MTN zabitlərini hansı vəkillər müdafiə edəcək?

Vəkillərin bəzisi onların hüquqlarını müdafiə etməkdən imtina edib

Bəlli olduğu kimi, MTN ətrafında baş verən proseslərlə bağlı çoxlu sayda vəzifəli şəxslər həbs olunub. Rabitə və Informasiya Texnologiyaları Nazirliyinə aid məsul əməkdaşları da bu sıraya əlavə etsək, ümumilikdə təxminən 40-a yaxın şəxs bu və digər məqamlarla bağlı saxlanılıb. Lakin həbs olunan general və zabitlərin vəkillərinin kimliyi hələ də bilinmir.

Elə bir mənzərə yaranıb ki, sanki kütləvi informasiya vasitələrindən ehtiyat edərək bu məsələ cəmiyyətdən gizli saxlanılır. Hökumətin bu məsələdə maraqlı olmadığı da müşahidə edilir. Həmçinin,  mətbuatla əlaqəli tanınmış vəkillərin həbs olunanların hüquqlarını müdafiə etməsinin qarşısının alındığı da gələn məlumatlar arasındadır.

Maraqlıdır, tanınmış vəkillər bu barədə nə düşünür? Onlara həmin vəzifəli şəxslərin vəkili olması barədə müraciət olunubmu?

Tanınmış vəkil Elçin Sadıqov söyləyir ki, sözügedən məsələylə bağlı ona heç bir müraciət olunmayıb. Elçin bəy bunun müəyyən səbəbi olduğunu da bildirir:

“Ümumiyyətlə, Eynulla Fətullayevin, Aqil Xəlilin, həmçinin, Pərviz Həşimlinin işində onlar belə desək, məndən incimişdilər. Ona görə də hazırda həbs olunanların hüquqlarını müdafiə etmək barədə mənə müraciət olunmayıb”.

Vəkil Toğrul Babayev də sözügedən məsələylə bağlı  ona müraciət olunmadığını söyləyir.

Tanınmış vəkil Əyyub Kərimov isə Vəkillər Kollegiyasının üzvü olmadığını deyərək cinayət işlərinə vəkil kimi yalnız Kollegiyanın üzvləri olanların çıxdığını söyləyir. Əyyub bəy cinayət işlərinə Vəkillər Kollegiyasının üzvü olmayanların  vəkil kimi çıxmasının qanunla qadağan olunduğunu bildirir:

“Mən də bu barədə mətbuatda oxumuşam ki, tanınmış vəkillərə  həbs olunanların hüquqlarını müdafiə etməyə imkan vermirlər. Görünür, tanınmış vəkillərin həmin işdə olan informasiyanı nə vaxtsa ictimailəşdirəcəyindən ehtiyat edirlər. Yəqin tanınmamış, cəmiyyət içində o qədər də öz sözü, mövqeyi olmayan şəxslərin onları müdafiə etməsi lazım bilinir. Elə bir hal varsa, istintaq təqsirləndirilən şəxsin iradəsinin ziddinə gedirsə, həmin şəxsin istədiyi vəkili seçməyə tam ixtiyarı var. Şəxs hüquqlarını hansı vəkilin müdafiə etməsini özü müstəqil olaraq seçir. Ona qarşı maneə varsa, buna çox pis baxıram”.

Tanınmış vəkil Əshabəli Mustafayev həbs olunan vəzifəli bir şəxsin hüquqlarını müdafiə etmək barədə ona müraciət olunduğunu söyləyir. Əshabəli bəy həbs olunan şəxsin  yaxınlarına özünün bu prosesdə iştirakına müxtəlif bəhanələrlə imkan verilməyəcəyini izah etdiyini də bildirib:

“Əsas olaraq deyim ki, mənə olan müraciətdən imtina etdim.  Vəkilin borcudur ki, hər bir şəxsin şəxsiyyətindən, etdiyi əməldən asılı olmayaraq onun hüquqlarını müdafiə etsin.  Lakin vəkilin bu vəzifəsi müqavilə bağlanandan sonradır.  Xatırladım ki, mən MTN-də bir neçə işdə iştirak etmişəm və ordakı haqsızlıqları, qanunsuzluqları görərək bütün bunların şahidi olmuşam. Onların nələr etdiyini əyani şəkildə görmüşəm. Ona görə də hazırda həbsdə olan şəxsləri müdafiə etmək istəmirəm. Hesab edirəm ki, buna mənim mənəvi haqqım var. Həmçinin, hazırda buna vaxtım da yoxdur. Çünki son il yarımda demək olar ki, heç bir işə çıxmıram, əsasən Avropa Məhkəməsiylə işləyirəm və yazışmalar aparıram. Ona görə də  sözügedən məsələylə bağlı mənə olan müraciətdən imtina etdim… Bir məqamı da vurğulamaq istərdim. Dünən bizə basqılar edən, güdən, izləyən, telefon danışıqlarını dinləyən bu şəxslər son məqamda yenə də müdafiə üçün bizə müraciət edirlər. Bu, sevindirici haldır və əminəm ki, əvvəl-axır bütün mənfi tendensiyaların axırı belə bitəcək”.

Vəkil Adil Ismayılov söyləyir ki, ona bu məsələylə bağlı müraciət olunsa da, həmin şəxsin vəkili olmaqdan imtina edib. A.Ismayılov qeyd edir ki, onda olan məlumata görə kim istəyir özünə vəkil tutur və bu məsələyə maneçilik, problem  yaranması faktına rast gəlməyib.

Tanınmış vəkil Aslan Ismayılov qeyd edir ki, Vəkillər Kollegiyasından xaric olunduğu üçün ona heç müraciət edən  yoxdur.

Nigar