşt dəmir yolunun tamamlanmasında maraqlı deyil. Erməni KİV-ləri iddia edir ki, bu səbəbdən də İran layihəni yubadır. Həmin məlumatda bildirilir ki, İran klassik dəmir yolu xəttinin bərpasında maraqlıdır. Yəni Mehridən keçən dəmir yolu vasitəsilə İran Naxçıvanı ötməklə Ermənistanın digər ərazilərilə dünyaya çıxışını təmin etmək istəyir. Təxribat xarakterli məqalədə bildirilir ki, hazırda Azərbaycan sözügedən klassik dəmir yolu xəttinin açılmasına maneçilik törətməklə, Ermənistanla yanaşı, həm də İranı blokadada saxlayır.
Bu cür materialların erməni mediasında dərci nəyə hesablana bilər?
Ekspert Aqşin Əliyev bildirdi ki, belə materialların dərci Ermənistanın Prezidentin Naxçıvana etdiyi səfərdən nə dərəcədə ehtiyatlandığının sübutu sayıla bilər:
“Naxçıvanın blokadadan çıxarılması reallaşmaq üzrədir. Özü də Ermənistana ehtiyac olmadan. Bu, Ermənistanı ciddi narahat edir. Onlar ümid edirdilər ki, Naxçıvanı blokadada saxlmaqla öz problemlərini də həll edəcəklər. Yəni Azərbaycan məcbur qalıb ənənəvi dəmir yolunun bərpasını istəyəcək. Bu olmadı və faktiki olaraq Astara-Rəşt dəmir yolu vasitəsilə Naxçıvanın blokadadan çıxarılması Ermənistanı yenə dünyadan təcrid vəziyyətində saxlayacaq. Məqsədləri bəllidir, istəyirlər ki, belə şantajlar vasitəsilə İranı layihədən çəkindirsinlər. Astara-Rəşt dəmir yolunun tikintisilə bağlı İran üzərinə düşən bütün öhdəlikləri yerinə yetirir. Azərbaycan tərəfindən həmin xəttə birləşməklə bağlı kiçik işlər qalıb. Bu layihə yaxın zamanlarda işə düşəcək. Azərbaycanın İranı blokadada saxlaması ilə bağlı səsləndirilən ittihamlar isə lap gülməlidir. Çünki İran böyük əraziyə malik ölkədir. İstənilən yolla dünyaya çıxışı var. Hətta bizimlə həmin ölkə arasında bir neçə gömrük məntəqəsi fəaliyyət göstərir. Bizim tərəfdən İranın blokadaya alınması baş verə bilməz. Ermənistan öz halına acıyır”.
Məhəmmədəli QƏRİBLİ