Dünya miqyasında xüsusi maraqla izlənən hadisələrdən biri də İranla Qərb dövlətləri arasında əldə olunan razılığın nə vaxt qüvvəyə minəcəyidir. Çünki bu razılıq, dünya siyasəti ilə yanaşı, iqtisadiyyatına da ciddi təsir göstərəcək. Məsələn, İran dünya bazarlarına daha çox neft çıxara biləcək. Amma ABŞ-da baş verənlər İranla razılığın təsdiqini getdikcə daha böyük sual alıtna alır.
Məhz belə bir vaxtda ABŞ-da təqaüddə olan 200-ə yaxın yüksək rütbəli sabiq hərbçi qanunvericiləri İranla əldə edilən razılığı rədd etməyə çağırıb. Bununla bağlı Konqresin hər iki palatasına ünvanlanan məktubda deyilir ki, İrana qarşı sanksiyaların ləğvi və gələn on il ərzində rejimin milyardlarla dollarının azad edilməsi İsrail və Yaxın Şərqin təhlükəsizliyinə ciddi hədə törədəcək. ABŞ Konresi isə sentyabrın 17-dək razılığı ya qəbul, ya da rədd etməlidir. Konqresin respublikaçı üzvləri və Barak Obamanın Demokrat Partiyasından qanunvericilərin bir hissəsi razılığı təsdiq etməyəcəklərini bildirib. Elə bu da İranla razılığı sual altına alır. Düzdür, ABŞ prezidenti Barak Obama Konqres üzvlərini İranla nüvə razılığını dəstəkləməyə çağırmaqda davam edir. O, Tehran sazişin şərtlərinə əməl etmədiyi təqdirdə, ABŞ-ın İrana qarşı hərbi əməliyyat həyata keçirə biləcəyini və ya sanksiyaları bərpa edə biləcəyini vurğulayıb. Obama Nümayəndələr Palatasının üzvü, nyu-yorklu demokrat Cerrold Nadelrə yazdığı məktubda bildirib: “İran nüvə silahına doğru getsə, Birləşmiş Ştatların, hərbi müdaxilə də daxil olmaqla, bir neçə variantı olacaq”. Məktubda, həmçinin, ABŞ-ın raketə qarşı müdafiə üçün İran və dünya qüdrətləri arasında razılığın əleyhinə çıxış edən İsrailə ayrılan vəsaitlərin artırılacağı bildirilib. Obamanın məktubu tanınmış demokrat senator Robert Menendezin Konqresdə keçiriləcək səsvermə zamanı İranla nüvə razılığının əleyhinə səs verəcəyini açıqladığı həftə göndərilib. Respublikaçılar isə artıq razılığın qarşısını alacaqlarını vəd edib.
Menendez bildirib:”İran nüvə bombası hazırlayırsa, mən bunun altına imza atmayacam. Mən razılığın əleyhinə və hətta lazım gəlsə, prezident vetosunun ləğv olunmasına da səs verəcəm”. Menendez Obama administrasiyasını razılığın əsas elementlərini müzakirə etmək üçün yenidən danışıqların başlamasına çağırıb. Lakin Obama administrasiyası bunun mümkünsüz olduğunu bildirib. Bundan əvvəl isə Nyu-York senatoru Çak Şumer də nüvə razılığının əleyhinə səs verəcəyini və digər senatorları da onun kimi səs vermələri üçün razı salmağa çalışacağını deyib. Nümayəndələr Palatası və Senat nüvə razılığının əleyhinə səs verəcəyi təqdirdə Obama veto qoyacağını vəd edib. Konqresin birlikdə vetonu aradan qaldırmaq üçün tələb olunan səslərə sahib olub-olmadığı isə məlum deyil. ABŞ-da narazılığa yol açan daha bir məsələ “Associated Press” agentlinin yaydığı məlumatdır. Məlumatda bildirilir ki, BMT-nin nüvə nəzarətçisi və Tehran arasında əldə olunan əlavə razılıq layihəsinə əsasən məxfi Parçin nüvə təsisini İranın öz müfəttişləri yoxlayacaq. Agentlik bildirir ki, “Əlavə saziş II” adlanan razılıq normal prosedurlardan uzaqlaşır, çünki bu razılıq əsasında İran inkar etdiyi fəaliyyətlərini təftiş etmək məqsədilə öz ekspert və avadanlıqlarından istifadə edəcək. Beləliklə, Beynəlxalq Atom Enerjisi Agentliyinin (MAQATE) nəzarətində olarkən nüvə silahlarını inkişaf etdirməyə çalışacaq. Düzdür, MAQATE-nin rəhbəri Yukia Amano bu hesabatın heç bir əhəmiyyət kəsb etmədiyini deyib: “Bu cür bəyanatlar bizim belə bir vacib yoxlamaya yanaşmağımızı təhrif edir”. Amano məxfi razılıqla bağlı məlumat verə bilməyəcəyini vurğulasa da, sazişin son versiyasının texniki baxımdan əsaslı və agentliyin uzun müddətdən bəri bərqərar olunmuş qaydaları ilə uyğun olduğunu deyib. Bütün bunlar Konqresdə İranla razılığın əleyhinə çıxanların sayının artmasına səbəb olur. İsrail də nüvə razılığının təsdiqlənməməsi üçün Konqresə təzyiqlərini artırır. Hətta Barak Obamanın Konqresdə İranla əldə olunan nüvə razılaşmasının səsvermə zamanı qəbul edilməməsi üçün çalışan Amerika-İsrail İctimai Əlaqələr Komitəsini (AİPAC) sərt şəkildə tənqid etməsi də nəticə verməyib. “New York Times” qəzeti yazır ki, bundan əvvəl Ronald Reyqan, Corc Buşun da AİPAC-lə problemləri olub. Lakin bu günə qədər heç bir prezident ən güclü lobbilərdən olan AİPAC-ə belə meydan oxumayıb. AİPAC silah lobbisindən sonra ABŞ-da ən güclü lobbi hesab edilir. Komitənin nüvə razılaşmasına qarşı artıq 20 milyon dollar xərclədiyi, bundan başqa, razılaşma əleyhinə elan və reklamlara isə daha 25 milyon ayırdığı bildirilir.
İsralin müdafiə naziri Moşe Yaalon isə İranın nüvə proqramından özlərini qoruyacaqlarını bildirib. O, İranın nüvə ambisiyalarının qarşısının alınmasının vacibliyini vurğulayıb: “Biz bunun sanksiyalar vasitəsilə həyata keçirilməsini istəyirik. Lakin nəticə etibarilə İsrail özünü müdafiə etməlidir”. İsrail müdafiə naziri İranın “altılıq” ölkələri ilə əldə etdiyi nüvə razılaşmasının “tarixi səhv” olduğunu qeyd edib. Onun sözlərinə görə, İran öhdəliklərini icra etməsə, İsrail aviazərbələr endirə bilər. Qeyd edək ki, İranla “altılıq” ölkələri arasında nüvə məsələsinə dair razılaşma 14 iyulda əldə edilib. BMT Təhlükəsizlik Şurasının yekdilliklə qəbul etdiyi qətnamədə nüvə proqramının nəzarətə götürülməsi müqabilində BMT sanksiyalarının mərhələli şəkildə aradan qaldırılması nəzərdə tutulur.
Nahid SALAYEV